ՄԱՆԿԱՎԱՐԺԱԿԱՆԻՑ ՏԱՐՀԱՆՎԵՑԻՆ ՔԻՄԻԱԿԱՆ ՊԱՅԹՅՈՒՆԱՎՏԱՆԳ ՆՅՈՒԹԵՐԸ Մանկավարժական համալսարանն արդեն երկար տարիներ գտնվում էր քիմիական պայթյունավտանգ գոտում: Համալսարանի քիմիական լաբորատորիայի նկուղում հիմնադրումից ի վեր կուտակվել էին խորհրդային տարիներից մնացած զանազան քիմիական նյութեր: Դրանց տարհանման եւ համալսարանի անվտանգության ապահովման գործում մանկավարժականին աջակցեց ՀՀ արտակարգ իրավիճակների նախարարությունը: Նախարարության աշխատանքները ղեկավարում էր բնակչության եւ տարածքային պահպանության վարչության պետ, գնդապետ Հովհաննես Եմիշյանը: Փրկարարները, պահպանելով անվտանգության բոլոր կանոնները, մի քանի ժամվա ընթացքում համալսարանի նկուղից հանեցին մեծ քանակությամբ քիմիական նյութեր: Կենսաբանության, քիմիայի եւ աշխարհագրության ֆակուլտետի դեկան, քիմիական գիտությունների թեկնածու, դոցենտ Սվետլանա Հովակիմյանը քիմիական նյութերի պահպանումը համալսարանում վտանգավոր է համարում: «Դրանց մի մասը իդենտիֆիկացված չէր, կային նաեւ ժամկետանց ու գործածությունից դուրս եկած նյութեր: Պահեստը տարիներ շարունակ տեղափոխվել է տեղից տեղ, որի հետեւանքով նյութերի մեծ մասը վնասվել էր: Այսօր այդ նյութերը գտնվում էին վթարային շենքում, ինչն ավելի էր մեծացնում վտանգը: Կարծում եմՙ այս միջոցառումը նախաձեռնվեց ժամանակին», հավելեց ֆակուլտետի դեկանը: Ի դեպ, տարհանված քիմիական նյութերը արդեն ձեռք բերված համաձայնությամբ կհանձնվեն Լ. Մնջոյանի անվան նուրբ օրգանական քիմիայի ինստիտուտ, որտեղ կենթարկվեն մշակումների եւ համապատասխան լաբորատոր ստուգումների: | 
