RSS | FACEBOOK | NLA
ԼՐԱՀՈՍ | ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՈՐՈՆՈՒՄ | ԱՐԽԻՎ | ԹԵՄԱ | ՀԵՂԻՆԱԿՆԵՐ


Հոգու խոհանոցը

ԼՐԱՀՈՍ    |    «ԱԶԳ»-Ի ՎԵՐՋԻՆ ՀԱՄԱՐԸ
#155, 2013-09-17 > #156, 2013-09-18 > #157, 2013-09-19 > #158, 2013-09-20 > #159, 2013-09-21

«ԱԶԳ» ՕՐԱԹԵՐԹ #157, 19-09-2013



105-ԱՄՅԱԿ

Տեղադրվել է` 2013-09-18 22:26:36 (GMT +04:00)


Ընթերցված է` 899, Տպվել է` 18, Ուղարկվել է էլ.փոստով` 10

ՌԱՖԱՅԵԼ ԻՍՐԱՅԵԼՅԱՆ

Հայ ականավոր ճարտարապետ Ռաֆայել Իսրայելյանը համադրել է ժամանակակիցն ու ավանդականը եւ ազգայինը ոգով լուծել արդի ճարտարապետության մարտահրավերները:

Մեծ վարպետի ժառանգությունը հիրավի զարդարում է Հայաստանի լեռներն ու ձորերը: Իսրայելյանի արվեստում ամենաբարձր մակարդակով է ներկայացվում Հայաստանի անցյալն ու ապագան: Նրա ուղենշած ճանապարհը տանում է դեպի արդիականի եւ ազգայինի ներդաշնակությունը: Հենց այս ճանապարհին է Մեծ ճարտարապետը դրսեւորել հայ ազգային ստեղծագործական ներուժը:

Սարդարապատի, Բաշ Ապարանի, Նոր Հաճնի, Մուսա լեռան հերոսամարտերին նվիրված ճարտարապետական կոթողներն արտացոլում են հայ ժողովրդի հերոսական ոգին ու պատմությունը եւ նորանոր սխրանքների են ոգեկոչում:

«Արարատ» տրեստի գինու մառանները, Օշականի «Խերես» գինու գործարանը եւ բազմաթիվ այլ շինություններ խորհրդանշում են հայ ժողովրդի համառ աշխատասիրությունն ու կենսասիրությունը:

Ժողովրդական իմաստությունը արտացոլող բազմաթիվ աղբյուր հուշարձանները, ցրված լինելով Հայաստանով մեկ, ճամփորդների լավագույն ուղեկիցներն են մշտապես:

Չարենցի կամարը, 1915 թ. Ցեղասպանության զոհերին նվիրված հուշարձանը Էջմիածնի Մայր տաճարի բակում, Սուրբ Սարգիս եկեղեցու վերակառուցումը հայ հոգեւոր մշակույթի անգերազանցելի նվաճումներից են:

Իսրայելյանի տաղանդը չի սահմանափակվել Հայոց հայրենիքը շենացնելով, այն ընդգրկել է նաեւ Սփյուռքի հայկական համայնքները: Սրա լավագույն դրսեւորումներից է Նյու-Յորքի Սուրբ Վարդան եկեղեցին, Միլանի Քառասուն մանկունք եկեղեցին եւ Մոնտեվիդեոյի Սուրբ Շնորհալի եկեղեցին:

Նախորդ օրը ՀՀ ժողովրդական ճարտարապետ Ռաֆայել Իսրայելյանի ծննդյան 105 ամյակն է: Այդ առիթով Սարդարապատի հուշահամալիրում նրա հիշատակին նվիրված միջոցառում էր կազմակերպվել: Հայաստանի ճարտարապետների միության նախագահ Մկրտիչ Մինասյանը պատմեց, որ իրենք վարպետի աշակերտների, հարազատների հետ միասին այցելել են նրա շիրիմին, զրուցել նրա մասին, պատմել հուշեր: Ցուցադրվել է տեսանյութ Իսրայելյանի մասին:

«Այցելեցինք Սարդարապատի հուշահամալիր, որը վարպետի լավագույն ստեղծագործություններից մեկն է: Մեր շատ սիրելի ուսուցիչը, տաղանդավոր ճարտարապետը շատ մեծ հետք է թողել մայրաքաղաքում, հանրապետության տարբեր վայրերում, ինչպես նաեւ արտասահմանում»,- ասաց Մկրտիչ Մինասյանը:

Հավելենք, որ Ռաֆայել Իսրայելյանը հեղինակել է մի շարք հայտնի շինություններ ու կոթողներ` «Արարատ» տրեստի գինու մառանները (Գ. Քոչարի համահեղինակությամբ), «Սարդարապատի հերոսամարտի հուշահամալիրը», «Չարենցի կամար» հուշակոթողը, «Հաղթանակ» զբոսայգու մուտքի հաղթակամարը, Հաղթանակի հուշարձան-թանգարանը, 1918 թ.-ի Ապարանի հերոսամարտի հուշահամալիրը եւ այլն:

1951թ.-ին Հաղթանակ հուշարձանի ճարտարապետության համար նա արժանացել է ԽՍՀՄ պետական առաջին կարգի մրցանակի: Իսրայելյանը Հայկական ԽՍՀ Գերագույն խորհրդի նախագահության հրամանագրով արժանացել է Հայկական ԽՍՀ արվեստի վաստակավոր գործչի, ապա Հայկական ԽՍՀ վաստակավոր ճարտարապետի պատվավոր կոչումների, պարգեւատրվել է Հայկական ԽՍՀ Գերագույն խորհրդի պատվոգրով: Իսրայելյանը մահացել է 1973 թվականին:

Հավերժ փառք ու պատիվ նրան ...

 
 

«ԱԶԳ» ՕՐԱԹԵՐԹ #157, 19-09-2013

Հայկական էկեկտրոնային գրքերի և աուդիոգրքերի ամենամեծ թվային գրադարան

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ԱԶԴԱԳԻՐ

ՄԵԿ ՏԱՐԻ ԱՌԱՋ