AZG Daily #38, 13-10-2017

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ՀԱՅՈՑ ՑԵՂԱՍՊԱՆՈՒԹՅԱՆ 100-րդ ՏԱՐԵԼԻՑ

Armenian Genocide

«ԱԶԳ» ՕՐԱԹԵՐԹԻ ՆՈՐ ՀԵՌԱԽՈՍԱՀԱՄԱՐՆԵՐՆ ԵՆ

ԱԶԴԱԳԻՐ

 RSS | WAP | FACEBOOK | PDF | PDF-Culture    
ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՄԵՐ ՄԱՍԻՆ | ՈՐՈՆՈՒՄ | ԱՐԽԻՎ | ԹԵՄԱ
ՀԵՂԻՆԱԿՆԵՐ | ԾԱՂՐԱՆԿԱՐՆԵՐ
ՀԱՅԵՐԵՆԸ ԱՓԻ ՄԵՋ` ԶՐՈՒՅՑ 118. ՀՆՉՅՈՒՆԱԿԱՆ ՀԵՏԱՔՐՔՐԱՇԱՐԺ ՁԵՎԱՓՈԽՈՒԹՅՈՒՆՆԵՐ
ԲԱԺԱՆՈՐԴԱԳՐՎԵՔ «ԱԶԳ»ԻՆ
ԼՈՒՅՍ Է ՏԵՍԵԼ "ԱԶԳ-ՄՇԱԿՈՒՅԹ" ՀԱՎԵԼՎԱԾԻ ՀԵՐԹԱԿԱՆ ՀԱՄԱՐԸ
#003, 2017-01-27 > #004, 2017-02-03 > #005, 2017-02-10 > #006, 2017-02-17 > #007, 2017-02-24

ԱԶԳ ՕՐԱԹԵՐԹ - ՄՇԱԿՈՒՅԹ #5, 10-02-2017



Տեղադրվել է` 2017-02-09 21:36:04 (GMT +04:00)


Ընթերցված է` 1814, Տպվել է` 18, Ուղարկվել է էլ.փոստով` 0

ՀԱԼԷՊԻ «ԱԴԱՄԵԱՆ» ԹԱՏԵՐԱԽՈՒՄԲԸ

Յակոբ ՄԻՔԱՅԷԼԵԱՆ

Հալէպի մէջ գործող «Պետրոս Ադամեան» թատերախումբի հիմնադրութեան 55 տարիները ամրագրուեցան սփիւռքահայ թատրոնի պատմութեան էջերուն որպէս ամենատոկուն ու հետեւողական թատերախումբը հայկական սփիւռքի մէջ:

Անոր 55 տարիներուն վերջին 5 տարիները եղան հերոսական սխրագործութեանց տարիներ, երբ թատերախումբը անտեղիտալի յանձնառութեամբ ու ծափահարելի քաջութեամբ շարունակեց իր գործունէութիւնը սուրիական պատերազմի Հալէպի բաժին ինկած դժոխային օրերուն իսկ:

ՀԲԸՄ-ի Հայ Երիտասարդաց Ընկերակցութեան «Պետրոս Ադամեան» թատերախումբը հիմնուած է 1961-ին եւ առ այսօր անընդմիջաբար կը գործէ: Եթէ խօսինք թիւերու լեզուով, ապա ապշեցուցիչ հաստատումներ պիտի ընենք սիրողական թատերախումբի մը մասին, որուն համար շատեր ըսին, որ ոչինչ կը զիջի արհեստավարժ-փրոֆեսիոնալ որեւէ խումբի:

Անցնող տարիներու ընթացքին «Ադամեան» թատերախումբը բեմ բարձրացուցած է 90 թատերգութիւններ, ընդհանուր ներկայացումներուն քանակը հասցնելով 578-ի: Որեւէ շրջանի, թատերախումբին կազմը 20-25 հոգիէն պակաս չէ եղած, հիները որպէս «թթխմոր» մնացեր են եւ իրենց շուրջ նորեկներ եկած են, ոմանք մնացեր են, ուրիշներ հեռացեր: 55 տարիներու ընթացքին թատերախումբին մաս կազմած են 354 դերակատար-դերակատարուհիներ:

«Պ. Ադամեան» թատերախումբի իւրայատկութիւններէն մէկն ալ եղած է իր ներկայացուցած մանկա-պատանեկան թատերգութիւնները, որոնց թիւը հասած է 19-ի եւ որոնց ներկայացման հանդիսատես եղած է հալեպահայ վարժարաններու աշակերտութիւնը: Անցեալ դարու 70-ականներու սկիզբը, երբ ներկայացուեցաւ առաջին մանկա-պատանեկան թատերգութիւնըՙ «Մեծ անտառի զաւակները», տեղական արաբական թերթ մը գրեց, որ Սուրիոյ մէջ առաջին մանկական պիէսը «Ադամեանը» ներկայացուց:

Մանուկ հանդիսատեսի համար թատերական ներկայացում իրականացնելը, ի գին նիւթական եւ այլ դժուարութիւններու, թատերախումբի կարեւոր առաքելութիւններէն մէկն էրՙ պատրաստել ապագայի հանդիսատես եւ թատերական գործիչ. եւ հպարտօրէն յայտարարելու ենք, որ այդ օրերու անչափահաս հանդիսատեսներէն շատեր այսօր «Ադամեանի» դերակատարներ դարձած են:

Բացի Գրիգոր Քելեշեանէն,- որ հայրենիքի մէջ մասնագիտացած առաջին բեմադրիչն էր, որ ղեկավարեց թատերախումբը ամբողջ 15 տարի,- «Ադամեանի» հետ գործակցած են 14 տարբեր բեմադրիչներ, հինգը Հայաստանէն հրաւիրուած, որոնց մէջէն կ՛առանձնանայ փրոֆ. Նիկոլայ Ծատուրեանը, որ «Ադամեան» թատերախումբին հետ աշխատած է ամբողջ 17 տարի:

«Ադամեանի» խաղացանկը եղած է հարուստ թէ՛ հայ եւ թէ համաշխարհային թատերագիրներու գործերով, Պարոնեանէն մինչեւ Լեւոն Շանթ, Ու. Սարոյեան Վարդգէս Պետրոսեան, ժիրայր Անանեան, Վաչէ Ատրունի եւ այլ, Մոլիէրէն մինչեւ Իբսէն, Էտուարտօ Տը Ֆիլիփօ, Թեննըսի Ուիլիըմզ եւ շատ ուրիշներ: Թատերախումբին հետ որպէս դերասաններ գործակցած են Սօս Սարգսեան եւ Վարդուհի Վարդերեսեան:

Հիւրախաղերով «Ադամեան» թատերախումբը, բացի Սուրիոյ զանազան հայաշատ քաղաքներէն, ելոյթներ ունեցած է Լիբանանի, Պուլկարիոյ եւ Հայաստանի մէջ, արժանանալով բոլորին անկեղծ գնահատանքին:

2011-ին Թատերախումբը նշեց իր հիմնադրութեան 50-ամեակը յատուկ հանդիսութեամբ եւ շաբաթ մը տեւող այլ միջոցառումներով, որոնց իրենց մասնակցութիւնը բերին բեմադրիչ Ն. Ծատուրեանն ու թատերագէտ Լեւոն Մութաֆեանը:

Այս բոլորը հովանաւորող նուիրեալ վարչական պատասխանատուներ կան, որոնք Ընկերակցութեան ղեկավարներուն հետ նիւթապէս եւ բարոյապէս սատար կը կանգնին թատերախումբին, որ իր առաքելութիւնը շարունակուի, մասնաւորաբար պատերազմի դժնդակ օրերուն, ռումբերու տարափին տակ, ելեկտրական հոսանքի, ջուրի եւ վարելանիւթի բացակայութեան:

Մարդիկ կը զարմանան այս անձնազոհ տղոց ու աղջիկներուն քաջութեան վրայ, յատկապէս որ բոլորը, առանց բացառութեան, կ՛աշխատին անվճար, առանց դոյզն ակնկալութեան, պարզապէս որպէսզի գաղութի մնացորդացին հոգեկան սնունդ ջամբեն, վանեն կեանքի գորշութիւնը եւ թատրոնի ու մշակոյթի ճամբով պահպանեն տակաւ նոսրացող, բայց համբերող ու պողպատեայ տոկունութիւն ունեցող Հալէպի Մայր գաղութը:

Այսօր, «Ադամեանի» դերակատարներէն տասնեակ մը բնակութիւն հաստատած են Երեւանի մէջ եւ առիթի կը սպասեն, որպէսզի ներգրաւուին իրենց նախասիրած արուեստին մէջ, մասնակցելով տեղական թատերական շարժումին, նոյնիսկ փափաք ունին իրենք կազմակերպուելու եւ թատերգութիւն մը ներկայացնելու հայրենի բեմի վրայ:

 
 

ԱԶԳ ՕՐԱԹԵՐԹ - ՄՇԱԿՈՒՅԹ #5, 10-02-2017


© AZG Daily & MV, 2009, 2011, 2012, 2013 ver. 1.4
ARMINCO Global Telecommunications Геноцид армян Analitika.at.ua.