ՊԱՏԱՆԵԿԱՆ ՀԱՎԱՔԱԿԱՆԸ ՍԿՍԵԼ Է ՆԱԽԱՊԱՏՐԱՍՏՈՒԹՅՈՒՆԸ Ֆուտբոլի Հայաստանի մինչեւ 17 տարեկանների պատանեկան հավաքականն այսօրվանից Ավանի ակադեմիայում մեկշաբաթյա ուսումնամարզական հավաք կանցկացնի: Ռոման Սիմոնյանի գլխավորած հավաքականը կնախապատրաստվի ապրիլի 27-ից մայիսի 3-ը Ալմա Աթիում կայանալիք Ղազախստանի նախագահի գավաթի մրցաշարին: Հայաստանի պատանեկան հավաքականն ընդգրկվել է A խմբում, որտեղ կմրցի Ղազախստանի, Հունգարիայի եւ Թուրքմենստանի իր հասակակիցների հետ: B խմբում մրցավեճի կբռնվեն Չինաստանի, Ադրբեջանի, Իրանի եւ Վրաստանի հավաքականները: Նախնական փուլում խմբերում համապատասխան տեղերը զբաղեցրած հավաքականները կմրցեն միմյանց հետՙ վիճարկելով 1-8-րդ տեղերը: Հայ պատանիների առաջին մրցակիցը կլինի Հունգարիայի ընտրանին, որի հետ հանդիպումը կկայանա ապրիլի 28-ին: Հաջորդ օրը մեր թիմը կմրցի Թուրքմենստանի ֆուտբոլիստների հետ, իսկ մայիսի 1-ին ուժերը կչափի ղազախների հետ: Հիշեցնենք, որ անցյալ տարի մեր պատանեկան հավաքականը մասնակցել է այս մրցաշարին ու զբաղեցրել 7-րդ հորիզոնականը: | 
