ՄԵԿՆԱՐԿՈՒՄ Է ԲՐԻՏԱՆԱԿԱՆ ՖԻԼՄԵՐԻ ՏԱՍՆԵՐՈՐԴ ՓԱՌԱՏՈՆԸ ՄԱՆԱՆԱ ՀՈՎԱԿԻՄՅԱՆ Հայաստանում Բրիտանական խորհուրդը իր գործունեության տասնամյա հոբելյանի շրջանակում Բրիտանական խորհուրդի եւ Երեւանում բրիտանական դեսպանատան հետ համատեղ կազմակերպում է Բրիտանական ֆիլմերի տասներորդ փառատոնը: Այն հնարավորություն է տալիս բրիտանական ֆիլմերը հասանելի դարձնել հատկապես երիտասարդներին` այսպիսով նրանց ներկայացնելով ժամանակակից Բրիտանիան: Մարտի 10-19 «Մոսկվա» եւ «Նաիրի» կինոթատրոններում 10-րդ հոբելյանական փառատոնի շրջանակում հանդիսատեսին կներկայացվի 14 ֆիլմ, որից չորսը նվիրված է Դիքենսի երկուհարյուրամյակին, իսկ մնացյալ տասը կազմում են փառատոնի հիմնական ծրագիրը: Փառատոնի բացումը տեղի կունենա «Հրակառքեր» ֆիլմով, որը հիմնված է իրական պատմության վրա եւ ներկայացնում է 1924 թվականի Օլիմպիական խաղերի ընթացքում երկու մարզիկների պայքարը: Բրիտանական ֆիլմերի ինստիտուտն այն ընդգրկել է Բրիտանական լավագույն 100 ֆիլմերի շարքում: «Մոսկվա» կինոթատրոնում ցուցադրությունը կշարունակվի`, մարտի 11` «Մեծագույն սեր», մարտի 12` «Տիրանոզավր», մարտի 13` «Ջնջելով Դեյվիդի հետքերը», մարտի 14` «Չսիրվածը», մարտի 15` «Կյանքը` մեկ օրում»: Իսկ «Նաիրի» կինոթատրոնում կցուցադրվի հետեւյալ ֆիլմերը` մարտի 16` «Էրիկին որոնելով», մարտի 17` «Բաբելոնի զավակը», մարտի 18` «Բաբելոնյան հրդեհ», մարտի 19` «Սեննա»: Այս փառատոնը ներկայացնում է բրիտանական ժամանակակից կինոարվեստի լավագույն եւ հիշարժան աշխատանքները` կատակերգությունից մինչեւ փաստավավերագրական ֆիլմ: Ցուցադրություններից առաջ կներկայացվեն նաեւ կարճամետրաժ բրիտանական ֆիլմեր: Փառատոնի հյուրն է «Մեծագույն սեր» ֆիլմի ռեժիսոր Մայքլ Ուայթը: Նա իր ֆիլմը կներկայացնի մարտի 11-ին եւ վարպետության դասընթաց կանցկացնի Երեւանի Թատրոնի եւ կինոյի պետական ինստիտուտում: Փառատոնում ընդգրկված բազմաժանր ֆիլմերը ներկայացնում են պատմություններ բրիտանացիների առօրյայից, ներկայացնում համամարդկային խնդիրների նրանց ընկալումները, բացահայտում ժամանակակից աշխարհում սեփական ճակատագրի համար պայքարող մարդկանց ապրումները: Ֆիլմերը նվիրված են 2012 թվականի Օլիմպիական խաղերին, Չ.Դիքենսի երկուհարյուրամյակին եւ մարդու իրավունքներին: Այս տարի փառատոնի ֆիլմերը կներկայացվեն Երեւանում, Գյումրիում, Վանաձորում եւ Բերդում: Դիքենսը հավատում էր, որ գիտելիքի հարստացման եւ արվեստի հետ շփման արդյունքում հնարավոր է ստեղծել արդար հասարակություն: Դիքենս 2012-ի շրջանակում անցկացվող միջոցառումները նպատակ ունեն նպաստել կրթական գործընթացներին` կազմակերպելով համաժողովներ, վարպետության դասեր եւ մրցույթներ: Տարվա ընթացքում կկազմակերպվեն ավելի քան 100 միջոցառում աշխարհի 50 երկրներում: Հավելենք, որ փետրվարի 27-ից մինչեւ մարտի 1-ը «Թումո» ստեղծարար տեխնոլոգիաների կենտրոնի հետ համատեղ Բրիտանական խորհուրդը կազմակերպեց Դիքենսի ստեղծագործությունների հիման վրա նկարահանված ֆիլմերի դիտումներ եւ քննարկումներ: | 
