ՀԱՅ ԱՎԵՏԱՐԱՆԱԿԱՆ ՄԿՐՏԱԿԱՆ ՔՐԻՍՏՈՆՅԱՆԵՐԻ ԵԿԵՂԵՑՈՒ ՀԱՅՏԱՐԱՐՈՒԹՅՈՒՆԸ ԱՄՆ-ի Օկլահոմա նահանգից Հայաստան ժամանած երգչախմբի վերաբերյալ Տեղեկատվական տարբեր աղբյուրներից տեղեկացանք, որ ԱՄՆ-ի Օկլահոմա նահանգից Հայաստան է ժամանում երգչախումբ: Փորձեցինք նամակագրական կապով կասեցնել սխալ դրդապատճառների հիման վրա գործունեության ծավալումը Հայաստանում եւ մասնավորապես Հայ առաքելական սուրբ եկեղեցու դեմ արտահայտված սխալ դիրքորոշումները: Հայ ավետարանական մկրտական քրիստոնյաների եկեղեցին, որը Հայաստանում ավետարանական մկրտական շարժման պատմական ժառանգորդն է, խստորեն մերժում եւ անընդունելի է համարում բոլոր կազմակերպիչների եւ հանձին Ավետարանչական ընկերակցության (Ավետարանական եկեղեցու) հովանավորչական գործունեությունը այս երգչախմբի նկատմամբ: Միեւնույն ժամանակ, Հայ ավետարանական մկրտական քրիստոնյաների եկեղեցին որեւէ մեկին իրավունք չի տվել իր անունից ներկայանալու եւ գործունեություն ծավալելու Հայաստանում: Ի լրումն ուզում ենք նաեւ տեղեկացնել, որ Հայ ավետարանական մկրտական քրիստոնյաների եկեղեցին անցել է ստալինյան եւ կոմունիստական ռեժիմի հալածանքների ու արհավիրքների միջով, մշտապես պահպանելով բարիդրացիական հարաբերություններ Մայր Հայ առաքելական սուրբ եկեղեցու հետ` ստանալով մշտական խնամք այդ շրջանում, որի վառ ապացույցն է ներկայիս հաստատուն հարաբերությունների առկայությունը: Ուստի Հայաստանի Հանրապետությունը կարիք չունի նոր «առաքելությունների»: Խմբ. կողմից տեղեկացնենք, որ Հայ ավետարանական մկրտական քրիստոնյաների եկեղեցին չի ենթարկվում Ռընե Լեւոնյանի գլխավորած «Ավետարանչական եկեղեցուն»: | 
