ԱՐՈՆՅԱՆ-ԿՐԱՄՆԻԿ ՄՐՑԱՄԱՐՏԻ ԿԱՅՔԷՋԸ ԳՈՐԾՈՒՄ Է Ինչպես հայտնի է, աշխարհի ուժեղագույն շախմատիստներից երկուսըՙ Լեւոն Արոնյանն ու Վլադիմիր Կրամնիկն ապրիլի 21-28-ը Ցյուրիխում 6 պարտիայից բաղկացած դասական շախմատի ընկերական մրցախաղ են անցկացնելու: Օրերս բացվել է այդ մրցամարտին նվիրված պաշտոնական կայքէջըՙ kramnikaronian.com, որում կլուսաբանվեն 2800-ից բարձր գործակից ունեցող 2 շախմատիստների մրցախաղերը: Մրցամարտի հանդիսավոր բացման արարողությունը կկայանա ապրիլի 20-ին, որի ժամանակ անվանի գրոսմայստերները կպատասխանեն լրագրողների հարցերին: Հաջորդ օրը տեղական ժամանակով ժամը 15-ին կտրվի մրցամարտի 1-ին պարտիայի մեկնարկը: Մրցակարգի համաձայն, եթե մրցակիցները 30-րդ քայլից առաջ հաշտություն կնքեն, ապա նրանք պարտավոր են նույն օրը շախմատասերների համար արագ շախմատի պարտիա անցկացնել, որի արդյունքը բնականաբար չի հաշվարկվի: 2-րդ պարտիայից հետո ապրիլի 23-ին մրցակիցները կհանգստանան: Եվս մեկ հանգստյան օր է նախատեսված ապրիլի 26-ին: Հիշեցնենք, որ տարիներ առաջ Արոնյանն ու Կրամնիկը Երեւանում արագ շախմատի մրցախաղ էին անցկացրել, որում 4-2 հաշվով հաղթել էր հայ շախմատիստը: | 
