«ՄԻԿԱՆ» ԱՄՐԱՊՆԴԵՑ ԱՌԱՋԱՏԱՐԻ ԴԻՐՔԸ Ֆուտբոլի Հայաստանի բարձրագույն խմբի առաջնության 7-րդ տուրում ուշադրության կենտրոնում երկու առաջատարներիՙ «Միկայի» եւ «Շիրակի» մրցավեճն էր: Այս թիմերն ընթացիկ մրցաշրջանում արդեն 3-րդ անգամ էին հանդիպում: Առաջին 2 հանդիպումները կայացել էին ՀՀ գավաթի խաղարկության կիսաեզրափակիչում: Առաջին խաղումՙ Իջեւանում 1-0 հաշվով հաղթել էր «Միկան», իսկ երեւանյան մրցախաղում «Շիրակը» կամային հաղթանակ էր տոնել (2-1) ու մտնելով գավաթի եզրափակիչ, նվաճել էր պատվավոր մրցանակը: Առաջնության հանդիպումն անցավ հետաքրքրական եւ անհաշտ մրցապայքարում: Հանդիպման ելքը վճռվեց խաղավերջում: 2-րդ խաղակեսում հաջող փոխարինման դուրս եկավ «Միկայի» հարձակվող Սեմյոն Մուրադյանըՙ դառնալով հանդիպման հերոսը: Խաղավարտից 4 րոպե առաջ նա անկյունային հարվածից հետո խառը իրադրությունում բացեց հաշիվը: 4 րոպե անց Մուրադյանը կրկին գոլի հեղինակ դարձավՙ այս անգամ օգտագործելով աջ եզրից Վարդան Մովսիսյանի հիանալի փոխանցումը: Հանդիպման ելքն արդեն վճռված էր ու «Շիրակն» ավելացված ժամանակում միայն կրճատեց հաշվի տարբերությունըՙ 2-1: Գեղեցիկ գոլի հեղինակ դարձավ շիրակցի Անդրանիկ Բարիկյանըՙ հեռահար հարվածով գնդակն ուղարկելով դարպասի վերին անկյունը: Այս հաղթանակի շնորհիվ «Միկան» զգալիորեն ամրապնդեց իր առաջատրի դիրքըՙ 3 միավորով առաջ անցնելով մոտակա հետապնդողներ «Գանձասարից» եւ «Իմպուլսից»: «Գանձասարն» Աբովյանում հյուրընկալվել էր «Արարատին»: Այդ խաղում կապանցիների գործողությունները ղեկավարում էր թիմի մարզիչ Ավետիք Սարգսյանը: Ինչպես պարզվեց խաղից հետո, «Գանձասարի» գլխավոր մարզիչ Աբրահամ Խաշմանյանը հրաժարական էր տվել: Այդ փաստն իրոք անսպասելի էր: Խաշմանյանն առայժմ իր հրաժարականի պատճառների մասին ոչինչ չի հայտարարել, միայն շնորհակալություն է հայտնել ակումբի ղեկավարությանն ու ֆուտբոլիստներին համատեղ աշխատանքի համար: Առանց գլխավոր մարզչի «Գանձասարը» հաղթեց «Արարատին»: Հանդիպման ելքը վճռեց 70-րդ րոպեին «Արարատի» դարպասին նշանակված 11 մ հարվածը, որն անվրեպ իրացրեց սերբ Դեյան Վուկոմանովիչը: Դիլիջանի «Իմպուլսն» Իջեւանում ոչ-ոքի (1-1) ավարտեց հանդիպումը «Բանանցի» հետ: Դա ՀՀ առաջնություններում մրցակիցների մրցավեճում գրանցված առաջին ոչ-ոքին էր: Մինչ այդ 6 անգամ հաղթել էր «Բանանցը», 2 խաղում հաջողությունն ուղեկցել էր «Իմպուլսին»: Իջեւանում առաջինը հաջողության հասավ «Բանանցը», որը 36-րդ րոպեին Հովհաննես Համբարձումյանի հարվածից հետո բացեց հաշիվը: Սակայն ընդամենը 2 րոպե անց Հայկ Իշխանյանը վերականգնեց հավասարակշռությունը: Երկրի չեմպիոն «Ուլիսին» ոչ մի կերպ չի հաջողվում առաջնությունում առաջին հաղթանակը տոնել: «Փյունիկի» հետ մրցախաղում էլ չեմպիոնը ձեռքից բաց թողեց հաղթանակը: Առաջին խաղակեսում Արսեն Բալաբեկյանն օգտվելով «Փյունիկի» երիտասարդ դարպասապահ Արսեն Պետրոսյանի կոպիտ սխալից, տուգանային հեռահար հարվածով գնդակն ուղարկեց դարպասը: «Փյունիկին» պարտությունից փրկեց 2-րդ խաղակեսում խաղադաշտ մտած Վիլեն Այվազյանըՙ հավասարեցնելով հաշիվը: Վերջինս նախորդ խաղում էլ փոխարինման դուրս գալով, գրավել էր «Արարատի» դարպասը: Մայիսի 16-ին կանցկացվեն մեկնարկային տուրի հանդիպումները, որոնք հետաձգվել էին խաղադաշտերի անպատրաստ լինելու պատճառով: Այդ հանդիպումներով կավարտվի առաջնության առաջին շրջանը: Ստացվել է այնպես, որ 7-րդ տուրի զույգերը կրկին մրցելու են միմյանց հետ, միայն այս անգամ խաղերը կայանալու են մրցակիցների դաշտերում: Մրցաշարային աղյուսակ | | Խ | Հ | Ո | Պ | Գ | Մ | | 1. Միկա | 7 | 5 | 1 | 1 | 11-6 | 16 | | 2. Իմպուլս | 7 | 4 | 1 | 2 | 12-8 | 13 | | 3. Գանձասար | 7 | 4 | 1 | 2 | 8-3 | 13 | | 4. Շիրակ | 7 | 4 | 0 | 3 | 9-9 | 12 | | 5. Բանանց | 7 | 2 | 3 | 2 | 8-7 | 9 | | 6. Փյունիկ | 7 | 2 | 3 | 2 | 7-8 | 9 | | 7. Արարատ | 7 | 1 | 0 | 6 | 6-16 | 3 | | 8. Ուլիս | 7 | 0 | 3 | 4 | 3-7 | 3 |
Ռմբարկուները | Նորայր Գյոզալյան | «Իմպուլս» | 4 | | Դեյան Վուկոմանովիչ | «Գանձասար» | 3 | | Հովհաննես Համբարձումյան | «Բանանց» | 3 | | Աղվան Մկրտչյան | «Միկա» | 3 | | Սեմյոն Մուրադյան | «Միկա» | 3 |
| 
