ԲԵՆԶԻՆԻ ԳՈՐԾ. 20 ՎԿԱՅԻՑ ՄԻԱՅՆ ՄԵԿՆ Է ՑՈՒՑՄՈՒՆՔ ՏՎԵԼ ԸՆԴԴԵՄ ՄԱՐԳԱՐ ՕՀԱՆՅԱՆԻ Հ. Հ. Ճանապարհային ոստիկանությունում բենզինի յուրացման գործով վերջին վկան Նիկողայոս Եղիազարյանն էր: Ոստիկանության աշխատակիցը դատարանին պատմեց, որ հիմնականում հաշվետվության մեջ ներկայացրել է բենզինի այն քանակը, որը նա ստացել է: Սակայն 2009-ի եւ 2010-ի ամռան ամիսներին հաշվետվության մեջ բենզինի այլ քանակ է ներկայացրել. ստացել է 4000 կամ 5000 լիտր բենզին, իսկ փաստաթղթղերում ներկայացրել 9.000 կամ 10.000 լիտր: Նրա անմիջական ղեկավարը երկրորդ սպայական գումարտակի ղեկավար Սամվել Կարախանյանն է. «Նա է ասել, թե բենզինի ինչ քանակություն գրեմ փաստաթղթղերում»: Եղիազարյանը բենզինի հարցով ՃՈ նախկին պետ Մարգար Օհանյանին չի դիմել: «Իմ անմիջական ղեկավարը Սամվել Կարախանյանն է, նրա հանձնարարությամբ եմ արել», ասաց Եղիազարյանը: Գործի շրջանակներում 20 վկաներն արդեն դատարանում ցուցմունք են տվել: Նրանցից միայն մեկը` երկրորդ սպայական գումարտակի հրամանատար Արսեն Արշակյանը բենզինի գործով ցուցմունք տվեց ընդդեմ Օհանյանի: Սահմանված կարգով երեկ դատարանը պետք է լսեր գործով անցնող ամբաստանյալներին: Տեխնիկ Սամվել Մախմուրյանն ասաց, որ չի կարող ցուցմունք տալ: Խոսել նախընտրում է հաջորդ նիստին, եւ ֆինանսական խնդիրների պատճառով չի կարողանում օգտվել իրավաբանի ծառայությունից: «Վճարի հարցը չէ, պարզապես Մախմուրյանն այսօր ցուցում է ստացել հետաձգելու դատը», ասաց Մարգար Օհանյանը: Նախագահող դատավոր Մխիթար Պապոյանի որոշմամբ` Մախմուրյանը կօգտվի հանրային պաշտպանի ծառայությունից: Գործով անցնող մյուս ամբաստանյալը` ՃՈ տնտեսական բաժանմունքի պետ Արա Լեւոնյանը, հրաժարվեց փաստաբանի ծառայություններից: Նախընտրում է դատարանում ինքն իրեն պաշտպանել: Հիշեցնենք, որ դատարանում վերոնշյալ երկու անձինք մեղադրական եզրակացությանը համաձայն էին եւ խոստովանել էին, որ բենզինի յուրացման գործում մասնակցություն են ունեցել: Դատական հաջորդ նիստըՙ փետրվարի 14-ին: | 
