|
«ԱԶԳ» ՕՐԱԹԵՐԹ #167, 17-09-2009
| Տեղադրվել է` 2009-09-22 17:55:44 (GMT +04:00) |
ԱԶԳԱՅԻՆ ՄՐՑՈՒՆԱԿՈՒԹՅԱՆ ԱՌԱՋԸՆԹԱՑՆ ՈՒ ՀԵՏԸՆԹԱՑԸ Ա. Մ. Ազգային մրցունակության զեկույցի շնորհանդեսը երեկ տեղի ունեցավ «Էրեբունի-պլազա» հյուրանոցում: Ինչպես ավելի վաղ տեղեկացրել էր զեկույցը պատրաստած «Տնտեսություն եւ արժեքներ» հետազոտական կենտրոնի նախագահ Մանուկ Հերգնյանը, Համաշխարհային տնտեսական ֆորումի մրցունակության համաշխարհային զեկույցում 2009-2010-ին Հայաստանը 133 երկրների շարքում զբաղեցրել է 97-րդ տեղը: Նա երեկ նույնպես անդրադարձավ այդ ցուցանիշին` նշելով, որ Հայաստանը 2009-ին անցում է կատարել զարգացման որակապես նոր փուլ, որտեղ փոխվում է մրցակցության խթանիչների դերը: Մանուկ Հերգնյանն ընդգծեց, որ մրցունակության համեմատաբար լավ արդյունքներ գրանցվել են հիմնարար ոլորտներում եւ, մասնավորապես, զգալի առաջընթաց կա ենթակառույցների եւ մակրոտնտեսական կայունության առումով: Որոշակի հետընթաց է արձանագրվել ապրանքային շուկայի արդյունավետության եւ նորարարության ոլորտում: Վարչապետ Տիգրան Սարգսյանը, բարձր գնահատելով կատարված աշխատանքը, նշեց, որ զեկույցը կլինի մասնավոր եւ պետական սեկտորի հուսալի գործընկերը: Նա հետաքրքրական համարեց հաջողության հասած տարբեր երկրների փորձը, որոնցից յուրաքանչյուրն իր ուրույն ճանապարհով հասել է հաջողության եւ որոնց մասին նշված է զեկույցում: Ըստ վարչապետի, չնայած համաշխարհային ճգնաժամի հետեւանքներին, Հայաստանի կառավարությունն անում է ամեն ինչ, որպեսզի հաղթահարի այս փորձությունը: Տիգրան Սարգսյանը նաեւ հույս հայտնեց, որ զեկույցը տարբեր ծրագրերում լուրջ բարեփոխումների խթան կլինի: Հայաստանում USAID-ի փոխտնօրեն Ջոն Սյոնգը նշեց, որ այս զեկույցի նպատակն է օժանդակել մասնավոր եւ հանրային հատվածների միջեւ ընդգրկուն երկխոսությանը եւ քննարկումների կայացմանը, որոնք կնպաստեն Հայաստանի մրցունակության բարձրացմանը եւ արդյունավետ նորարական ազգային համակարգի ձեւավորմանը: | 
