ՌՀՄ-Ն ՀԱՐԳԵՑ ԽՈՐՀՐԴԱՅԻՆ ՄԻՈՒԹՅԱՆ ՀԵՐՈՍ ԳԵՎՈՐԳ ՎԱՐԴԱՆՅԱՆԻ ՀԻՇԱՏԱԿԸ Փետրվարի 17-ին Ռուսաստանի հայերի միությունը հարգեց Խորհրդային Միության հերոս Գեւորգ Անդրեյի Վարդանյանի հիշատակը: Այդ օրը կլրանար խորհրդային լեգենդար հետախույզի 88 տարին: Հիշատակման արարողությունը տեղի ունեցավ ժ. 12-ին Տրոյեկուրովսկոյե գերեզմանատանը: «Վերջին տարիներին Գեւորգ Վարդանյանը, որպես ՌՀՄ կենտրոնական խորհրդի անդամ, զբաղվում էր ակտիվ հասարակական գործունեությամբ, մասնակցում էր ՌՀՄ վետերանների գործերի հանձնաժողովի աշխատանքին, հանդիպում երիտասարդության եւ լայն հասարակայնության հետ: Մենք Գեւորգ Վարդանյանին գիտենք եւ հիշում ենք որպես կրթված, ինտելիգենտ, բարի, խիզախ եւ աներեւակայելիորեն համեստ մարդու: Մեր լեգենդար հայրենակցի հիշատակը մեկընդմիշտ արձանագրված է հայ ժողովրդի պատմության մեջ եւ արժանի օրինակ է երիտասարդ սերնդի համար: Նա իսկական հայրենասեր էր եւ սիրում էր Ռուսաստանն այնպես, ինչպես եւ Հայաստանը», ասվում է ՌՀՄ փոխնախագահ Լեւոն Մուքանյանի մեկնաբանության մեջ: |
