«ՅՈՒՆԻԲԱՆԿ»-Ի ՄԱՍՆԱՃՅՈՒՂԱՅԻՆ ՑԱՆՑԸ ՄԻԱՑՎԵԼ Է online ՀԱՄԱԿԱՐԳԻՆ «Յունիբանկ»-ն ավարտեց իր հայաստանյան մասնաճյուղային ցանցի միացումը սպասարկման online համակարգին: Ներկայումս տվյալների միասնական բազային են միացված բանկի գլխամասային գրասենյակը եւ 28 մասնաճյուղերը: Բանկի եւս երկու մասնաճյուղերը` «Ստեփանակերտն» ու «Գանձասարը», որոնք տեղակայված են ԼՂՀ-ում կմիացվեն online համակարգին մոտ ժամանակներս: Online համակարգի գործարկման շնորհիվ բանկի հաճախորդներին հնարավորություն ընձեռվեց բանկային գործարքները կատարել այդ համակարգին միացված ցանկացած մասնաճյուղում` անկախ իրենց սկզբնական սպասարկման հասցեից: Ինչպես նշեց «Յունիբանկ»-ի Տեղեկատվական համակարգերի կառավարման գծով տնօրեն Մեսրոպ Հակոբյանը, այս համակարգի կիրառությունն առավել ուշագրավ է դրամական փոխանցումների ծառայություններից օգտվող հաճախորդների համար: Մասնավորապես, «Յունիստրիմ» համակարգով դեպի Հայաստան կատարված դրամական փոխանցումը հաճախորդը կարող է ստանալ online համակարգին միացված բանկի ցանկացած մասնաճյուղում` անկախ փոխանցողի կողմից նշված հասցեից: Նշենք, որ 2008թ.-ին Հայաստանում «Յունիստրիմ» համակարգի շրջանառությունը կազմել է 802 մլն ԱՄՆ դոլար` 22%-ով գերազանցելով նախորդ տարվա ցուցանիշը: Online համակարգի ներդրման աշխատանքները «Յունիբանկ»-ում սկսվել էին 2008թ.-ի հուլիսից: Բանկի ներդրումները այս ուղղությամբ կազմել են մոտ 1 մլն դոլար: «Տարեկան կտրվածքով «Յունիբանկ»-ը սպասարկում է մոտ 1,5 մլն հաճախորդ, այնպես որ մեզ համար շատ կարեւոր է հաճախորդների նման թվաքանակի սպասարկման հետ մեկտեղ պահպանել սպասարկման հարմարավետությունն ու արագությունը»,- ասում է Մ.Հակոբյանը: | 
