RSS | FACEBOOK | NLA
ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՈՐՈՆՈՒՄ | ԱՐԽԻՎ | ԹԵՄԱ | ՀԵՂԻՆԱԿՆԵՐ

#016, 2013-02-12 > #017, 2013-02-13 > #018, 2013-02-14 > #019, 2013-02-15 > #020, 2013-02-16

«ԱԶԳ» ՕՐԱԹԵՐԹ #18, 14-02-2013



Անցուդարձ

Տեղադրվել է` 2013-02-13 23:46:30 (GMT +04:00)


Ընթերցված է` 2328, Տպվել է` 95, Ուղարկվել է էլ.փոստով` 90

ՆԱԽԱԳԱՀԻ ԹԵԿՆԱԾՈՒ ԱՐՄԱՆ ՄԵԼԻՔՅԱՆ. ՆԱԽ ԿԱՅՑԵԼԵՄ ՄԱՏԵՆԱԴԱՐԱՆ, ՀԵՏՈ ԿՈՌՈՒՊՑԻՈՆ ՀԱՄԱԿԱՐԳԸ ԿՎԵՐԱՑՆԵՄ

Զրուցեց ՀԱՍՄԻԿ ՀԱՐՈՒԹՅՈՒՆՅԱՆԸ

- Պարոն Մելիքյան, ընտրություններին մնացել է մի քանի օր: Ինչպե՞ս է ընթանում քարոզարշավը:

- Իրավիճակը չի փոխվել, ընտրությունները կեղծվելու են, եւ այդ առումով ակտիվ քարոզարշավ անողները ստում են` ասելով, որ Հայաստանի համար կբերեն պայծառ ապագա: Հաշվի առնելով ձեւավորված տխուր ավանդույթըՙ ընտրությունները պետք է կեղծվեն, եւ դա կանեն երկրից դուրս գտնվող քաղաքացիների ձայներով, իսկ այդպիսիք մոտավորապես մեկ միլիոն են: Դրա հետ կապված առաջարկությունն արել ենք. եթե ԿԸՀ պատասխանը մերժողական լինի, նշանակում էՙ իշխանությունները հակված են կեղծելու ընտրությունները, այդ պարագայում մենք մեր քայլերը կանխավ կանենք:

- Որո՞նք կլինեն այդ քայլերը:

- Դրա մասին լրացուցիչ կհայտարարենք մի քանի օրից:

- Պարոն Մելիքյան, մինչ առաջադրումը մտավախություն չունեի՞ք, որ իշխանությունները կկեղծեն ընտրությունները:

- Մինչ առաջադրումն էլ ակնհայտ էր, բայց նաեւ ակնհայտ է, որ մի օր այս ամենի վերջը գալու է: Քարոզարշավի առաջին օրվանից ամեն ինչ արեցինք, որ հետո մեզ որեւէ մեկը չասի, թեՙ գիտեիք ընտրությունները կեղծվելու են, բայց դրա դեմ ոչինչ չարեցիք: Այդ տեսանկյունից ես ու իմ թիմը քաղաքացիական պարտքը կատարեցինք Հայաստանի հանդեպ` պահանջելով վերացնել այս տխմար ավանդույթը:

- ԿԸՀ-ից ասում են, որ Ձեր դիմումներն իրենց չպետք է ուղղել: Իրենք չեն այն պատասխանատու մարմինը, որը պետք է լուծի այդ հարցը:

- Օրենքի համաձայնՙ իրենք այն միակ ու մշտապես գործող մարմինն են, պարտավոր են կազմակերպել եւ ապահովագրել ընտրությունների օրինականությունը: Ներկայացրել ենք, թե ինչպես են նախկինում ընտրությունները կեղծվել, առաջարկում ենք, որ ԿԸՀ-ն իր լիազորությունների շրջանակներում կանխի այդ ամենը:

- Արդեն երկրորդ անգամ եք առաջադրվում նախագահական ընտրություններին: Նախորդ անգամ շատ քիչ ձայն էիք ստացել, այս անգամ ի՞նչ ակնկալիքով եք առաջադրվում:

- Տոկոսների մասին խոսել կեղծված ընտրությունների համատեքստում անհեթեթություն է: Եթե իշխանությունները ինչ տոկոս ցանկանան, այնքան կգրենՙ նշանակում է, որ չկա ընտրությունների արդյունքների իրական պատկերը: Նախորդ ընտրություններին միայն մեկ տեղամասում ստուգում կատարելու ժամանակ իմ օգտին 200 ձայն ավելացավ:

- Խոսենք Ձեր նախընտրական ծրագրից:

- Ծրագիրն ունի մեկ առանձնահատկություն, քանի որ այն վերաբերում է համակարգային փոփոխություններին, 5 տարվա ընթացքում որակական առումով որեւէ բան չի փոխվել, եւ մենք բովանդակային առումով պահպանել ենք հենց 2008թ. ծրագիրը: Դրան հավելել ենք մեր մարտավարությունը եւ իրականացնում ենք հաջող:

- Ծրագրի հիմնական կետերը կնշե՞ք:

- Առաջին հերթին կոռուպցիոն համակարգի վերացում: Կստեղծենք նոր վիճակ, երբ էապես կփոխվի քաղաքացու կյանքը: Իսկ դա կախված է նրանից, թե ինչպե՞ս է նա իրականացնում իր քաղաքական եւ քաղաքացիական իրավունքները: Դրանից առաջինը ազատ կամարտահայտության միջոցով իշխանության ձեւավորումն է:

- Առաջին քայլը ո՞րը կլինի նախագահ ընտրվելուց հետո:

- Մատենադարան այցելությունը, որովհետեւ այն մեր մշակույթի, պատմության, գիտության եւ լեզվի ամենակարեւոր օջախն է, եւ պետք է կարողանանք գնահատել անցյալն ու մեծագույն հաջողությունները: Սա խորհրդանշական այց է: Իսկ քաղաքական գործունեության մեջ կոռուպցիոն համակարգի վերացումը, բարելավել մեր կյանքի բոլոր ոլորտները: Համակարգային կոռուպցիան վերացնելուց հետո ազատ տնտեսական դաշտ կստեղծենք, լիարժեք կրթություն կապահովենք:

- Պարոն Մելիքյան, քարոզարշավ չեք իրականացնում, չեք հանդիպում Ձեր ընտրողների հետ, ինչո՞ւ:

- Կասեցրել ենք քարոզարշավն առաջին իսկ օրը: Քարոզչություն չենք վարի, քանի դեռ ընտրությունների արդարությունն ապահովված չէ: (Այլապես) ապակողմնորոշելու ենք ընտրողներին, քանի որ խոստումներ ենք տալու, որոնք իրականացնել չենք կարող: Նախ ապահովենք ընտրվելու հնարավորությունը, հետո կարճ ժամանակահատվածում ընտրողներին կծանոթացնենք հիմնական թեզերին: Եվ քանի որ հիմնական դրույթները կրկնվում են եւ շրջանառության մեջ են դրվել 2008-ից ի վեր, հատուկ ծանոթացման անհրաժեշտություն չունեն:

- Ձեր շանսերն ինչպե՞ս եք գնահատում:

- Օրինական ընտրությունների պարագայումՙ մրցունակ: Իսկ այս ընտրությունները ես կանվանեի վերանշանակում: Մեր խնդիրն էՙ ապահովել ընտրություններ, ոչ թե վերանշանակում:

- Ենթադրենք, որ մինչեւ փետրվարի 18-ը Ձեր պահանջներից որեւէ մեկը չի բավարարվում եւ տեղի են ունենում ընտրություններ:

- Այդ ժամանակ տեղի է ունենում գործընթաց, որը կոչվում է ընտրություն: Մենք մեր քայլերն ունենք նաեւ այդ դեպքերի համար: Հիմա չեմ ներկայացնի, քանի որ վաղաժամ է: Երկու-երեք օր հետո, տեսնենքՙ ինչպե՞ս են ընթանում զարգացումները, ձեզ տեղյակ կպահենք:

- Ո՞ւմ եք համարում հիմնական մրցակից:

- Կառավարման ներկայիս արատավոր համակարգը:

- Նախագահական այս ընտրություններն աչքի ընկան հետաքրքրական իրադարձություններով: Նախագահի թեկնածուներից մեկը հացադուլ է հայտարարել, մյուսի վրա կրակել են: Ինչպե՞ս կմեկնաբանեք այս գործընթացներն ու ընդհանրապես դա ազդո՞ւմ է ընտրությունների վարկանիշի վրա:

- Հացադուլը քաղաքական հուսալքության դրսեւորում է: Իսկ Հայրիկյանի շուրջը ծավալվող գործընթացները մարդու կարեկցանք շարժող մահափորձից վերածվեցին քաղաքական առեւտրի, որն առնվազն տարակուսելի է: Հատկապես ներկայիս քաղաքական գործընթացների պարագայումՙ մերժելի:

- Շատերը մեղադրում են Հայրիկյանին շոու կազմակերպելու մեջ:

- Շոուն կազմակերպում են պատվեր ունեցող լրատվամիջոցները: Իսկ Հայրիկյանը համարժեք օգտվում է ստեղծված իրավիճակից: Թեեւ չեմ կարծում, որ իր նպատակներն արժեին այս աղմուկը:

- Պարոն Մելիքյան, ներկա դրությամբ Դուք ի՞նչով եք զբաղվում: Ասուլիսների, հանդիպումների ժամանակ ներկայանում եք ԼՂՀ նախկին արտգործնախարար: Այժմյան Ձեր զբաղմունքը ո՞րն է:

- Չեմ ներկայանում, ներկայացնում են: Հիմա «Փախստականները եւ միջազգային իրավունքը» քաղաքացիական հասարակության ցանցի քաղաքական հարցերով խորհրդական եմ: Հասկանում եմ, թե ինչու են ամեն կերպ փորձում ԼՂՀ-ին մատուցած ծառայություններս բերել առաջին պլան: Երեւանցի լինելով հրավիրվել եմ Արցախի արտաքին քաղաքականության ոլորտում աշխատելու: Սա կարեւոր եւ պատասխանատու խնդիր է եւ հիշատակման արժանի:

- Սոցիոլոգներից մեկը Ձեզ բնութագրելիս մի այսպիսի արտահայտություն արեց, ես մեջբերում եմ. «Ձեր միակ արժանիքն այն է, որ ԼՂՀ նախկին արտգործնախարար եք եղել: Հասարակությունը ձեզ չի ճանաչում, խարիզմա չունեցող թեկնածուների շարքում եք եւ չունեք որեւէ շանս»:

- Այդ սոցիոլոգն իրեն հատուկ ճշգրտությամբ նաեւ ասել է, որ ես Վիեննայի դիվանագիտական ակադեմիան եմ ավարտել, ինչը սուտ է: Դե եթե մի տեղում է սուտ խոսում, ապա մյուս ասածներն էլ առնվազն հիմնավոր չեն: Դա միակ սուտը չէ որ ինքը խոսում է:

- Ի՞նչ կրթություն ունեք, որտե՞ղ եք սովորել:

- Սովորել եմ Երեւանում, ավարտել եմ ԵՊՀ արեւելագիտության ֆակուլտետի իրանագիտության բաժինը, ասպիրանտուրան ավարտել եմ հնագիտության ինստիտուտում: Ինչպես մեր կյանքի այլ ոլորտներում, սոցիոլոգիայում էլ մենաշնորհ է: Մարդիկ գիտությամբ զբաղվելու փոխարեն հայտնի չէ ինչով են զբաղվում:

- Ձեր խոսքերից կարելի է ենթադրել, որ ներկայացվող սոցիոլոգիական հետազոտությունների արդյունքներին չեք հավատում:

- Հիմքեր չկան, կազմակերպություններից որեւէ մեկը չի կարող հստակ տոկոսային հարաբերակցություն տալ, թե Հայաստանում գտնվող ո՞ր տոկոսն է այս կամ այն կարծիքն ու գնահատականը տվել, որովհետեւ չգիտենք բնակչության իրական թվաքանակը:

- Շփումների ընթացքում պարզե՞լ եքՙ հասարակությունը Ձեզ ինչպե՞ս է վերաբերվում:

- Աջակցությունը շատացել է: Մարդիկ շատ ջերմ մաղթանքներով են մոտենում, եւ սա ցույց է տալիս, որ մեր աշխատանքը տալիս է պտուղներ:

- Ի՞նչ կմաղթեք Ձեր ընտրողներին:

- Սկզբունքայնություն եւ վստահություն, որ այս վիճակը մշտական չէ եւ փոփոխման ենթակա է: Յուրաքանչյուրն իր ձեւով պետք է որոշակի ջանքեր գործադրի:

Հ. Գ. - Երեկ երեկոյան Արման Մելիքյանը հանդես եկավ հայտարարությամբ, մասնավորապես նշելով, որ ինքը չի մասնակցելու քվեարկությանը եւ չի ընդունելու ընտրությունների արդյունքները նույնիսկ այն դեպքում, եթե անգամ իր եւ իշխանությունների կամքից անկախ այդ «ընտրությունների» հաղթողը ճանաչվեմ: Նա հորդորեց քաղաքացիներին մասնակցել քվեարկությանը եւ համապատասխան նշումը կատարելով իր անվան դիմացՙ հավաստել ընտրությունների կեղծ լինելու մասին սեփական համոզմամբ:

 
 

«ԱԶԳ» ՕՐԱԹԵՐԹ #18, 14-02-2013

Հայկական էկեկտրոնային գրքերի և աուդիոգրքերի ամենամեծ թվային գրադարան

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ԱԶԴԱԳԻՐ

ՄԵԿ ՏԱՐԻ ԱՌԱՋ