RSS | FACEBOOK | NLA
ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՈՐՈՆՈՒՄ | ԱՐԽԻՎ | ԹԵՄԱ | ՀԵՂԻՆԱԿՆԵՐ
#016, 2013-02-12 > #017, 2013-02-13 > #018, 2013-02-14 > #019, 2013-02-15 > #020, 2013-02-16

«ԱԶԳ» ՕՐԱԹԵՐԹ #18, 14-02-2013



ԶՈՐԱԿՑՈՒԹՅՈՒՆ

Տեղադրվել է` 2013-02-13 23:46:30 (GMT +04:00)


Ընթերցված է` 1199, Տպվել է` 63, Ուղարկվել է էլ.փոստով` 73

ՌԱԿ ՔԱԼԻՖՈՐՆԻԱՅԻ ՇՐՋԱՆԱԿԸ ԿԸ ՎՍՏԱՀԻ ՍԵՐԺ ՍԱՐԳԻՍԵԱՆԻՆ

Յ. Մ.

Երկուշաբթի, փետրուար 11-ի երեկոյեան Ռամկավար Ազատական կուսակցութեան Արեւմտեան Ամերիկայի Շրջանային վարչութիւնը մասնաւոր յայտագրով ձեռնարկ կազմակերպած էր ի նպաստ եւ ի զօրակցութիւն ՀՀ ներկայ նախագահ, նախագահական թեկնածու Սերժ Սարգիսեանի:

Միացեալ Նահանգներու Քալիֆորնիոյ նահանգի Ալթատենա քաղաքին մէջ գտնուող կուսակցութեանս «Պեշկեօթիւրեան» կեդրոնին մէջ հաւաքուած էին Արեւմտեան Ամերիկայի Ռամկավար Ազատական կուսակցութեան շրջանակի բոլոր ակումբները իրենց ներկայացուցիչներով եւ անդամակազմերով, քոյր կազմակերպութիւններու ղեկավարներ, բարեկամներ եւ համակիրներ, ներկայ գտնուելու համար այս եզակի միջոցառման, որ անգամ մը եւս կը շեշտէր, թէ քուէարկութեան իրաւունք չունենալով հանդերձ, սփիւռքահայութիւնը չի կրնար անտարբեր եւ անմասն մնալ Մայր հայրենիքի մէջ յառաջիկայ երկուշաբթի օրը, փետրուարի 18-ին, տեղի ունենալիք կարեւոր իրադարձութենէն:

Ռամկավար Ազատական կուսակցութիւնը, իր աշխարհատարած մասնաճիւղերով, նման միջոցառումներ արդէն կազմակերպած է զանազան երկիրներու մէջ, հրահանգելով եւ կոչ ուղղելով համայն իր անդամակցութեանՙ սատար հանդիսանալու եւ աջակցելու ՀՀ ներկայ նախագահին, անոր վերընտրութեան պայքարին, իրենց բարոյական աջակցութիւնը տալով անոր:

ՌԱԿուսակցութիւնը համոզուած ըլլալով անցեալ 5 տարիներուն մայր հայրենիքի մէջ տեղի ունեցած բարեկարգումներու զարգացումին, հայրենիքի ներքին եւ արտաքին քաղաքական կայունութեամբ պայմանաւորուած տնտեսական ու կենսական բարեփոխութիւններուն, զօրավիգ կը կանգնի Սերժ Սարգիսեանին յաջորդ 5 տարիներուն հայրենի պետութեան ղեկը կրկին ստանձնելու:

Ձեռնարկին ներկայ էին տեղական քաղաքական դէմքեր, Կլէնտէյլ, Փասատինա եւ Լոս Անճելըս քաղաքներու ներկայացուցիչներ, եւ հոծ բազմութիւն մը, որոնք եկած էին իրենց հարգանքի ու հաւատարմութեան հաւաստիքը ներկայացնելու կուսակցութեանս որոշումին:

Օրուան հանդիսավարՙ ՌԱԿ Արեւմտեան Ամերիկայի Շրջանային վարչութեան ատենադպիր ընկեր Յակոբ Մարտիրոսեան հանդիսութիւնը բացաւ կուսակցութեանս ողջոյնով եւ Միացեալ Նահանգներու եւ Հայաստանի զոյգ օրհներգներով, որմէ ետք ցուցադրուեցաւ « Դէպի ապահով Հայաստան» տեսաերիզը:

Բեմ հրաւիրուեցաւ գաղութիս հանրածանօթ հասարակական գործիչ, տնօրէն, ուսուցիչ եւ «Նոր օր» շաբաթաթերթի աշխատակից ընկեր Խաչիկ Ճանոյեան, ներկայացնելու համար ՌԱԿուսակցութեան խօսքը այս առիթով: Ընկեր Ճանոյեան անդրադարձաւ հայրենիքի մէջ ներքին եւ արտաքին ճակատներու վրայ վերջին տարիներուն կատարուած նուաճումներուն ու զարգացումներուն, շեշտելով մանաւանդ զգալի բարեկարգումները, ժողովրդավարական, տնտեսական եւ քաղաքական մակարդակներու վրայ, եւ շեշտելով հայրենիքի եւ սփիւռքի մէջ կուսակցութեանս նախանձախնդիր կեցուածքն ու դերը համահայկական հարցերու մէջ:

Երկրորդ տեսաերիզիՙ «Աւելի լաւ Հայաստան»-ի ցուցադրումէն ետք հրաւիրուեցաւ ՀԲԸՄիութեան Կեդրոնական վարչութեան անդամ եւ Իրանահայ Միութեան ղեկավար, «Հայաստան» համահայկական հիմնադրամի նախկին տնօրէն Թոմիկ Ալեքսանեանը , որպէսզի ներկայացնէ իր սրտի խօսքը եւ շատ մօտիկ անցեալին հայրենիք կատարած իր այցելութեան տպաւորութիւնները եւ ականատեսի վկայութիւնները: Պրն Ալեքսանեան նեցուկ կանգնելով նախագահ Սերժ Սարգիսեան վերընտրութեան, յիշեցում եւ համեմատութիւն կատարեց Հայրենիքի անկախութեան առաջին տարիներու ու անցեալի 5 տարիներուն մէջ կատարուած բարեփոխումներու ու զարգացումներու միջեւ, քաջալերելով ներկաները զօրավիգ կանգնելու նախագահ Սերժ Սարգիսեանին:

Երրորդ տեսաերիզիՙ «Հայրենիքը կարող է հանգիստ քնել» ցուցադրութենէն ետք բեմ հրաւիրուեցաւ ազգային բարերար, գործարար պրն Վահէ Կարապետեանը: Հոգուով-սրտով խանդավառ պրն. Կարապետեան խորին շնորհակալութիւն յայտնեց Ռամկավար Ազատական կուսակցութեան այս միջոցառման կազմակերպման համար, համամիտ գտնուելով կուսակցութեանս ՀՀ նախագահական ընտրութիւններու թեկնածուներէն ամենակարողին աջակցելու որոշումին: Պրն Կարապետեան օրինակներ մէջբերեց հայրենիքի բարեկարգումներէն, որոնց մէջ ինք անձամբ ձեռնամուխ եղած է նիւթապէս եւ բարոյապէս օգտակար հանդիսանալ Հայաստանի Հանրապետութեան եւ Արցախի վերակառուցման գործին: Ան շեշտեց աշխատանքային կարելիութիւնները հայրենիքին մէջ բոլոր անոնց համար, որոնք կը փափաքին աշխատիլ, եւ յորդոր ուղղեց բոլոր անոնց, որոնք բաժակին կէսը պարապ կը տեսնեն, որպէսզի տեսնեն նաեւ բաժակին միւս կէսը եւ աւելին:

Չորրորդ տեսաերիզըՙ «Քարը քարին դնելով», եկաւ ամրապնդելու պրն. Վահէ Կարապետեանին խօսքը, հայրենիքի կերտումի, հայ ժողովուրդին միասնութեան եւ հայրենիքի հզօրացումի սրտագին կոչերը:

Միջոցառման աւարտին տեղի ունեցաւ ճոխ հիւրասիրութիւն, եւ հանդիսութիւնը փակուեցաւ ընկերային մտերմիկ մթնոլորտի մէջ, ողջունելով նախագահ Սերժ Սարգիսեանի վերընտրութիւնը 5 տարուան համար եւս:

 
 

«ԱԶԳ» ՕՐԱԹԵՐԹ #18, 14-02-2013

Հայկական էկեկտրոնային գրքերի և աուդիոգրքերի ամենամեծ թվային գրադարան

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ԱԶԴԱԳԻՐ

ՄԵԿ ՏԱՐԻ ԱՌԱՋ