RSS | FACEBOOK | NLA
ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՈՐՈՆՈՒՄ | ԱՐԽԻՎ | ԹԵՄԱ | ՀԵՂԻՆԱԿՆԵՐ

#017, 2013-02-13 > #018, 2013-02-14 > #019, 2013-02-15 > #020, 2013-02-16 > #021, 2013-02-19

«ԱԶԳ» ՕՐԱԹԵՐԹ #19, 15-02-2013



Արձագանքներ դրսից

Տեղադրվել է` 2013-02-15 00:12:20 (GMT +04:00)


Ընթերցված է` 2284, Տպվել է` 110, Ուղարկվել է էլ.փոստով` 101

ԶՕՐԱԿՑՈՒԹԻՒՆ ՀՀ ՆԱԽԱԳԱՀ ՍԵՐԺ ՍԱՐԳՍԵԱՆԻՆ

Պ. ԱՐԱՊԵԱՆ

Փետրուարի 9-ին, կազմակերպութեամբ Ռամկավար ազատական կուսակցութեան Մ. Նահանգներու Արեւելեան Քանատայի Շրջանային վարչութեան, որուն միահամուռ իրենց զօրակցութիւնը յայտնած էին Հայ առաքելական եկեղեցւոյ Մ. Նահանգներու Արեւեալեան ափի առաջնորդարանը, Վարդանանց ասպետներու կազմակերպութիւնը, Ամերիկայի Հայ աւետարանչական ընկերակցութիւնը, Հայ կաթողիկէ համայնքը, Ամերիկայի հայկական համագումարը եւ Թէքէեան մշակութային միութիւնը, Նիւ Ճըրզիի մէջ տեղի ունեցաւ աննախադէպ հանդիսութիւնՙ ի սատարումն ՀՀ նախագահ եւ նախագահութեան թեկնածու Սերժ Սարգսեանիՙ յառաջիկա նախագահական ընտրութիւններու առթիւ:

Իսկապէս աննախադէպ երեւոյթ կը տիրէր «Փալիսետիում» սրահին մէջ նախքան հանդիսութիւնը: Հոծ բազմութեամբ, հաւատաւոր հայորդիներ, անտեսելով այդ օրերու ձիւնամրրիկներըՙ հեռաւոր շրջաններէ բութացած էին հանդիսասրահ ոչ միայն իրենց զօրակցութիւնը յայտնելու ՀՀ նախագահին, այլեւՙ ապահովելու յառաջիկայ հնգամեակին յաջողութիւններով լի գոյերթը Մայր հայրենիքին:

Օրուան հանդիսութիւնը իրենց ներկայութեամբ պատուած էին թեմիս բարեխնամ առաջնորդՙ Խաժակ արք. Պարսամեան, AMAA համաշխարհային կազմակերպութեան վարիչ տնօրէնՙ Լեւոն Ֆիլեան եւ Հայ կաթողիկէ համայնքէն Թովմաս վրդ. Կարապետեան, նիւեորքաբնակ ազգային պատուական բարերարներՙ տէր եւ տիկ Նազար Նազարեան, տիարք Հրաչ Թուֆայեան, Սարգիս Պետեւեան, Անտրէաս Ռուպեան, Բաբկէն Մկրեան (ՌԱԿ շրջանային վարչութեան համաատենապետ), տէր եւ տիկ տքթ. Րաֆֆի Յովհաննէսեան, Իրմա եւ Սիլվա Տէր Ստեփանեան, տէր եւ տիկ Սարօ Յարութիւնեան, տէր եւ տիկ Վահրամ Այնիլեան:

Մինչ կը հնչէր անկախ Հայաստանի եւ Ռամկավար ազատական կուսակցութեան հիմներգերը, ներկայ բազմութիւնը հայու հպարտութեամբ, յաղթանակ մը տարած ըլլալու զգացումով տոգորուած կ"ողջունէր երեկոյթին խորհուրդըՙ զօրակցութիւն յայտնելով հայրենիքի յառաջիկայ հնգամեայ գոյերթը ապահովող նախագահ Սերժ Սարգսեանին: Երեկոյթը ատենապետող Յակոբ Վարդիվառեան իր ողջոյնի խօսքով շնորհաւորեց ներկաները իրենց ռամկավարավայել կեցուածքին համար, եւ ապա յայտնեց ՌԱԿ-ի սկզբունքային դիրքորոշումըՙ զօրավիգ կանգնելու նախագահ Սարգսեանին նախագահական ընտրութիւններուն:

Օրուան երեկոյթին խորհուրդը ամբողջականացնող երեւոյթ որպէս, հայրենի արուեստագէտ Ռուտիկ Տէր Պետրոսեան իր իսկ ստեղծագործութեամբ ԹՄՄ-ի Նիւ Եորքի նոր ակումբին նուիրեց նախագահ Սարգսեանի դիմանկարը (իւղաներկ), որ արժանացաւ ներկաներուն գնահատանքին:

Յանուն Արեւելեան Ամերիկայի եւ Քանատայի ՌԱԿ շրջանային վարչութեան խօսք առաւ ընկ տոքթ. Վաղինակ Դարբինեան , որ իր հայեացքները սեւեռելով անկախութեան առաջին իսկ հանգրուանին ՌԱԿ-ի գործունէութեան, շեշտելով անգամ մը եւս, որ մեր տեսլականն է հայրենի պետութիւնը տեսնել ռամկավարական եւ ազատական կարգուսարքի մէջ, մասնաւորապէս ըսաւ. «Տարիներու փորձառութիւնը մէկ կողմէն եւ ներդաշնակեալ ու հաւասարակշռուած սփիւռքի մը ապահովումը միւս կողմէն, պարտականութեան առջեւ կը դնեն մեզ, որպէսզի այսուհետեւ ներգործենք հայրենի քաղաքական կեանքէն ներս, մասնակցինք պետականաշինութեան գործընթացին եւ լաւագոյնս ներկայանանք մա՛նաւանդ Հայ դատի հետապնդման աշխատանքներուն»:

Երեկոյթը իր ճոխ հիւրասիրութեամբ ու գեղարուեստական յայտագրով բարձր տրամադրութիւն ստեղծած էր սրահէն ներս: Հայկական երգերու իրենց կատարած համադրումներով «Յոյսեր» երիտասարդական երաժշտական խումբը օրուան խորհուրդին պատշաճող հայրենասիրական երգերով առաւել եւս խանդավառութիւն ստեղծեց, իսկ Դալար Զոքեան հայկական պարերով հմայեց ներկաները: Մեծ հետաքրքրութիւն ստեղծեց նաեւ Սերժ Սարգսեանի ազատագրական պայքարի օրերէն մինչեւ ներկան բնորոշող տեսերիզներու ցուցադրումը, որուն մէջ կը տողանցէին ազատագրական պայքարի մարտնչող ընկերներՙ այժմու ղեկավարներ, որոնք այնքա՜ն հպարտութիւն առթեցին ներկաներուն հոգեկան աշխարհին մէջ:

Օրուան ձեռնարկը ատենապետող Յ. Վարդիվառեան բեմահարթակ հրաւիրեց յատուկ սոյն ձեռնարկին համար ժամանած Պէյրութի «Զարթօնք» օրաթերթի խմբագիր Պայծիկ Գալայճեանը , որ ազգային ու գաղափարախօսական ամփոփ խօսքով ոգեւորեց ներկաները: «Այսօր մենք առանց վարանելու, մեզի վայել հպարտութեամբ ստանձնած ենք տօնախմբել սոյն երեկոյթը, որովհետեւ եօթտասնամեայ խորհրդային տարիներուն անգամ մենք ոչ միայն ջատագովը հանդիսացած ենք Մայր Հայաստանին, այլեւ փայփայած ենք զայն, ինչ դրօշի տակ ալ գտնուած ըլլայ ան, յանուն մեր վերածնելիք անկախ Հայաստանին...»: Ապա իր սրտի խօսքը արտայայտեց ազգային բարերարուհի տիկ Արտեմիս Նազարեանը . «Թէեւ ես ռամկավար չեմ, սակայն իմ մօրեղբայրս ռամկավար ըլլալուն, ոչ միայն իմ քայլերս առաջնորդած է այդ գաղափարախօսութեամբ, այլեւ ես իրենց ակումբներուն մէջ սորված եմ հայերէն լեզու եւ հայոց պատմութիւն: Պատմութեան մէջ ռամկավարները մի՛շտ ալ մնացած են նոյն ուղեգիծին վրայ: Կեցցե՛ն ռամկավարները, կեցցէ՛ Հայաստանը»:

Յանուն մեծն Նիւ Եորքի Թէքէեան մշակութային միութեան ելոյթ ունեցաւ ԹՄՄ-ի համաատենապետ, բեմադրիչ Յարութ Չաթմաճեանը , որ անդրադարձ մը կատարեց նախ ԹՄՄ-ականի հաւատամքին. «Ուրախ ենք, մա՛նաւանդ անցնող հինգ տարիներուն, երբ նախագահ Սերժ Սարգսեան եւ իր կառավարութիւնը, որ աւելի ուշադրութիւն սկսաւ դարձնել հայ սփիւռքին: Միայն սփիւռքեան տնտեսական կարելիութիւններով ան չբաւարարուեցաւ, այլ տեւական հայ սփիւռքի մը պահպանումին համար ծնունդ տուաւ Սփիւռքի նախարարութեան: Հայրենիք-Սփիւռք կապերու նոր եւ կատարելագործուած կամուրջն է որ ան հաստատեց»:

Մեծն Նիւ Եորքի Աւետարանչական կազմակերպութեան անունով իր սրտի խօսքը յայտնեց Լեւոն Ֆիլեան , որ շնորհաւորելէ ետք օրուան ձեռնարկը կազմակերպողները, ներկաներուն նկատել տուաւ հաւաքական աշխատանքի կարեւորութիւնը: Ան իր խօսքը եզրափակելով մէջբերումներ կատարեց Վահան Թէքէեանի «Հաշուեյարդար» քերթուածէն:

Ձեռնարկին աջակցող կազմակերպութիւններէն Հայկական համագումարի Տնօրէն խորհուրդի անդամներէն Վան Գրիգորեան հակիրճ տուեալներով ներկաներուն փոխանցեց իրենց ծաւալած գործունէութեան ծիրէն ներս Հայաստանի տեղն ու դիրքը, շրջափակումի բերումով յարաբերութիւններու մշակման անհրաժեշտութիւնըՙ հայ-թրքական փրոթոքոլի լոյսին տակ: Ինչպէս նաեւ մեր երկրի բոլոր դրացիներուն հետ յարաբերութեան հեռանկարները եւ ՀՀ նախագահ Սերժ Սարգսեանի փորձառութիւնը տարածաշրջանային խնդիրներու եւ սահմաններու ապահովման գծով:

Երեկոյթի եզրափակիչ բաժնով ելոյթ ունեցաւ թեմիս առաջնորդ Խաժակ արք. Պարսամեան , որ յատուկ շնորհակալութիւն յայտնեց Մեծն Նիւ Եորքի Ռամկավար ազատական կուսակցութեան շրջանակին, որուն նախաձեռնութեամբ հոծ բազմութեամբ հայորդիներ մեկտեղուած են իրենց զօրակցութիւնը յատնելու ե՛ւ Հայաստանին եւ թէ՛ ՀՀ նախագահ Սերժ Սարգսեանին:

«Լաւատես ըլլալու բազմաթիւ տուեալներ մեզ կը պատեն ներկայիս, ոչ թէ որովհետեւ լաւ օրերու ցանկատեսութեամբ կ"ապրինք, այլ որովհետեւ մենք ականատեսը դարձանք յառաջդիմութիւններով լեցուն օրերու, որոնք կ"առաջնորդեն մեր քայլերը դէպի պայծառ ու ապահով ապագայ»:

Առաջնորդ սրբազանը իր ելոյթէն ետք Պահպանիչով փակեց երեկոյթը, իսկ ներկայ բազմութիւնը, հայրենիքով տոգորուած, Հայաստանի յառաջիկայ հնգամեակի ապահով երթի վստահութեամբ բաժնուեցաւ սրահէն, մինչ երիտասարդ վարչականներու մեծ խումբը շինիչ գործ մը իրագործած ըլլալու գոհունակութեամբ երկա՜ր յամեցաւ սրահէն ներս ու իր հետ թնդաց նաեւ հայ երգն ու պարը:

Անկախութիւնը մեզի սորվեցուց նպատակներու իրականացման հիմքը ընդունիլ սեփական ուժերուն ապաւինիլը: Վերջին հազարամեակին միշտ ուրիշներէն ակնկալելու քաղաքականութեամբ, անոնցմէ օգնութիւն ակնկալող Հայաստանը անկախ պետականութեան պայմաններուն մէջ յաջողեցաւ ի՛նքը ըլլալ երաշխաւորը Լեռնային Ղարաբաղի փրկութեան եւ գոյատեւման:

Եթէ 1991-ին յաղթահարեցինք անկախութեան արտաքին խոչընդոտները, այսօր հայ ժողովուրդը համախմբուած է դիմագրաւելու համար նոր մարտահրաւէրները, իւրացնելով անկախութեան ամենավեհ խորհուրդը: Այդ օրը հեռու չէ:

 
 

«ԱԶԳ» ՕՐԱԹԵՐԹ #19, 15-02-2013

Հայկական էկեկտրոնային գրքերի և աուդիոգրքերի ամենամեծ թվային գրադարան

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ԱԶԴԱԳԻՐ

ՄԵԿ ՏԱՐԻ ԱՌԱՋ