ՉԱԽԱԼՅԱՆՆԵՐԸ ՀԵՌԱՑԵԼ ԵՆ ԴԱՏԱՐԱՆԻՑ` ՀՐԱԺԱՐՎԵԼՈՎ ՄԱՍՆԱԿՑԵԼ ԴԱՏԱՎԱՐՈՒԹՅԱՆԸ Ա. Հ. Ինչպես «Ազգ» -ն արդեն տեղեկացրել էր, հոկտեմբերի 23-ին Թբիլիսիի վերաքննիչ դատարանում տեղի ունեցավ ջավախքահայ քաղաքական ակտիվիստ, «Միասնական Ջավախք» շարժման առաջնորդ Վահագն Չախալյանի գործով հերթական դատալսումը: Նիստի սկզբում պարզվեց, որ դատարանը չէր ստացել Վահագն Չախալյանի հայտարարությունը, որով նա հրաժարվում էր այլեւս շարունակել ներկա գտնվել դատալսումներին: Ուստի ջավախքահայ ակտիվիստը դատարանում բարձրաձայնեց «Ազգի» ընթերցողներին արդեն ծանոթ հայտարարությունը եւ դուրս եկավ դատարանի դահլիճից: Նրա օրինակին հետեւեցին նաեւ Վահագնի հայրն ու եղբայրը, որոնք եւս անցնում են գործով: Այնուհետեւ Վահագն Չախալյանի դատապաշտպաններից մեկը` Նինո Անդրիաշվիլին հայտարարեց, որ նա ստացել է պաշտպանության կողմի ծախսերով կատարված փորձաքննության արդյունքները, որտեղ նշվում է, որ Վահագն Չախալյանի տանը եւ գրասենյակում իբր հայտնաբերված զենքի վրա որեւէ մատնահետքեր չի գտնվել, քանի որ երկար ժամանակ է անցել դրանց «հայտնաբերումից», եւ դրանք փորձաքննությանը պիտանի չեն: Չնայած դրան փաստաբանը հրաժարվել է կցել այդ փորձաքննության արդյունքները գործին, քանի որ փորձագիտական ծառայությունը թույլ չէր տվել նրան եւ նրա կողմից ներգրավված անկախ փորձագետին ներկա գտնվելու փորձաքննության իրականացմանը, ինչը նա գնահատեց որպես իր` փաստաբանի իրավունքի խախտում, որ արդեն իսկ բողոքարկվել է դատարանում առանձին հայցով: Դատալսումների թարգմանությունը նույն ավանդական խայտառակ որակի էր: Դատավորը եւս ավանդաբար մերժեցՙ թարգմանչին բացարկ հայտնելու փաստաբան Ստեփան Ոսկանյանի միջնորդությունը: Այնուհետեւ դատավորը անցավ դատախազի եւ փաստաբանի ավարտական ճառերին: Դատախազը շատ հակիրճ, ընդամենը 2-3 նախադասությամբ ասաց, որ առաջին ատյանի դատավճիռը հիմնավորված է եւ պահանջեց թողնել այն անփոփոխ: Չախալյանի շահերը պաշտպանող երեք փաստաբաններից երկուսը հայտարարեցին, որ նրանց ժամանակ է պետք ըստ պատշաճի պաշտպանական ճառ պատրաստելու համար: Դատավորը, որն ակնհայտորեն ցանկանում էր ինչքան հնարավոր է արագ ավարտել դատավարությունը, այնուամենայնիվ ստիպված էր հաշվի առնել փաստաբանների օրինական պահանջը եւ հետաձգել նիստը մինչեւ հոկտեմբերի 30-ը: | 
