ՀՆԴԿԱՍՏԱՆԸ ՆԵՐԿԱՅԱՑՆՈՒՄ ԵՆ ՀԱՅԵՐԸ Ի. Պ. Ովքեր սիրում են Հնդկաստանը, անտարբեր չեն այնտեղի կյանքին կամ պարզապես հետաքրքրված են Հնդկաստանով, ուրեմն մինչեւ հունվարի 23-ը կարող են տեսնել հնդկական աշխարհի մի փոքր մասը «Նարեկացի» արվեստի միությունում: Սակայն այս անգամ Հնդկաստանը ներկայացնում են ոչ թե հնդիկները, այլ հայերը: «Նարեկացի»-ում երեկ բացվեց «Հնդկաստանը հայերի աչքերով» լուսանկարչական ցուցահանդեսը: Ֆելիքս Ղարիբյանը մասնակիցներից մեկն է, նա Հնդկաստանում ապրել է 6 տարի, սովորել է այնտեղ, Հայաստան վերադարձել է անցյալ տարի, իսկ Հնդկաստանի մասին հետեւյալ կարծիքն է ասում. «Ով կարողացել է ապրել այնտեղ, դրանից հետո ամեն տեղ կհարմարվի, քանի որ Հնդկաստանը բավականին ծանր, բայցեւ գրավիչ երկիր է»: Ֆելիքսը հաստատ որոշել է` մնալու եւ աշխատելու է Հայաստանում, իսկ մասնակիցներից Պարույրն ասում է` հաստատ նորից է գնալու Հնդկաստան, որտեղ ճամփորդել է ընդամենը 20 օր: Իսկ Հնդկաստանում ճամփորդելու համար նույնիսկ հնդիկներն են ասում` մի ամբողջ կյանքը բավարար չէ: Ցուցահանդեսին մասնակցում են 21 հոգի, նրանք բոլորը եղել են Հնդկաստանում ու իրենց լուսանկարների միջոցով ներկայացնում են հնդկական իրականության ավելի շատ ուրախ ու վառ կողմերը: Մասնակիցները պրոֆեսիոնալ լուսանկարիչներ չեն: Բացմանը ներկա էր նաեւ Հայաստանում Հնդկաստանի դեսպան Աչալ Կումար Մալհոտրան : Բացման օրը այստեղի հնդիկ ուսանողները ներկայացրին նաեւ հնդկական պար: 19-ամյա Շինիվասանը պարող ուսանողներից մեկն էր, որը սովորում է Երեւանի բժշկական համալսարանում: Ասում է, երբ հետ գնաՙ իր հետ հայկական գեղանկարներ է տանելու, իսկ ավելի անկեղծ` կուզենար Հնդկաստան հայ աղջկա տանել: Իսկ այստեղ մինչեւ այսօր ամենից շատ հավանել է իր նկատած գենդերային հավասարությունը: Ցուցահանդեսը կազմակերպել է «Հայ-հնդկական բարեկամություն» ՀԿ-ն` աջակցությամբ Հայաստանում Հնդկաստանի դեսպանատան: Ցուցահանդեսը նվիրված է Հնդկաստանի Հանրապետության օրվան, որը նշվում է հունվարի 26-ին: | 
