RSS | FACEBOOK | NLA
ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՈՐՈՆՈՒՄ | ԱՐԽԻՎ | ԹԵՄԱ | ՀԵՂԻՆԱԿՆԵՐ

WWW.AZGONLINE.AM
2020-10-24 21:55:00Թուրքական անօդաչուները Գյումրիի մոտակայքում
2020-10-24 18:48:22Ադրբեջանցիները հայկական համազգեստով են կռվում. դեպքեր են գրանցվել
2020-10-20 14:48:57ԵԽ հույն պատգամավորը կոչ է արել վիզային սահմանափակումներ մտցնել ադրբեջանցիների համար եւ վիզաների չեղարկում՝ հայերի համար
2020-10-18 11:53:59Ադրբեջանցիները հայ երիտասարդին ներկայացնում են որպես վարձկան
2020-10-17 20:20:41“Որտեղից Հայաստանին այսքան զենք” Ալիև
#145, 2013-09-03 > #146, 2013-09-04 > #147, 2013-09-05 > #148, 2013-09-06 > #149, 2013-09-07

«ԱԶԳ» ՕՐԱԹԵՐԹ #147, 05-09-2013



Մշակույթ

Տեղադրվել է` 2013-09-04 23:11:40 (GMT +04:00)


Ընթերցված է` 996, Տպվել է` 54, Ուղարկվել է էլ.փոստով` 26

ՏԻԳՐԱՆ ՄԱՆՍՈՒՐՅԱՆ. «ԿՈՄԻՏԱՍԻ ՍՏԵՂԾԱԳՈՐԾՈՒԹՅՈՒՆՆԵՐՆ ԱՅՍՕՐ ՔԱՐՈԶՉՈՒԹՅԱՆ ԿԱՐԻՔ ՈՒՆԵՆ»

ՄԱՆԱՆԱ ՀՈՎԱԿԻՄՅԱՆ

Սեպտեմբերի 5-ին Նարեկացի արվեստի միությունը նշում է հիմնադրման 9-րդ տարեդարձը: Կոմիտասյան շնչով կողողվի այս տարի միջոցառումների ծրագրերի շարքը: Կոպոզիտորին, բանահավաքին, երաժշտագետին Կոմիտասի ստեղծագործությունները կհնչեն իր ձեռագրերի տառին ու ոգուն հնարավորինս հարազատ բնագրային ճշգրտությամբ` առանց մշակումների, նրա ժառանգությունը` թե կոմպոզիտորական, թե գիտական, կներկայացվի հնարավորինս համակողմանիորեն: Ի դեպ, միջոցառումների ընթացքում կներկայացվի նաեւ Կոմիտասի կյանքը` արխիվային լայնածավալ հավաքածուի ցուցադրմամբ:

Նարեկացի արվեստի միության հիմնադիր Նարեկ Հարությունյանը երեկ լրագրողների հետ հանդիպմանը նշեց, որ արդեն ավանդույթ է դարձել յուրաքանչյուր տարի տարեդարձները նշել մեր մեծերի հետ. «Որքան մոտենում ենք մեր մեծերին, հասկանում ենք, թե ով ենք: Որքան մոտենում ենք Կոմիտասին, այնքան Աստծուն ենք մոտենում»:

Սեպտեբերի 5-ից 9-ը նախատեսված է անցկացնել փաստագրական ցուցահանդես, համերգաշար, ինչպես նաեւ դասախոսություններ Կոմիտասի մասին:

Ցուցահանդեսը հիմնված կլինի Կոմիտասի մասին պատմող փաստագրական նյութերի վրա. նամակներ, գծանկարներ, լուսանկարներ, խազագրեր եւ նոտագրեր Եղիշե Չարենցի անվան գրականության եւ արվեստի թանգարանի հավաքածուից: Ցուցադրության մեծ մասը հանրությանը կներկայացվի առաջին անգամ: Դասախոսությունների ծրագիրը կազմված է այնպես, որ Կոմիտասի գործն ու ստեղծագործությունը ներկայացվի տարբեր տեսանկյուններից: Այսպես Կոմիտասի ստեղծագործության երաժշտական վերլուծությամբ հանդես կգա կոմպոզիտոր Տիգրան Մանսուրյանը: Կոմիտասագետ, կոմպոզիտոր, երաժշտագետ Արթուր Շահնազարյանի դասախոսությունը Կոմիտասի ժառանգությունը քննության կառնի հայ ժողովրդական եւ հոգեւոր երաժշտության առավել լայն պատմական շրջանում, իսկ երաժշտագետ Մհեր Նավոյանը կխոսի Կոմիտասի մասին մշակութային հարցերի եւ ինքնության խնդրի համատեքստում:

Համերգային ծրագիրը նույնպես մշակվել է զգուշությամբ եւ այնպես, որ Կոմիտասի ժառանգության հարուստ ներկապնակը հնչի հնարավորինս ամբողջական ժանրային տարողությամբ ներկայացնելով Կոմիտասի թե կոմպոզիտորական ստեղծագործությունները, թե մշակումները: Ու քանի որ համերգը կազմակերպված է Կոմիտասին ավելի խորը ըմբռնելու ցանկությամբ, բոլոր կատարումները կարվեն նրա բնագրերին հնարավորինս հարազատ մեկնաբանություններով:

Սեպտեմբերի 5-ի համերգին կհնչեն Կոմիտասի գեղջկական երգերը, մեներգերը եւ խմբերգերը Անուշ եւ Եվա Ստեփանյանների, Գոհար Մարտիրոսյանի, Վարուժան Մարգարյանի, Ավագ Մարգարյանի (բլուլ), Վաչե Շարաֆյանի (դաշնամուր) եւ «Վեմ« երգչախմբի կատարմամբ, սեպտեմբերի 8-ին կհնչեն հոգեւոր եւ ժողովրդական ստեղծագործությունները «Գեղարդ» երգեցիկ խմբի մեկնությամբ, իսկ սեպտեմբերի 9-ի հանդիսավոր փակման գալահամերգին Կոմիտասի մեներգերը, խմբերգերը եւ դաշնամուրային ստեղծագործությունները կկատարեն Մարգարիտ Շահինյանը, Աննա Մայիլյանը, Լուսինե Գրիգորյանը (դաշնամուր) եւ Հայաստանի պետական կամերային երգչախումբը (գեղ. ղեկավար` Ռոբերտ Մլքեյան) կատարմամբ: Փակման համերգը տեղի կունենա Կոմիտասի անվան կամերային երաժշտության տանը:

Կոմպոզիտոր Տիգրան Մանսուրյանը կարծում է, որ պետական մարմինները նույնպես հակված են աջակցելու, որ Կոմիտասի դերն ավելի մեծանա մեր կյանքում. «Բոլորս մտահոգություն ունենք Կոմիտասով ապրելու, եւ սա գալիս է մի քանի ժամանակավոր երեւույթներից, որոնք անցողիկ են: Դուք նկատի ունեցեք, որ մենք խոսում ենք մի հսկա մոնումենտալ հիմքի մասին, որն ինքնին հայ կոմպոզիտորական դպրոց հասկացություն է: Անհամատեղելի է Կոմիտասին համեմատել օրվա անցողիկ հաճույքների հետ: Կոմիտասի ստեղծագործություններն այսօր քարոզչության կարիք ունեն, սակայն, մյուս կողմից, ունենք նաեւ մի շարք նվիրյալներ, որոնք հենց այդ գործով էլ զբաղվում են»:

Մանսուրյանն ուրախությամբ նշում է նաեւ, որ Նարեկացի արվեստի միությունը ծանր ու լուրջ անունների շուրջ ստեղծում է տոնական մթնոլորտ, որը ողջունելի է. «Ուրախ եմ նշել, որ այս միությունը միշտ պատրաստակամ է օգնելու ստեղծագործող մարդկանց եւ այստեղ միշտ լուսավոր տրամադրություն է»:

Նարեկացի արվեստի միության գործունեությունը իրականացվում է անվճար հիմունքներով եւ ազատ է անցկացվող բոլոր միջոցառումների մուտքը: Միությունը միշտ կանգնած է ստեղծագործող մարդկանց կողքին եւ ուժերի ներածին չափով աջակցում է:

 
 

«ԱԶԳ» ՕՐԱԹԵՐԹ #147, 05-09-2013

Հայկական էկեկտրոնային գրքերի և աուդիոգրքերի ամենամեծ թվային գրադարան

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ԱԶԴԱԳԻՐ

ՄԵԿ ՏԱՐԻ ԱՌԱՋ