RSS | FACEBOOK | NLA
ԼՐԱՀՈՍ | ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՈՐՈՆՈՒՄ | ԱՐԽԻՎ | ԹԵՄԱ | ՀԵՂԻՆԱԿՆԵՐ


«ԱԶԳ» ՇԱԲԱԹԱԹԵՐԹԻ ԸՆԹԵՐՑՈՂՆԵՐԻՆ. Սիրելի «ԱԶԳ»ականներ, այս օրերի համար ոչ անսպասելի հանգամանքների պատճառով, «ԱԶԳ» շաբաթաթերթի հունիսի 5-ի համարի նյութերը հրապարակվում են վաղը՝ 6 հունիսի առավոտից սովորական՝ azg.am ԼՐԱՀՈՍ հպման տակ, եւ, միաժամանակ, azgonline.am մեր կայքէջերում։ Գումարած թերթում լույս տեսած նյութերի հրապարակվում են նաեւ այլ հոդվածներ ու մեկ հարցազրույց, որոնք տեղի սղության պատճառով դուրս են մնացել թերթի էջերից։ Ապավինում ենք ընթերցողների ներողամտությանը՝ կամքից անկախ պատճառներով պատահած ուշացման համար։ Խմբագրություն

ԼՐԱՀՈՍ    |    «ԱԶԳ»-Ի ՎԵՐՋԻՆ ՀԱՄԱՐԸ
#159, 2013-09-21 > #160, 2013-09-24 > #161, 2013-09-25 > #162, 2013-09-26 > #163, 2013-09-27

«ԱԶԳ» ՕՐԱԹԵՐԹ #161, 25-09-2013



Անցուդարձ

Տեղադրվել է` 2013-09-24 23:29:59 (GMT +04:00)


Ընթերցված է` 993, Տպվել է` 37, Ուղարկվել է էլ.փոստով` 12

ԺԱՄԱԴՐՈՒԹՅՈՒՆ ԵԼԻՍԵՅԱՆ ԴԱՇՏԵՐՈՒՄ

ՀՈՎԻԿ ԱՖՅԱՆ

Հայաստանի նախագահը անցյալ օրերին Սոչիում էր: Հիշեցնենք, սա այս ամսվա 25 օրերի ընթացքում Սերժ Սարգսյանի երրորդ այցն էր Ռուսաստանի Դաշնություն: Ընդ որում, դրանցից միայն մեկի` սեպտեմբերի 3-ի այցի ընթացքում, տեղի ունեցավ Սարգսյան-Պուտին հանդիպումը. ՌԴ նախագահը առանձին չհանդիպեց Սերժ Սարգսյանին ոչ Մոսկվայում նորակառույց Սուրբ Պայծառակերպություն եկեղեցու օձման արարողության ժամանակ, ոչ էլ Սոչիում կայացած ՀԱՊԿ երկրների նախագահների գագաթաժողովի շրջանակներում:

ՀԱՊԿ գագաթաժողովին եւ այնտեղ ՀՀ նախագահի ունեցած ելույթի որոշ դրվագներին «Ազգը» երեկվա համարում արդեն անդրադարձել է: Նշենք միայն, որ գագաթաժողովի շրջանակներում Սերժ Սարգսյանը հանդիպել է Բելառուսի նախագահ Ալեքսանդր Լուկաշենկոյին, այն էլ խոսելու «Մաքսային միությանը Հայաստանի անդամակցության գործում Բելառուսի աջակցության մասին»:

Ինչեւէ, այն ընթացքում, երբ ՀՀ նախագահը, թերեւս աննախադեպ, ոչ լրիվ ամսվա ընթացքում երեք անգամ եղավ Ռուսաստանում, Հայաստանը տոնեց իր անկախության տոնը: Սեպտեմբերի 21-ին նախագահ Սարգսյանը ստացավ մի շարք շնորհավորանքներ աշխարհի տարբեր երկրների նախագահներից (ի դեպ, Մոսկվայի քաղաքապետ Սերգեյ Սոբյանինը Հայաստանի անախության օրը չի շնորհավորել): Այդ շնորհավորանքներից ուշագրավը Ֆրանսիայի նախագահ Ֆրանսուա Օլանդի ուղերձն է: Այնտեղ նախագահ Օլանդն, իհարկե, շնորհավորում է Սերժ Սարգսյանին Հայաստանի անկախության տոնի կապակցությամբ եւ նշում է. «Ուրախ կլինեի տարածաշրջանային ու երկկողմ հարցեր քննարկել Ձեզ հետ (նկատի ունի` Սերժ Սարգսյանի հետ) Փարիզում»: Ֆրանսիայի նախագահի ուղերձի այս դրվագն ամենաուշագրավն է, եւ ահա թե ինչու:

Անցյալ տարվա աշնանը Սերժ Սարգսյանը պետական այցով Ֆրանսիայում էր: Այդ այցելությունից հետո ԱԳ նախարար Էդվարդ Նալբանդյանը հայտարարեց, որ գալիք տարի, այսինքն` այս տարի, սպասում ենք Ֆրանսիայի նախագահ Ֆրանսուա Օլանդի պետական այցը Հայաստան, «որը անկասկած եւս կարեւոր հանգրվան կլինի մեր հարաբերությունների զարգացման համար»: Հետեւաբար, Փարիզում պետական այցի ժամանակ ՀՀ նախագահն իր ֆրանսիացի գործընկերոջը հրավիրել է պետական այցով ժամանել Երեւան, հակառակ պարագայում Նալբանդյանը նման պաշտոնական հայտարարություն չէր անի: Ավելին, Ֆրանսուա Օլանդն ընդունել է այդ հրավերը, այլ պարագայում ՀՀ ԱԳ նախարարը վստահաբար չէր հայտարարի, թե «հաջորդ տարի մենք սպասում ենք նախագահ Ֆրանսուա Օլանդի պետական այցը Հայաստան...»:

Ուրեմն ի՞նչ է ստացվում հիմա: Օլանդը, Սերժ Սարգսյանին հրավիրելով Փարիզ, փաստացի մերժում է ՀՀ նախագահի հրավերը` պետական այցով ժամանելու մեր երկիր: Այս համատեքստում նկատենք, որ ի տարբերություն պետական այցով մեր երկիր ժամանած նախագահ Սարկոզիի, նախագահ Օլանդն այդքան էլ ակտիվ չէ ֆրանսիական արտաքին քաղաքականության հարավկովկասյան ուղղության մեջ. Օլանդն ավելի շատ տարված է համաեվրոպական քաղաքականությամբ: Մյուս կողմից, գաղտնիք չէ, որ Ֆրանսիան եվրոպական այն քիչ երկրներից է, որոնք մեծ ավանդ ունեն Հայաստանի եվրոինտեգրացման գործընթացներում, այլ կերպ ասած` Փարիզը Հայաստանի կողքին է մեր երկրի եվրոպական ճանապարհին, այդ ճանապարհը ինչ-որ առումներով բացելով Հայաստանի առջեւ: Հետեւաբար, «ընտրելով» Մաքսային միությունը եւ դրանով իսկ մերժելով լայն եվրոինտեգրումըՙ Հայաստանը փաստորեն լավ վիճակի մեջ չի դնում Ֆրանսիային:

Արդեն այս պարագայում նախագահ Օլանդը եւ պաշտոնական Փարիզը կարիք ունեն Հայաստանի հետ պաշտոնական հարաբերությունների հստակեցման ու պարզաբանումների: Դրանք ստանալ Երեւանում Օլանդը, ինչպես հասկացանք, չի պատրաստվում, քանի որ ԵՄ առանցքային երկրներից մեկի ղեկավարի համար այլ բան է այցելել, այն էլ պետական այցով «մաքսային» երկիր, բոլորովին այլ բան է այդ երկրից պարզաբանումներ ստանալ եւ վերամշակել նրա հետ հարաբերությունները սեփական երկրում` Ելիսեյան դաշտերում:

 
 

«ԱԶԳ» ՕՐԱԹԵՐԹ #161, 25-09-2013

Հայկական էկեկտրոնային գրքերի և աուդիոգրքերի ամենամեծ թվային գրադարան

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ԱԶԴԱԳԻՐ

ՄԵԿ ՏԱՐԻ ԱՌԱՋ