ՊԱՏԱՆԻ ՇԱԽՄԱՏԻՍՏԻ ԵՐԱԶԱՆՔԸ ԱՍԼԱՆՅԱՆՆԵՐ, Հայֆա, Իսրայել Իսրայելի Հայֆա քաղաքում, հրեական «Պուրիմ» տոնի կապակցությամբ կայացավ շախմատի մրցույթ, որին մասնակցեցին Իսրայելի հյուսիսային շրջանների մինչեւ ութերորդ դասարանի դպրոցականները, որտեղ եւ հայֆայաբնակ Դավիթ Ասլանյանը գրավեց պատվավոր երկրորդ տեղըՙ հետ մնալով իրենից տարիքով մեծ առաջատարից ընդամենը կես միավորով: Արժե նշել, որ Դավիթն անցավ այդ մրցումը «պետրոսյանական» ոճովՙ առանց պարտության: Իննամյա Դավիթը շատ է ուզում, որ այդ մասին իմանա Հայաստանի շախմատի հավաքականըՙ Լեւոն Արոնյանի ղեկավարությամբ: Չէ որ, ինչպես ինքն է գտնում, դրեզդենյան շախմատային նախորդ օլիմպիադայի ժամանակ իր ոգեւորիչ նամակը, հղած հայ շախմատիստներին, «պիտի որ անպայման օգնած լիներ» չեմպիոն դառնալուն (հրապարակվել էր «Ազգում»): Ի դեպ, Դավիթը շատ է ցավում, որ «մի նամակ էլ» չուղարկեց Թուրքիայում կայացած վերջին օլիմպիադայի մասնակից Հայաստանի հավաքականին, գտնելով նաեւ իր (նամակ չգրելու) մեղքը հայ շախմատիստների չորրորդ տեղը գրավելու մեջ: «Որ ես Թուրքիա նամակ ուղարկեի, մերոնք չորրորդ տեղում չէին լինի», ափսոսանքով ասում է պատանի շախմատիստը, որի իղձը... Լեւոն Արոնյանին փոխարինելն է... |
