«ԲԱՆԱՆՑՆ» ԱՄՐԱՊՆԴՈՒՄ Է ԱՌԱՋԱՏԱՐԻ ԴԻՐՔԸ ԱՇՈՏ ՀԱՅՐԱՊԵՏՅԱՆ Ֆուտբոլի Հայաստանի բարձրագույն խմբի առաջնությունը բավական հետաքրքրական ընթացք է ստացել: Դա պայմանավորված է վերջին խաղերում երկրի չեմպիոն «Փյունիկի» անհաջողությամբ: Չեմպիոնը 3-րդ անընդմեջ պարտությունը կրեցՙ սեփական հարկի տակ 0-1 հաշվով զիջելով «Գանձասարին», որին Կապանում պարզապես ջախջախել էր (6-1): Հանդիպման ելքը վճռեց խաղավարտին Արթուր Քոչարյանի խփած միակ գոլը: Բացառությամբ 1998-ի, «Փյունիկի» ողջ կենսագրությունում դեռ չէր պատահել, որ թիմն առաջնությունում 3 անընդմեջ պարտություն կրի: «Փյունիկի» այս անհաջողությունն անհանգստանալու լուրջ առիթ է, քանի որ շուտով ՀՀ չեմպիոնը մեկնարկելու է չեմպիոնների լիգայում, որտեղ մրցելու է Սերբիայի ուժեղագույն ակումբիՙ «Պարտիզանի» հետ: «Փյունիկի» հերթական անհաջողությունից օգտվեց «Բանանցը»ՙ չեմպիոնից միավորների տարբերությունը հասցնելով 6-ի: Թեեւ «Կիլիկիայի» հետ խաղում «Բանանցի» կազմում բացակայում էին առաջատար մի քանի ֆուտբոլիստներ, սակայն դա չխանգարեց 8-րդ անընդմեջ հաղթանակը տոնելու: Դեռեւս առաջին խաղակեսում Դենիրան Օրտեգան եւ Սամվել Մելքոնյանը 2 գոլ խփեցին: Ընդմիջումից հետո էլ «Բանանցը» կարող էր ավելացնել հաշիվը, սակայն ֆուտբոլիստները վրիպեցին նպաստավոր դիրքերից: «Կիլիկիան» էլ 2 անգամ հիանալի հնարավորություն ուներ գրավելու մրցակցի դարպասը, սակայն Տիգրան Ղարաբաղցյանը չօգտագործեց գոլային պահերը: «Փյունիկին» շրջանցեց նաեւ «Ուլիսը», որը սեփական հարկի տակ 4 անպատասխան գնդակ ուղարկեց «Շիրակի» դարպասը: Ուլիսցիներից աչքի ընկան Արտյոմ Ադամյանը, Վալերի Ալեքսանյանը, Շոթա Ջիքիան եւ Արտակ Գրիգորյանը: «Շիրակը» կարող էր «թրջել» հաշիվը, սակայն Անդրանիկ Բարիկյանը չիրացրեց 11 մ հարվածը: Կրկին հիանալի խաղաց «Ուլիսի» դարպասապահ Վլադիմիր Մալկովը, որն ընթացիկ առաջնությունում արդեն 3-րդ 11 մ հարվածը հետ մղեց: Վերջին շրջանում իր խաղամակարդակը զգալիորեն իջեցրել է «Միկան»: Դիլիջանում էլ միկացիներին չհաջողվեց հաղթել «Իմպուլսին»: Ավելին, խաղի ընթացքում 2 անգամ «Միկայի» ֆուտբոլիստները հաշվի մեջ հետապնդողի դերում էին: Նրանց ի վերջո հաջողվեց վերականգնել հավասարակշռությունը եւ խաղն ավարտել ոչ-ոքիՙ 2-2: «Միկայից» գոլերը խփեցին Նարեկ Բեգլարյանը եւ Ուլիսես Մոնտենեգրոն (11 մ հարվածով): «Իմպուլսից» աչքի ընկան բրազիլացիներ Ջուլիանո Հիմենեսը (11 մ) եւ Էլտոն Կարդոսոն: Մրցաշարային աղյուսակ | | Խ | Հ | Ո | Պ | Գ | Մ | | 1. Բանանց | 13 | 10 | 2 | 1 | 31-13 | 32 | | 2. Ուլիս | 13 | 9 | 2 | 2 | 23-7 | 29 | | 3. Փյունիկ | 13 | 8 | 2 | 3 | 30-12 | 26 | | 4. Միկա | 13 | 6 | 4 | 3 | 22-13 | 22 | | 5. Իմպուլս | 13 | 4 | 2 | 7 | 9-21 | 14 | | 6. Գանձասար | 13 | 4 | 1 | 8 | 10-20 | 13 | | 7. Կիլիկիա | 13 | 3 | 1 | 9 | 12-26 | 10 | | 8. Շիրակ | 13 | 1 | 0 | 12 | 9-34 | 3 |
Ռմբարկուները | Էդուարդո դո Սանթոս | «Բանանց» | 11 | | Գեւորգ Ղազարյան | «Փյունիկ» | 8 | | Մարկոս Պիզելի | «Փյունիկ» | 6 | | Սամվել Մելքոնյան | «Բանանց» | 6 |
| 
