ՀՈԳԵԿԱՆ ՀԻՎԱՆԴՈՒԹՅՈՒՆՆԵՐԸ ՆՈՒՅՆՊԵՍ ԲՈՒԺԵԼԻ ԵՆ Ի. Պ. Մարդու հոգեկան առողջության վրա ազդող գործոնները շատ են` սոցիալական միջավայրը, բնակության վայրը, կրթությունը, դաստիարակությունը եւ այլն: Հայկական հոգեբուժական ասոցիացիայի նախագահ Արմեն Սողոյանը ընդգծում է` կարեւոր գործոն է եւ գենետիկական նախատրամադրվածությունը, ինչը բոլոր ժողովուրդների մեջ բաշխված է հավասարաչափ: Ընդհանուր առմամբ` հոգեկան խանգարումները լինում են բնածին ու ձեռքբերովի: Երեկ «Հայացք» ակումբում Արմեն Սողոյանը նաեւ անդրադարձավ բուժման հավանականությանը` նախ թյուր համարելով կարծիքը, թե բոլոր հոգեկան հիվանդություններն անբուժելի են. «Պարզապես կան հոգեկան հիվանդությունների դժվար բուժվող տեսակներ, իսկ անբուժելի դեպքերը հազվադեպ են»: Ապացուցված է` ժամանակին ճիշտ բուժում ստացած հոգեկան հիվանդություն ունեցողն ապաքինվելուց հետո ունակ է աշխատելու, ստեղծագործելու եւ ապրելու բնականոն կյանքով: Այսինքն` ապաքինվելուց հետո համարվում է միանգամայն առողջ: «Հասարակության վերաբերմունքը որքան համբերատար է լինում հոգեկան հիվանդի հանդեպ, այնքան բարելավում է հիվանդի վիճակը», նշեց պարոն Սողոյանը: Իսկ հոգեկան հիվանդությունը «ամոթ ու խայտառակություն» համարվող կաղապարներից ազատելու գործում, ըստ նրա, մեծ է եւ լրատվամիջոցների դերը: Հիվանդության ու դրա բուժման մասին լրատվամիջոցները նախ պետք է հաղորդեն ճիշտ ինֆորմացիա, փոխեն մտածելակերպը, որ հոգեբույժին, հոգեթերապեւտին դիմելն ամոթալի չէ: Ու բացի այս ամենից` չխթանեն հոգեկան հիվանդներին ծաղրող «զվարճալի» հաղորդումների ու սերիալների ցուցադրությունը: Բանախոսն անդրադարձավ նաեւ վիճակագրությանը. անցյալ տարվա ընթացքում հոգեբուժական տարբեր ծառայությունների հետ առնչություն են ունեցել Հայաստանի շուրջ 44 հազար քաղաքացիներ: | 
