ՈՐՄՆԱՆԿԱՐՆԵՐԸ ԵԿԵՂԵՑԻՆԵՐՈՒՄ ԼԻԼԻԹ ՅՈԼՉՅԱՆ Եկեղեցաշինությունը մեր ժողովրդի մշակույթի կարեւորագույն մասն է: Դարերի ընթացքում, բնական աղետներից եւ պատերազմներից ճարտարապետական կոթողներն ավերվում են` առաջացնելով վերանորոգման անհրաժեշտություն: Վերոնշյալի կարիքն ունեն բազմաթիվ եկեղեցիներ, այդ թվում նաեւ Առինջի Սուրբ Հովհաննես եկեղեցին: Այն 18-րդ դարի շինություն է` ռուսական ճարտարապետությանը հատուկ ոճով, որը 2007-ին ավերակներից վերականգնվել է, խորանը պատկերազարդվել: Խորանի պատկերազարդման աշխատանքները կատարել է որմնանկարիչ Լեւոն Զաքյանը: Զրույցի ժամանակ նա նշեց, որ ռուսներից ներմուծված 18-րդ դարի ճարտարապետություն է. «Փորձեցինք պահպանել եւ ձեւավորեցինք: Խորանը սրբատաշ քարերից Էր, մենք ծեփել տվեցինք եւ արդյունքում ստացանք այն, ինչ կա այժմ,-ասաց նա,-քանի որ եկեղեցին Սուրբ Հովհաննես Մկրտչի անունով է, այստեղ բարեխոսը Հովհաննես Մկրտիչն է եւ Սուրբ Գրիգոր Լուսավորիչը: Այս եկեղեցում որմնանկարիչն աշխատել է 2 ամիս` աշակերտ Արտյոմ Մելքոնյանի հետ: Վերականգնման աշխատանքներից առաջ Լեւոն Զաքյանն արտագրել է պատերի գրությունները, ապա դրանք վերականգնել: Եկեղեցիներում որմնանկարները եւ հոգեւոր թեմաներով նկարները դարձել են նրա ստեղծագործական կյանքի անբաժանելի մասը: Քանաքեռի Սուրբ Հակոբ եկեղեցին նույնպես վերանորոգվել է 1990 թվականին եւ այսօր արդեն կատարվում են շրջակայքի բարեկարգման աշխատանքներ: Հոգեւոր հովիվ Տեր Սահակ քահանա Սահակյանը, որ 1990-ից Քանաքեռի Սուրբ Հակոբ եկեղեցու հոգեւոր հովիվն է, ակնհայտ կերպով զգում է տարբերությունը: Ինչպես նշում է Տեր Սահակը` շատ վատ վիճակում են նաեւ եկեղեցու նկարները: Արարատյան Հայրապետական թեմի առաջնորդ Նավասարդ արքեպիսկոպոս Կճոյանի պատվերով 1997-ին Զաքյանը վերանորոգել է որմնանկարները` պահպանելով ամեն մանրուք: «Շատ եմ կարեւորում որմնանկարների դերը, հատկապես այն նկարների, որտեղ հոգի է դրված եւ զգացմունք: Որմնանկարչի աշխատանքին նայելով ամեն մի նկար, ոչ թե պարզ, սովորական պատկեր է, այլ այդ նկարներով մարդ կարողանում է հոգու աչքերով միավորվել պատկերված Սրբինՙ նրան ունենալով իբրեւ բարեխոս: Հենց այդպիսին են Լ. Զաքյանի սրբանկարները», որմնանկարչի գործը գնահատեց Տեր Սահակը: Տեր հայրը համոզված է, որ յուրաքանչյուր գործ պետք է սկսել աղոթքով ու հավատքով, առավել եւս, երբ արված աշխատանքը վերաբերում է եկեղեցուն: | 
