ՉԱՅԼՈՒԻ ԴԵՊՔԻ ՈՒՇԱԴԻՐ ԴԻՏՈՐԴԸ Ա. ՀԱՐՈՒԹՅՈՒՆՅԱՆ Թուրքիան ամենայն ուշադրությամբ հետեւում է հայ-ադրբեջանական շփման գծում տեղի ունեցող բախումներին, ըստ ադրբեջանական «Թրենդ» գործակալությանՙ երեկ հայտարարել է Թուրքիայի արտգործնախարար Ահմեդ Դավութօղլուն: Կարսում լրագրողների հետ հանդիպմանը թուրք դիվանագետը հայտարարել է, թե Թուրքիան խորհրդակցություններ կանցկացնի տվյալ հարցի առնչությամբ ադրբեջանական կողմի հետ: «Որպեսզի վերջ տրվի հրադադարի խախտումներին, Թուրքիան կգործադրի հնարավոր բոլոր ջանքերը», ասել է Դավութօղլուն: Հետաքրքրական է, թե ինչպես է պատկերացնում Դավութօղլուն Թուրքիայի ջանքերի «գործադրումը», երբ հրադադարի ռեժիմը խախտողն Ադրբեջանն է ու տվյալ դեպքում Թուրքիային որպես ամենամտերիմ դաշնակից պետություն ընկալողը: Միեւնույն ժամանակ, ելնելով օգոստոսի 20-ին ստորագրված հայ-ռուսական N5 արձանագրության տարածաշրջանային արձագանքներից, կարելի է ենթադրել, որ Չայլուի մոտակայքում տեղի ունեցած երկրորդ միջադեպի կապակցությամբ որեւէ հայտարարություն անելու անհրաժեշտությունը Թուրքիայի համար նախ եւ առաջ պայմանավորվել է ոչ թե Ադրբեջանի համար նպաստավոր քայլ անելու, այլ տարածաշրջանում սեփական դերակատարությունը եւս մեկ անգամ կարեւորելու նպատակով: | 
