RSS | FACEBOOK | NLA
ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՈՐՈՆՈՒՄ | ԱՐԽԻՎ | ԹԵՄԱ | ՀԵՂԻՆԱԿՆԵՐ

#036, 2013-03-13 > #037, 2013-03-14 > #038, 2013-03-15 > #039, 2013-03-16 > #040, 2013-03-19

«ԱԶԳ» ՕՐԱԹԵՐԹ #38, 15-03-2013



Մշակույթ

Տեղադրվել է` 2013-04-05 21:27:16 (GMT +04:00)


Ընթերցված է` 2106, Տպվել է` 112, Ուղարկվել է էլ.փոստով` 83

ՍԵՐԳԵՅ ՆԱԿԱՐՅԱԿՈՎԸ, ՄԱՐԻԱ ՄԵՅԵՐՈՎԻՉ ԵՎ ՋՈՆ ՎԻԿՏՈՐԻՆ ՅՈՒՆԻՆ ՄԵԿ ԲԵՄՈՒՄ

ՄԱՆԱՆԱ ՀՈՎԱԿԻՄՅԱՆ

Այսօր Արամ Խաչատրյան համերգասրահում ֆիլհարմոնիկ նվագախումբի հետ համատեղ տեղի կունենա շեփորահար Սերգեյ Նակարյակովի, դաշնակահարուհի Մարիա Մեյերովիչի եւ դիրիժոր Ջոն Վիկտորին Յունիի համերգը:

Ս. Նակարյակովը կկատարի Հայդնի Թավջութակի կոնցերտը փոխադրված շեփորի համար, իսկ Մ. Մեյերովիչի հետ` Շոստակովիչի դաշնամուրի, շեփորի եւ լարային նվագախմբի համար կոնցերտը: Համերգի շրջանակում Ֆիլհարմոնիկ նվագախումբը կներկայացնի նաեւ Բրուքների թիվ 3 սիմֆոնիայի հայաստանյան պրեմիերան:

Շեփորահար Սերգեյ Նակարյակովը , որը ծնվել է 1977թ-ին Ռուսաստանում, 13 տարեկանից հանրության կողմից անվանվել է շեփորի Պագանինի, իսկ նրա «Էլեգիա» անվանումով CD-ն ունկնդրելուց հետո քննադատներից մեկը նրան անվանեց շեփորի Կառուզո:

Համերգային ծրագրից առաջ երաժիշտները հանդիպեցին լրագրողների հետ, որի ժամանակ Ս. Նակարյակովն ասաց. «Ցավոք, շեփորահարների համար երգացանկը մեծ չէ, սակայն գոհ եմ համերգի համար ընտրված ծրագրից»: Բանախոսն ընդգծեց, որ ամեն անգամ սիրով է գալիս Հայաստան եւ հաճույքով է աշխատում Ֆիլհարմոնիկ նվագախմբի հետ:

Ի դեպ, 9 տարեկան հասակում ողնաշարի վնասվածքի հետեւանքով ստիպված լինելով թողնել դաշնամուրը, Սերգեյն իրեն նվիրեց շեփորին: Այդ ունակությունը ժառանգելով հորից` Միխայիլ Նակարյակովից, Սերգեյը շուտով տիրապետեց շեփորի նվագացանկի կարեւորագույն գործերին: Նա այն հազվադեպ հանդիպող շեփորահարներից է, որը դասական երաժշտությունը մեկնաբանելիս օգտագործել է ֆլյուգենհորնը: Սերգեյը մասնակցել է նաեւ Զալցբուրգի փառատոնին եւ արժանացել «Prix Davidov» մրցանակին: Այդ ժամանակից սկսած, նա ելույթներ է ունեցել շուրջ 25 երկրներում` Վլադիմիր Սպիվակովի, Քրիստոֆ Էշենբախի, Յուրի Բաշմետի, Յուրի Տեմիրկանովի, Վլադիմիր Աշկենազիի, Իրժի Բելոհլավեկի, Դմիտրի Սիտկովեցկու, Սըր Նեվիլ Մարիների, Վալերի Գերգիեւի եւ այլոց ղեկավարությամբ:

Իսկ դաշնակահարուհի Մարիա Մեյերովիչը ծնվել է Սանկտ Պետերբուգում, ավարտել կոնսերվատորիան: Ստանալով Մենուհինի «Fonds Alex de Vries»-ի կրթաթոշակը, 1990-ին տեղափոխվում է Բելգիա, որտեղ ավարտում է Անտվերպենի Royal Conservatory-ն: Համագործակցել է անվանի երաժիշտների հետ, ինչպիսիք են` Սոնդեցկիսը, Կրեբերսը, Հիրշհորնը, Յուրովսկին, Ցուկերմանը, Վաթսը, Վենգերովը եւ այլք: Հատկանշական է, որ հայաստանյան համերգը առաջին համագործակցությունը չէ Սերգեյ Նակարյակովի հետ, նրանք հաճախ են միասին հանդես գալիս համերգային ծրագրերով: Մարիա Մեյերովիչը դասավանդում եւ վարպետության դասընթացներ է անցկացնում ԱՄՆ-ում, Գերմաիայում, Հարավային Աֆրիկայում, Բելգիայում եւ այլուր: Իսկ վերջերս ձայնագրել է «Widmung» CD-ն:

«Հայերը շատ ջերմ ազգ են, ինչպիսին է նաեւ նվագախումբը: Մեծ հաճույքով եմ համագործակցում Ֆիլհարմոնիկի հետ: Հայաստանն իրոք հպարտանալու բաներ ունի», նշում է դաշնակահարուհին:

Իսկ Ջոնգ Վիկտորին Յուն առաջին անգամ չէ, որ Հայաստանում է գտնվում եւ համերգով հանդես գալիս մեր պետական ֆիլհարմոնիկ նվագախմբի հետ, այս համերգն արդեն չորրոդ համագործակցությունն է:

Նշենք, որ նա կոմպոզիցիա է սովորել Ջորջ Քրամբի, Ջեյ Ռայսի եւ Ջորջ Ռոխբերգի ղեկավարությամբ Փենսիլվանիայի համալսարանում: Համերգներով հանդես է եկել Հունգարիայի, Լեհաստանի, ինչպես նաեւ Կորեայի, Ճապոնիայի, Անգլիայի եւ այլ երկրների հայտնի համերգասրահներում: Նա մշտապես հրավիրվում եւ ձայնագրություններ է կատարում Լոնդոնի Philharmonia Orchestra-ի հետ եւ թողարկել է շուրջ 14 ձայնասկավառակ: «Ես միշտ հիացել եմ հայ ազգի նվաճումներով, հատկապես` երաժշտական տաղանդով: Ուրախ եմ, որ ինձ ընձեռվել է հնարավորություն եւս մեկ անգամ համերգային ծրագրով հանդես գալ այս վաստակավոր նվագախմբի հետ եւ ներկայացնել իմ խմբագրած` Բրուքների 3-րդ սիմֆոնիայի համաշխարհային պրեմիերան»,- ասաց Ջոնգ Վիկտորին Յուն, ավելացնելով. «Ուրախ եմ, որ Հայաստանում կարող եմ նվագել Շոստակովիչ, ցավոք իմ երկրում արգելված է նրա ստեղծագործությունները կատարել»:

 
 

«ԱԶԳ» ՕՐԱԹԵՐԹ #38, 15-03-2013

Հայկական էկեկտրոնային գրքերի և աուդիոգրքերի ամենամեծ թվային գրադարան

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ԱԶԴԱԳԻՐ

ՄԵԿ ՏԱՐԻ ԱՌԱՋ