Հայաստանի արդարադատության նախարարությունից տեղեկացնում են, որ Հայոց ցեղասպանության զոհերի ժառանգներին ապահովագրական հատուցումների վճարման վերաբերյալ «Գլենդեյլ Նյուզ» (Glandale News) ամերիկյան թերթի տարածած հաղորդագրության առնչությամբ նախարարությունը ստացել է ԱՄՆ դատարանում գործը ներկայացրած փաստաբան Վարդգես Եղիայանի պարզաբանումը: Ըստ այդմ` ապահովագրված հայերի ժառանգներին վճարվող հատուցումները ստանալու համար ներկայացված փաստաթղթերի եւ դիմումների քննության ընթացքում համապատասխան հանձնաժողովը ժամանակին որոշակի անճշտություններ է թույլ տվել, ուստի գործով զբաղվող ամերիկահայ փաստաբանը դիմել է ԱՄՆ դատարան: Դատարանը գործն ուսումնասիրելուց հետո հանձնարարել է կատարել վճարումների վերահաշվարկ, խոսքը վերաբերում է միայն այն դիմումներին, որոնք արդեն բավարարել էր հանձնաժողովը: Այդպիսով` մոտ 2 176 587 ԱՄՆ դոլար կբաշխվի մոտ 100 դիմումատուի միջեւ, սրանք այն դիմումատուներն են, որոնց վճարված հատուցումների հաշվարկման ժամանակ անճշտություններ են բացահայտվել նախկինում: Վ. Եղիայանը նաեւ նշել է, որ գործով չեն վերանայվելու հանձնաժողովի մերժած դիմումները:
