AZG Daily #47, 15-12-2017

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ՀԱՅՈՑ ՑԵՂԱՍՊԱՆՈՒԹՅԱՆ 100-րդ ՏԱՐԵԼԻՑ

Armenian Genocide

«ԱԶԳ» ՕՐԱԹԵՐԹԻ ՆՈՐ ՀԵՌԱԽՈՍԱՀԱՄԱՐՆԵՐՆ ԵՆ

ԱԶԴԱԳԻՐ

 RSS | WAP | FACEBOOK | PDF | PDF-Culture    
ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՄԵՐ ՄԱՍԻՆ | ՈՐՈՆՈՒՄ | ԱՐԽԻՎ | ԹԵՄԱ
ՀԵՂԻՆԱԿՆԵՐ | ԾԱՂՐԱՆԿԱՐՆԵՐ
ՀԱՅԵՐԵՆԸ ԱՓԻ ՄԵՋ` ԶՐՈՒՅՑ 85. ԽԱՆԴՈՏ ԱՄՈՒՍԻՆԸ ՎԵՐՑՐԵՑ ՄԻ ԽԱՆՁՈՂ, ԾԽԱԽՈՏ ՎԱՌԵՑ ԵՎ ՆԱԽԱՆՁՈՎ ՆԱՅԵՑ ԿՐԱԿԻ ՇՈՒՐՋԸ ԽԱՆԴԱՂԱՏԱՆՔՈՎ ԻՐԱՐ ԳԳՎՈՂ ԶՈՒՅԳԻՆ
ԲԱԺԱՆՈՐԴԱԳՐՎԵՔ «ԱԶԳ»ԻՆ
ԼՈՒՅՍ Է ՏԵՍԵԼ "ԱԶԳ-ՄՇԱԿՈՒՅԹ" ՀԱՎԵԼՎԱԾԻ ՀԵՐԹԱԿԱՆ ՀԱՄԱՐԸ
#009, 2013-02-01 > #010, 2013-02-02 > #011, 2013-02-05 > #012, 2013-02-06 > #013, 2013-02-07

«ԱԶԳ» ՕՐԱԹԵՐԹ #11, 05-02-2013



Տեղադրվել է` 2013-02-05 00:00:57 (GMT +04:00)


Ընթերցված է` 3540, Տպվել է` 124, Ուղարկվել է էլ.փոստով` 116

ԽՓԵԼ ՉԻ ԿԱՐԵԼԻ ԹՌՉԵԼ. Ո՞Վ ՃԻՇՏ ՏԵՂՈՒՄ ԿԴՆԻ «ՍՏՈՐԱԿԵՏԸ»

ՎԱՀՐԱՄ ԱԹԱՆԵՍՅԱՆ

Ինչպես ԼՂ հարցում առհասարակ, այնպես էլ Ստեփանակերտի օդանավակայանի հավանական գործարկման կապակցությամբ պաշտոնական Բաքվի վիճակը նախանձելի չէ: Բանակցություններում տեղաշարժ նույնիսկ չի ուրվագծվում, իսկ Ստեփանակերտ թռչելիք քաղաքացիական «առաջին իսկ օդանավը խորտակելու» մասին իշխող վարչախմբի հայտարարությունները միջազգային հանրության մեջ ավելի են խորացրել Ադրբեջանի` որպես ոչ քաղաքակիրթ երկրի մասին պատկերացումները:

Ստեղծված անբարենպաստ ֆոնը ցրելու փորձ երեկ արել է փոխարտգործնախարար Արազ Ազիմովը: APA գործակալությանը նա ասել է. «Չիկագոյի կոնվենցիայի համաձայն գոյություն ունեն որոշակի կանոններ, որոնք ճանաչված են Ադրբեջանի կողմից: Դրանք ենթադրում են ապօրինի թռիչքների կանխում եւ դրանց (օդանավերի) հարկադիր վայրէջք որոշակի օդանավակայանում: Ուստի ճիշտ չէ, երբ ոմանք նախապես շահարկում են, որ Ադրբեջանը կործանելու է քաղաքացիական օդանավերը»:

Մի կողմ թողնենք հանգամանքը, որ Չիկագոյի կոնվենցիան կարգավորում է փոխադարձաբար ճանաչված օդային տարածքներում քաղաքացիական թռիչքների հետ կապված հարցեր եւ չի շոշափում իրավիճակներ, ինչպիսին առկա է Ադրբեջանի եւ ԼՂՀ չկարգավորված հարաբերություններում: Դա ակներեւաբար այլ խոսակցության թեմա է: Ընդգծենք, որ Չիկագոյի կոնվենցիան ստորագրած երկրներին պարտավորեցնում է ընդհանրապես չկործանել քաղաքացիական օդանավեր եւ, իրոք, սահմանում հարկադիր վայրէջքի կամ թռիչքն ընդհատելու եւ ելման օդանավակայան վերադարձի հետ կապված հանգամանքներ:

Այսպիսով, Արազ Ազիմովը հավաստիացնում է, որ Ադրբեջանը քաղաքացիական օդանավ չի խորտակելու, այլ իրականացնելու է Չիկագոյի կոնվենցիայի` իր իսկ կողմից ճանաչված կանոնները: Այսինքն, եթե դեպի Ստեփանակերտ քաղաքացիական օդանավ թռչի, ապա Ադրբեջանը, համաձայն Չիկագոյի կոնվենցիայի, «կապ է հաստատելու օդանավի հետ եւ, բացատրելով, որ այն հայտնվել է «իր օդային տարածքում», պահանջելու է վերադառնալ ելման օդանավակայան, իսկ եթե դա տեղի չունենա, ապա ձեռնարկելու է հարկադիր վայրէջքի գործողություններ»:

Գործնականում անհնար է թե՛ մեկը, թե՛ մյուսը: Արցախյան քաղաքացիական օդանավի հետ կապ հաստատելու համար Ադրբեջանը եւ ԼՂՀ-ն պետք է փոխանակեն տեխնիկական տեղեկություններ: Այսինքն` շփման մեջ մտնեն համապատասխան գերատեսչությունների մակարդակով: Իսկ պաշտոնական Բաքուն այդպիսի հեռանկարից փախչում է ինչպես կրակից: Իսկ քաղաքացիական օդանավին հարկադիր վայրէջքի տանելու համար ադրբեջանական ռազմաօդային ուժերը «պետք է հատեն զորքերի շփման գիծը»: Մի բան, որ անգամ երեւակայությունից է դուրս:

Ազիմովը նաեւ անդրադարձել է խնդրի մարդասիրական կողմին: Նրա կարծիքով, ԼՂՀ-ում «ապրում է մոտավորապես 130 000 հայ, որոնց կարիքների բավարարման համար բավարար է Լաչինի միջանցքի օգտագործումը, որտեղով օրական առնվազն 70 բեռնամեքենա է երթեւեկում: Ուստի մարդասիրական նպատակներով օդային տարածք բացելու հարկ չկա»: Ադրբեջանի փոխարտգործնախարարը, սակայն, իր «բարձրության» վրա չէր լինի, եթե երկու հիմար նկատառում եւս չաներ: Մի դեպքում նա կարծում է, որ «օդանավակայանի գործարկումը կլինի անարգանք Խոջալուում զոհվածների հիշատակի հանդեպ»: Սա ակնհայտ շահարկում է: Քանի որ նախ խոջալուցիները զոհվել են օդանավակայանից առնվազն մեկուկես տասնյակ կմ հեռավորության վրա` Աղդամ քաղաքի մոտ, ճշգրտված չէ` ո՞ւմ կողմից (ստույգ տվյալներով` ադրբեջանական գրոհայինների), երկրորդ, եթե առաջնորդվենք զգայական չափանիշներով, ապա Բաքվի օդանավակայանը պետք է փակել անհապաղ, որովհետեւ 1990 թ. հունվարյան վայրագությունների օրերին հազարավոր հայեր այնտեղ ենթարկվել են անլուր անարգանքի եւ նվաստացումների, ինչի համար Ադրբեջանը դեռեւս քաղաքակիրթ աշխարհից ներողություն չի խնդրել:

Ազիմովի երկրորդ հիմարությունը նույնպես ցցուն է. նա կարծում է, որ «օդանավակայանը փորձում են գործարկել այլ նպատակներով, որպեսզի Ղարաբաղ բերվի ռազմական տեխնիկա...»: Թե քաղաքացիական օդանավն ինչպե՞ս կարող է «ռազմական տեխնիկա տեղափոխել»` այլ հարց է: Ազիմովի խոսքի անտրամաբանականությունն այն է, որ իր իսկ ասելով` «Լաչինի միջանցքով օրական 70 բեռնամեքենա է երթեւեկում», եւ ցանկության դեպքում դրանք կարող են նաեւ ռազմական բեռներ փոխադրել:

Խնդրին երեկ անդրադարձել է նաեւ Իլհամ Ալիեւին առընթեր Ռազմավարական հետազոտությունների կենտրոնը: Խոսելով դարձյալ քաղաքացիական օդանավ խորտակելու «իրավունքից», այդ հաստատության փորձագետը ստիպված խոստովանել է, որ այդ դեպքում «ոչ ոք չի հիշի Չիկագոյի կոնվենցիայի մասին»: Այսինքն` օդանավ խորտակելու դեպքում Ադրբեջանը միջազգայնորեն կդատապարտվի: Այդ դեպքում ո՞րն է «ելքը»: Ադրբեջանցի փորձագետն առաջ է քաշել «ուղղակի օդանավակայանին հարվածելու սցենարը»: Ինչպես ժողովուրդն է ասում` «աչքից էլ ազատվել, աչքացավից էլ»: Բայց չէ՞ որ դա հավասարազոր է ռազմական գործողությունների վերսկսման: Անկասկած է, որ եթե Ադրբեջանը թիրախ դարձնի Ստեփանակերտի օդանավակայանը, ապա դրան կհետեւի ԼՂՀ առնվազն համարժեք պատասխանը: Այդ դեպքում էլ Ադրբեջանը միջազգային քննադատության կենթարկվի` դրանից բխող հետեւանքներով:

Ստեփանակերտի օդանավակայանի գործարկման հարցում, այսպիսով, պաշտոնական Բաքվի վերաբերմունքը կարելի է անվանել «խփել չի կարելի թռչել» անորոշությամբ: Ո՞վ ճիշտ տեղում կդնի «ստորակետը» եւ կսահմանի` «խփել չի՛ կարելի, թռչե՛լ»: Միջազգային հանրությո՞ւնը` ի դեմս ԵԱՀԿ ՄԽ համանախագահ երկրների, թե՞ հայկական կողմը: Գուցե` ադրբեջանական իշխող վերնախավի բանականությո՞ւնը: Ակնհայտ է միայն, որ այդ հարցում Ադրբեջանի ցուցադրած «սկզբունքայնությունը» հիմնականում քարոզչա-դիվանագիտական բնույթ ունի:

Հ. Գ. Չիկագոյի կոնվենցիայի ո՞ր հոդվածի «հիման վրա է» Ադրբեջանը Թուրքիայով միջնորդավորված թռիչքներ իրականացնում դեպի միջազգայնորեն չճանաչված «Հյուսիսային Կիպրոսի թուրքական հանրապետություն»: Եթե Արազ Ազիմովը պատասխան գտնի այս հարցին, ապա նրա հետ կարելի է խոսել Ստեփանակերտի օդանավակայանի գործարկման «ոչ օրինականության» թեմայով:

 
 

«ԱԶԳ» ՕՐԱԹԵՐԹ #11, 05-02-2013


© AZG Daily & MV, 2009, 2011, 2012, 2013 ver. 1.4
ARMINCO Global Telecommunications Геноцид армян Analitika.at.ua.