ԴԱՀԿ ԾԱՌԱՅՈՒԹՅԱՆ ԱՇԽԱՏԱԿՑԻ ՎՐԱ ԿԱՏԱՐՎԱԾ ՀԱՐՁԱԿՄԱՆ ՄԱՍԻՆ «Ազգը» արդեն հայտնել է, որ նախորդ օրը հարձակման է ենթարկվել դատական ակտերի հարկադիր կատարման ծառայության Կոտայքի մարզային բաժնի ավագ հարկադիր կատարող Հայկ Բաբաջանյանը: Ըստ «Արմենիա» բժշկական կենտրոնի վիրաբույժ Արթուր Քոչարյանի , Բաբաջանյանի վիրահատությունը տեւել է շուրջ 4 ժամ, վնասված են եղել նրա ձախ վերին եւ ստորին վերջույթները, մկանները, նյարդերը եւ զարկերակը: Ներկայումս Հ. Բաբաջանյանը վերակենդանացման բաժանմունքից տեղափոխվել է հիվանդասենյակ եւ նրա կյանքին այլեւս վտանգ չի սպառնում: Ինչպես «Արմենպրեսին» հայտնեց ԴԱՀԿ ԱԾ մամլո քարտուղարը, ծառայությունում Հայկ Բաբաջանյանը վարում է «Բջնի» հանքային ջրերի գործարան» ՓԲԸ-ին վերաբերող կատարողական վարույթները: ԴԱՀԿ ծառայությունը չի բացառում, որ դեպքը կարող է անմիջական կապ ունենալ հարկադիր կատարողի ծառայողական պարտականությունների կատարման հետ: Իր հերթին «Բջնի հանքային ջրերի գործարան» փակ բաժնետիրական ընկերությունը երեկ հայտարարություն է տարածելՙ դատապարտելով Հ. Բաբաջանյանի նկատմամբ տեղի ունեցած բռնությունը: Ընկերությունը անդրադարձել է նաեւ «մամուլում շրջանառվող լուրերին եւ ակնարկներին»: Հայտարարության մեջ ասվում է. «Մեր կազմակերպությունը գործում է օրենքի դաշտում: «Բջնի» ընկերությունը երբեք չի փորձել ու չի փորձում գործել օրենքից դուրս»: Վերջինս նաեւ իր վարկածներն է առաջարկել տեղի ունեցածի կապակցությամբ, հերքելով իրենց կազմակերպության մասնակցությունը այդ հանցանքի կատարման մեջ, նշելով, որ «հարկադիր կատարող Հ. Բաբաջանյանը շարքային աշխատակից է, որը տեղյակ չէ նույնիսկ իր կատարողական վարույթի նյութերին»: «Բջնի» ընկերությունը տեղի ունեցածում մեղադրում է գործող իշխանություններին. «Կարծում ենք, զուգադիպություն չէ աճուրդի այս նախաշեմին նման եղանակով վարկաբեկել «Բջնի» ընկերությանը եւ հասարակության հարգանքը նվազեցնել վերջինիս նկատմամբ: Համոզված ենք, որ այս վարկածի ուղղությամբ նույն իշխանության մասը կազմող իրավապահները որեւէ գործողություն չեն կատարի»: Ընկերությունը հույս է հայտնում, որ իրավապահ մարմինները շատ արագ կբացահայտեն իրական հանցագործին: Այս պայմաններում իշխանական որոշ լրատվամիջոցներ հիշեցնում են Խ. Սուքիասյանի հորՙ ժամանակին կատարած սպառնալիքը «Բջնիին» տիրանալու հավակնություն ունեցողներին պատժելու մասին: |
