ՆԱԻՐԻՏ ԳՈՐԾԱՐԱՆԻ 3 ԱՇԽԱՏԱԿԻՑ ՄԵՂԱԴՐՎՈՒՄ ԵՆ... ՄԱՐԻԵՏԱ ՄԱԿԱՐՅԱՆ «Ազգը» ժամանակին անդրադարձել է մայիսի 14-ին «Նաիրիտ» գործարանում տեղի ունեցած վթարին, որի հետեւանքով 1-12 արտադրամասի «Բ» բաժանմունքի կոնդեսատորներում տեղի ունեցած պայթյունները 4 մարդու մահվան պատճառ դարձան, իսկ գործարանին պատճառված վնասի չափը կազմեց 41 553 427 դրամ: Ժողովրդի մեջ շարունակ պտտվում էին լուրեր, թե վթարի ողջ մեղքը կբարդվի անմեղ զոհված աշխատակիցների վրա: Փաստի առթիվ հարուցված քրեական գործի նախաքննությունն իրականացնող դատախազը երեկ հաստատել է մեղադրական եզրակացությունը: Ձեռք բերված ապացույցների հիման վրա գործարանի 1-12 արտադրամասի «Բ» բաժանմունքի հերթափոխի պետ Դ. Նահապետյանին, 1-12 արտադրամասի պետ Ա. Ասլանյանին եւ գործարանի քլորոպրենի արտադրության պետ Գ. Խաչանյանին մեղադրանք է առաջադրվել ՀՀ քրեական օրենսգրքի 285-րդ հոդվածի 2-րդ մասովՙ վտանգավոր քիմիական նյութերի հետ վարվելու կանոնները խախտելու համար, որն անզգուշությամբ առաջացրել է մարդու մահ: Նախաքննությամբ պարզվել եւ հիմնավորվել է, որ այդ երեքը մայիսի 14-ին «Բ» բաժանմունքում դրսեւորելով հանցավոր ինքնավստահություն, պատշաճ կերպով չեն իրականացրել իրենց պաշտոնապես սահմանված պարտականությունները, որի արդյունքում եղան մարդկային զոհեր, այրիացան կանայք, որբացան զավակներ: Մինչդեռ Ա. Ասլանյանն ու Գ. Խաչանյանը, եթե դեպքի օրը դադարեցնեին 1-12 արտադրամասի «Բ» բաժանմունքի արտադրությունը, ապա այդ բաժանմունքի կոնդեսատորում առաջացած անկառավարելի գործընթացներից, ինքնաքայքայումից ու տեխնոլոգիական բնույթի պայթյուններից հրդեհ չէր առաջանաՙ տխուր ու անդառնալի հետեւանքներով: Վերը շարադրվածը մասնագետների մանրակրկիտ ուսումնասիրությունների ու ձեռք բերված ապացույցների հիմնավորումն է: Քրեական գործն ուղարկվել է Շենգավիթ համայնքի ընդհանուր իրավասության դատարան, ըստ էության քննելու համար: |
