ԱՐՇԱԿ ԲԱՆՈՒՉՅԱՆԻՑ ԿԲՌՆԱԳԱՆՁՎԻ $6000 Մ. ՄԱԿԱՐՅԱՆ Երեկ Երեւանի Կենտրոն եւ Նորք-Մարաշ համայնքների ընդհանուր իրավասության դատարանը Մատենադարանի նախկին փոխտնօրեն, «Մատենադարանի բարեկամներ» բարեգործական հիմնադրամի գործադիր տնօրեն Արշակ Բանուչյանին մեղավոր ճանաչեց խոշոր չափի յուրացման կամ վատնման, ինչպես նաեւ հարկերը վճարելուց չարամտորեն խուսափելու մեջ: Նրան առաջադրված մեղադրանքների համար վերջնական պատժաչափ սահմանեց 3 տարվա ազատազրկում: Ազգային ժողովի համաներման որոշման համաձայն, Արշակ Բանուչյանը փաստորեն ազատվում է պատիժը կրելուց: Դատարանը նաեւ վճռեց նրանից բռնագանձել շուրջ 2 միլիոն 335 հազար դրամ (6 հազար ԱՄՆ դոլար) հօգուտ «Մատենադարանի բարեկամներ» բարեգործական հիմնադրամի: Ինչպես նշված էր մեղադրանքում, Բանուչյանը հիմնադրամի գործադիր տնօրեն եղած ժամանակ վատնել է հիմնադրամին տրամադրված գումարը, չի հրատարակել Մատենադարանի հոբելյանական բացառիկ հանդեսը: Նա մեղադրվում է նաեւ իր սեփական «Մագաղաթ» հրատարակչության միջոցով առանց հաշվապահական փաստաթղթերի 5 հազար բուկլետ եւ 71 հազար բացիկ ձեռք բերելու եւ իր աշխատակիցներին վաճառել հանձնարարելու մեջ, որոնց համար էլ նրան առաջադրվել են մեղադրանքներ: Հիշեցնենք, որ 2008 թվականի մարտի 1-ի իրադարձություններից հետո Արշակ Բանուչյանի դեմ հարուցվել էր քրեական գործ եւ նա կալանավորվել էր զանգվածային անկարգություններ կազմակերպելու եւ ՀՀ նախագահի թեկնածու Լեւոն Տեր-Պետրոսյանի օգտին ընտրակաշառք բաժանելու մեղադրանքով: Սակայն չորս ամիս անց, ապացույցների բացակայության պատճառով, քրեական այդ գործը կարճվել էր: Բանուչյանը համաձայն չէ դատարանի վճռին հետ եւ որոշել է բողոքարկել: | 
