«18 ՏԱՐԵԿԱՆ ԱՂՋԻԿՆ ԱՐԴԵՆ ՊԱՌԱՎԱԾ Է» Հ. Հ. Եզդիական համայնքը դեմ է կառավարության որոշմանը Եզդիական համայնքում հուլիսի 12-ից հանգիստ չեն: Կառավարության որոշումը, որ աղջիկները պետք է ամուսնանան ոչ թե 17, այլ 18 տարեկանում, վրդովեցրել է նրանց: «Աշխարհի եզդիների միության» նախագահ Ազիզ Թամոյանի գնահատմամբՙ որոշումը կնպաստի եզդիների արտագաղթին: «Մեր աղջիկների ամուսնությունը սովորաբար եղել է 13, 14, 15, 16 տարեկանում: Համայնքը համաձայն է, որ աղջիկներն ամուսնանան 16 տարեկանում, այդ կերպ մենք պահպանում ենք մեր ավանդույթները», ասում է Թամոյանը: Նա պատմում է, որ 18 տարեկան աղջիկը եզդիական համայնքում արդեն համարվում է տանը մնացած: «18 տարեկան աղջկան ասում ենքՙ «պիրասա» է դարձել, այսինքնՙ պառաված է, եւ հարցնում ենք, թե ի՞նչն է պատճառը, որ վաղ տարիքում չի ամուսնացել, ուրեմն մի խնդիր ունի»: Թամոյանը հիշեցնում է, որ խորհրդային տարիներն էլ ամուսնության տարիքը սահմանված էր 18, սակայն դա եզդիական համայնքի վրա չէր տարածվում: Հետաքրքրական է, որ «Սինջար» եզդիական ազգային միավորում հասարակական կազմակերպության նախագահ Բորիս Թամոյանը չի ընդունում Ազիզ Թամոյանի տեսակետը: «Իրականությանը չի համապատասխանում արտահայտությունը, թե 18 տարեկան աղջիկն արդեն պառավ է», հայտարարել է Բորիս Թամոյանըՙ կոչ անելով Ազիզ Թամոյանին հանդես չգալ ողջ եզդի ժողովրդի անունից: Իր հերթին Ազիզ Թամոյանը որոշել էՙ եզդիները չեն համակերպվի կառավարության որոշմանը ու կդիմեն գործադիրինՙ վերանայելու: «Հայաստանի բոլոր օրենքներն ընդունում ենք, բայց սա չենք ընդունի եւ կպահանջենք, եթե ոչ ամբողջությամբ, ապա գոնե եզդիների համար փոփոխություններ կատարել», ասում է Թամոյանըՙ հավելելով, որ հակառակ դեպքում ակցիաներ կանցկացնեն: Ազիզ Թամոյանը վստահ էՙ Եվրոպան է պարտադրում նման որոշումներ: Նա նաեւ վստահ է, որ այս որոշումը կայացվում է առանց ժողովրդի համաձայնությունը հաշվի առնելու: «Ես իմ երեք աղջիկներին էլ 15, 16 տարեկանում եմ ամուսնացրել, նրանց ի՞նչ գործն է: Ինչո՞վ է նույն Եվրոպան ազգային փոքրամասնություններին օգնել, միայն թղթի վրա գրում են, թե օժանդակելու ենք դպրոցներ բացվելուն, հեռուստատեսություն կտանք, բայց ոչնչով չեն օգնում»: Թամոյանը հավելում է, որ բժիշկների մտահոգությունն էլ անհեթեթությունների շարքից է: Նա օրինակ է բերում դարերի փորձն ու իրենց համայնքի աճը: Թամոյանը շեշտում է, որ նման որոշումը ոչ միայն եզդիներին, այլ նաեւ հայերին է վնասում: Այն չի նպաստի ազգի աճին, բնակչության թվաքանակը կկրճատվի: Նրա գնահատմամբՙ ամուսնության կատարյալ տարիքը տղաների համար 17-ն է, աղջիկների համարՙ 16-ը: | 
