ԴԱՎԻԹ ԳՐԱՖԸ 6-ՐԴ ՀԱՂԹԱՆԱԿԸ ՏՈՆԵՑ Գերմանիայում բնակվող հայ պրոֆեսիոնալ բռնցքամարտիկ Դավիթ Գրաֆը Մայնի Ֆրանկֆուրտ քաղաքում իր հերթական մենամարտն անցկացրեց: Նրա մրցակիցը բրիտանացի Փոլ Մորիսն էր: Նախորդ 5 մենամարտերում Դավիթը մրցակիցներին հաղթել էր 1-ին եւ 2-րդ ռաունդներումՙ նոկաուտի ենթարկելով նրանց: Այս անգամ Դավիթի մրցակիցն ավելի համառ ու դիմացկուն դուրս եկավ: Նա լավ էր պաշտպանվում, կարողանում էր դիմագրավել հայ բռնցքամարտիկի հուժկու հարվածներին: Առաջին ծանրքաշային կարգում Դավիթ Գրաֆին առաջին անգամ չհաջողվեց ժամկետից շուտ ավարտել մենամարտը: Այս անգամ նա պայքարեց բոլոր 6 ռաունդներում ու մրցակցին հաղթեց միավորներովՙ տոնելով 6-րդ անընդմեջ հաղթանակը պրոֆեսիոնալ ռինգում: Մենամարտից հետո Դավիթ Գրաֆը հետեւյալն է նշել. «Չնայած իմ նոկաուտներով տարած հաղթանակների շարքն ընդհատվեց, սակայն բնավ էլ չեմ տխրել: Ես փորձի կարիք ունեմ, ուստի 6 կամ 8-ռաունդանոց մենամարտերը մինչեւ վերջ անցկացնելն ինձ համար օգտակար կլինի: Այսօր ինձ 6 ռաունդից հետո լավ եմ զգում, տրամադրությունս էլ տեղն է»: | 
