ՄՇԱԿՈՒԹԱՅԻՆ ՈԼՈՐՏԻ ՎԻՃԱՀԱՐՈՒՅՑ ՀԱՐՑԵՐԻՆ ՊԱՏԱՍԽԱՆՈՒՄ Է ՆԱԽԱՐԱՐԸ ՄԱՐԻԵՏԱ ՄԱԿԱՐՅԱՆ ՀՀ մշակույթի նախարար Հասմիկ Պողոսյանը պատասխանելով «Ազգի» հարցերինՙ կապված հայ մեծանուն գրող Հովհաննես Թումանյանի Թբիլիսիի Ամագլեբիս թիվ 18 հասցեում գտնվող բնակարանի շուրջը պտտվող իրարամերժ լուրերին ասաց, որ Թբիլիսի է մեկնել հատուկ հանձնաժողով եւ տեղում մանրակրկիտ ուսումնասիրություններից հետո պարզ կլինի մեր հետագա անելիքները: Այն հանգամանքը, որ տարիներ շարունակ առաջարկվել է Հայաստանի կառավարությանը գնել այդ տարածքները եւ այլն, դրանք չեն համապատասխանում իրականությանը: Միայն վերջին ժամանակներում սկսեց խոսվել այն մասին, որ այդ տարածքը վաճառվում է: «Միեւնույն ժամանակ, կարծում եմ, հարկ է նշել, որ եթե նույնիսկ որեւէ մեկը ուզում է գնել այդ վաճառվող տարածքը, եթե չգնվի մյուս տարածքը, որը պատկանում է Թումանյանի ընտանիքին, չի կարողանալու օգտագործել առաջինը ինչ-ինչ պատճառներով», ասաց նախարարը եւ շարունակեց. «Ես կարծում եմ, առաջին հերթին Թումանյանի ընտանիքը երբեւիցե չմտածի վաճառքի մասին: Այս պահի դրությամբ այդ խնդիրը դրված չէ, բայց կարծում եմ, երբ ես ստանամ հստակ տեղեկություններ, որ, այո, վաճառվում է, գնորդը կա, քմ-ի արժեքը սա է եւ այլն, մենք էլ համապատասխան միջոցներ կձեռնարկենք: Այսօր այդ տարածքի վերաբերյալ կան հակասական կարծիքներ ու նաեւ գները ուռճացված են: Պատվիրակության վերադարձից հետո կհստակեցվի ամեն ինչ, քանի որ Սուրբ Նշան եկեղեցու հետ կապված այլ լուրեր տարածվեցին, իսկ տեղում այլ բան պարզվեց: Այսօր բոլորս մտահոգ ենք եւ հարցերին հստակ պատասխան կտանք մի քանի օրից», եզրակացրեց նախարարը: Իսկ Սուրբ Նշանի հետագա վերանորոգման ու հետագա ճակատագիրը որոշվա՞ծ էՙ հարցին նախարարն ասաց, որ դիտավորյալ հրկիզում չի եղել, այլ ամանորյա հրավառությունների արդյունքում մոտ 10 օր եկեղեցու ներսում ծուխ է բարձրացել ու հրդեհ բռնկվել: «Բոլոր դեպքերում պետք է շեշտադրումները զգուշությամբ արվեն, որովհետեւ երկու հարեւան երկրների բարեկամությանն է վերաբերում: Բնականաբար, մենք հիմա մարդկանց ենք գործուղում, ճիշտ եզրակացություն ու կարծիք կազմելու համար: Եկեղեցու ամրակայման հրատապ աշխատանքների համար վրացական կողմը հատկացրել է գումարներ եւ նախագծային աշխատանքներին մասնակցում են նաեւ Հայաստանից մասնագետներ: Հետագայում կշարունակվի ամրակայման եւ վերանորոգման աշխատանքներըՙ կանխելու փլուզումները»: Նախարարը տեղեկացրեց, որ պայմանավորվածություն է ձեռք բերվել Վրաստանի մշակույթի նախարարի հետ բոլոր նմանատիպ հարցերը լուծելու համագործակցված, եւ առաջիկայում Հասմիկ Պողոսյանը կմեկնի Վրաստան ու այդ այցի ընթացքում շատ այլ հարցերի (օրինակՙ Տերյանի տուն-թանգարանի կիսավեր կառույցի - Մ. Մ.) շուրջը կընթանան բանակցություններ: «Ազգի» հարցին, թե Երեւանի Մաշտոցի պողոտայում գտնվող «Փակ շուկայի» խնդրում եղե՞լ են որեւէ առաջարկներ, ասաց. «Այս պահի դրությամբ մեզ դիմել են միայն ստորգետնյա հատվածում ավտոկայանատեղի կառուցելու համար: Դեռեւս չկան այլ ծրագրեր: Երբ կլինեն, համապատասխան ընթացակարգով, օրենքով կիրականացվեն: Այժմ ընթանում է շուկայի միայն հատակի վերանորոգման աշխատանքները, այն էլ քաղաքապետարանը կանգնեցրել է, ու մեր մասնագետները արդեն տվել են եզրակացություն, որ որեւէ խնդիր չկա ստորգետնյա աշխատանքների հարցում»: Իսկ այն հարցին, թե ի վերջո ե՞րբ է լուծվելու բանաստեղծ Պետրոս Դուրյանի գանգի վերաթաղման հարցը, նախարարն ասաց. «Բարդ լուծում պահանջող հարց է: Գրողների միությունը քննարկել է այդ հարցը, եզրակացությունը մեզ ուղարկել: Մշակույթի նախարարությունը մտավորականների հետ քննարկումից հանգել է այն եզրակացության, որ Պետրոս Դուրյանն ունի իր շիրիմը եւ չի բացառվում, որ մենք հետագայում այլ մշակութային ու գիտության գործիչների որոշ մասունքներ եւս պետք է ամփոփենք հայրենիքում, որոշվեց, որ Դուրյանի գանգը ամփոփվելու է Կոմիտասի անվ. Պանթեոնի տարածքումՙ պատի մեջ, համապատասխան ցուցանակով: Իսկ վերաթաղումներին ես դեմ եմ եւ պետք չէ հայկական արմատները այդ կերպ «ոչնչացնել»: Նման հարցերում պետք է շատ զգույշ ու մտածված գործենք, որ աշխարհով մեկ սփռված հայկական արմատները պահպանենք»: |
