ՄՈՍԿՎԱՅՈՒՄ ԶԱՆԳՎԱԾԱՅԻՆ ԾԵԾԿՌՏՈՒՔԻ ՊԱՏՃԱՌԸ ՀԱՅ ՍՐՃԱՐԱՆԱՏԵՐԵՐՆ ԵՆ «Ազգը» երեկ գրեց սեպտեմբերի 29-ի լույս 30-ի գիշերը Մոսկվայի Ցարիցինո միկրոշրջանում պատահած զանգվածային ծեծկռտուքի եւ 5 վիրավորների մասին: «Կոմսոմոլսկայա պրավդան» հոկտեմբերի 1-ի համարում հաղորդում է հավելյալ մանրամասնություններ: Պարզվում է, որ ծեծկռտուքին մասնակցել են Տովարիշչեսկայա փողոցում գտնվող երեք մրցակից սրճարանների հայ սեփականատերերը: Նրանք վիճել են հարսանիքի պատճառով, որ ուզում էր կազմակերպել մի կովկասցի: Սրճարանատերերից երկուսը պայմանավորվել էին գինը որոշակի մակարդակից չիջեցնել, իսկ երրորդն ավելի էր իջեցրել գինը ու ստացել էր հարսանիքի անցկացման պատվերը: Առաջին երկուսը մեղադրել էին երրորդին, վեճը վերաճել էր մոտ 50 մասնակիցների փողոցային բախումների: Գործի էին դրվել բեյսբոլի մահակներ, դանակներ, տրավմատիկ եւ մարտական ատրճանակներ: ՌԻԱ գործակալությանը հայտնի են դարձել 5 վիրավորների անունները. 32-ամյա Մամեդով, 27-ամյա Մելքոնյան, 23-ամյա Մկրտչյան, 21-ամյա Խաչատրյան, 20-ամյա Սիմոնյան: Նրանցից մեկը Հյուսիսային Կովկասից է, մյուսները ՀՀ քաղաքացիներ են: Վիրավորներից երկուսի վիճակը շատ ծանր է, իսկ մյուսները հրաժարվում են համագործակցել ոստիկանության հետ: | 
