AZG Daily #38, 13-10-2017

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ՀԱՅՈՑ ՑԵՂԱՍՊԱՆՈՒԹՅԱՆ 100-րդ ՏԱՐԵԼԻՑ

Armenian Genocide

«ԱԶԳ» ՕՐԱԹԵՐԹԻ ՆՈՐ ՀԵՌԱԽՈՍԱՀԱՄԱՐՆԵՐՆ ԵՆ

ԱԶԴԱԳԻՐ

 RSS | WAP | FACEBOOK | PDF | PDF-Culture    
ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՄԵՐ ՄԱՍԻՆ | ՈՐՈՆՈՒՄ | ԱՐԽԻՎ | ԹԵՄԱ
ՀԵՂԻՆԱԿՆԵՐ | ԾԱՂՐԱՆԿԱՐՆԵՐ
ՀԱՅԵՐԵՆԸ ԱՓԻ ՄԵՋ` ԶՐՈՒՅՑ 41. ՏԱՎԱՐ
ԲԱԺԱՆՈՐԴԱԳՐՎԵՔ «ԱԶԳ»ԻՆ
ԼՈՒՅՍ Է ՏԵՍԵԼ "ԱԶԳ-ՄՇԱԿՈՒՅԹ" ՀԱՎԵԼՎԱԾԻ ՀԵՐԹԱԿԱՆ ՀԱՄԱՐԸ
#003, 2017-01-27 > #004, 2017-02-03 > #005, 2017-02-10 > #006, 2017-02-17 > #007, 2017-02-24

«ԱԶԳ» ՕՐԱԹԵՐԹ #5, 10-02-2017



ՕՐԱԿԱՐԳ

Տեղադրվել է` 2017-02-09 23:21:54 (GMT +04:00)


Ընթերցված է` 4581, Տպվել է` 481, Ուղարկվել է էլ.փոստով` 0

ԿՈՒՄԱՅՐԻ ՊԱՏՄԱԿԱՆ ԿԵՆՏՐՈՆԻ ԾՐԱԳԻՐԸ ԻՐԱՎԻՃԱԿ ԿՓՈԽԻ՞ ԳՅՈՒՄՐԻՈՒՄ

ԳԵՂԱՄ ՄԿՐՏՉՅԱՆ, Գյումրի

Եվ ինչու տեղի լրագրողները զայրացրին քաղաք այցելած վարչապետին

Վարչապետ Կարեն Կարապետյանի ձեռնարկած մարզային ակտիվ այցելությունների եւ տեղական խնդիրների ու զարգացման հեռանկարների վերաբերյալ կազմակերպվող քննարկումների շարքում, ինչպես եւ պետք էր սպասել, նկատելի տեղ է տրվել Շիրակին, Գյումրուն: Դա թերեւս կարելի է պայմանավորել ինչպես այստեղ չլուծված խնդիրների առանձնահատկություններով, այնպես էլ հանրապետության համար երկրի երկրորդ մեծ քաղաքի դերի կարեւորության ըմբռնմամբ:

Դեռ դեկտեմբերի 7-ինՙ երկրաշարժի զոհերի հիշատակի օրը, աշխատանքային այցով լինելովի մարզի Ախուրյան բնակավայրում եւ Գյումրի քաղաքում, կառավարության ղեկավարն այստեղ նաեւ տարբեր հանդիպումներ ունեցավ, ապա խորհրդակցություն անցկացրեց Շիրակի մարզպետի ու համայնքների ղեկավարների հետՙ առաջարկելով առկա խնդիրների լուծմանը եւ տեղերում կյանքի որակը փոխելուն ուղղված կոնկրետ բիզնես ծրագրեր ներկայացնել: Կարեն Կարապետյանը մասնավորապես նշեց Գյումրուՙ իր գնահատմամբ ֆենոմենալ, «ֆանտաստիկ» հնարավորությունները զբոսաշրջության զարգացման առումով: Այնուհետեւ հունվարի 13-ին վարչապետի մոտ քննարկվել են Շիրակի մարզից ստացվածՙ գյուղատնտեսության, անվտանգության համակարգերի, ծառայությունների մատուցման ու զբոսաշրջության ոլորտներում ներդրումային ծրագրերի փաթեթները, դրա հաջորդ օրըՙ Գյումրու պատմամշակութային արժեքների վերականգնման ծրագիր: Նույն ամսի 21-ին քաղաքի զարգացմանն ուղղված համագործակցության հարցեր են քննարկվել Իտալիայի պատվո հյուպատոս Անտոնիո Մոնտալտոյի հետ, իսկ 26-ին վարչապետն ընդունել է Գյումրիում գործունեություն ծավալող տնտեսվարողներին, լսել գործարար միջավայրի բարելավման հետ կապված նրանց խնդիրներն ու առաջարկությունները:

Եվ ահա, փետրվարի 3-ին գործադիրի ղեկավարը կրկին Գյումրիում էր, այս անգամՙ արդեն առաջին գործնական քայլերի հարցով: Դրանցից մեկը պրն Կարապետյանի այցելած «Շիրակ» օդանավակայանի հնարավորությունների արդյունավետ օգտագործումն է եւ այդ նպատակով «Արմենիա միջազգային օդանավակայաններ» ընկերության իրականացնելիք շուրջ 10 մլն դոլարի հայտարարված ներդրումը: Իսկ գլխավորը քաղաքի «Կումայրի» պատմական կենտրոնի մի հատվածի զարգացման նախագիծն էր, որի շնորհանդեսը տեղի ունեցավ Գյումրու տեխնոլոգիական կենտրոնումՙ հնարավոր ներդրողների, շահագրգիռ գերատեսչությունների ու կազմակերպությունների ներկայացուցիչների մասնակցությամբ: Ինչպես ներկայացվեց, ՀՀ կենտրոնական բանկի եւ «Հույս Գյումրիի շենացման» հիմնադրամի մշակած նախագծով նախատեսվում է պետություն-մասնավոր համագործակցությամբ իրականացնել քաղաքի Շիրազի եւ Ռուսթավելու փողոցների պատմամշակութային արժեքների վերականգնման, ենթակառուցվածքների զարգացման ծրագիր, որը հնարավորություն պետք է տա խթանել Գյումրիում տնտեսությունը եւ զբոսաշրջությունը: Այդ նպատակով քաղաքի պատմական կենտրոնում ստեղծվելու են արվեստների, արհեստների, ժամանցի կենտրոններ, իրականացվելու են տարբեր բիզնես ծրագրեր եւ ստեղծվելու են զբոսաշրջիկների համար հրապուրիչ պայմաններ: Այդ ամենի համար հատկացվելու է 7,7 հազար քմ տարածք: Ծրագիրը կյանքի կոչելու նպատակով ստեղծվելու է հատուկ հիմնադրամ:

«Մշակվել է հետաքրքիր եւ տրամաբանական ներդրումային ծրագիր, որը կբերի տնտեսական էֆեկտ եւ կստեղծի նոր աշխատատեղեր: Եվ ամենակարեւորը, այս ծրագիրը Գյումրիում տրամադրություն փոխող ծրագիր է»,- շնորհանդեսի ժամանակ իր խոսքում մասնավորապես ասաց վարչապետը: Նա նաեւ նշեց, որ պետությունն իր բոլոր լծակներով, բյուջետային ու դրամաշնորհային հնարավորություններով լինելու է այս հիմնադրամի կողքին:

Շնորհանդեսից հետո շիրակցի լրագրողները կառավարության ղեկավարին հարց տվեցին, թե որքանո՞վ է այս ամենը իրատեսական Գյումրիում եւ ի՞նչ երաշխիք կա, որ այս նախագիծը կգործի: Հարցն ակնհայտորեն նյարդայնացրեց վարչապետին, որը որոշ լրացուցիչ փաստարկներից հետո ասաց. «Մի քիչ եկեք պրագմատիկ լինենք, մի քիչ էլ ձեր տրամադրությունները փոխեք: Մի քիչ ժպտացեք, այ մարդ, ինչքա՞ն ջղային եք սաղդ նայում»:

Գյումրիում ապրողների, այդ թվում եւ այստեղ գործող լրագրողների «ջղային նայելու» եւ արդեն միայն կատարված գործին հավատալու պատճառը այսքան տարիների ընթացքում քաղաքի գլխով անցած-գնացած բազում հայտարարված ու չիրագործված (բացի ընդհատումներով կատարված եւ այդպես էլ չավարտված շինարարությունից) կամ քաղաքի ընդհանուր ոչ ոգեւորիչ պատկերում էական ոչինչ չփոխած այլ տարատեսակ ծրագրերը, որոշումներն ու խոստումներն են: Այդ թվում եւ այնպիսիք, որոնք, ինչպես եւ այժմ, համընկել են համապետական որեւէ նախընտրական շրջանի հետ: Դրանցում անձամբ Կարեն Կարապետյանի մեղքն, իհարկե, չկա:

Ի դեպ, վարչապետի ընտանիքը նշված ծրագրի համար ստեղծվող հիմնադրամում կատարելու է իր ներդրումը 500 հազար դոլարի չափով: Ներդրումային փաթեթն այս պահին 10 մլն դոլար է:

 
 

«ԱԶԳ» ՕՐԱԹԵՐԹ #5, 10-02-2017


© AZG Daily & MV, 2009, 2011, 2012, 2013 ver. 1.4
ARMINCO Global Telecommunications Геноцид армян Analitika.at.ua.