RSS | FACEBOOK | NLA
ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՈՐՈՆՈՒՄ | ԱՐԽԻՎ | ԹԵՄԱ | ՀԵՂԻՆԱԿՆԵՐ

#202, 2013-11-21 > #203, 2013-11-22 > #204, 2013-11-23 > #205, 2013-11-26 > #206, 2013-11-27

«ԱԶԳ» ՕՐԱԹԵՐԹ #204, 23-11-2013



Տեղադրվել է` 2013-11-22 23:28:01 (GMT +04:00)


Ընթերցված է` 1000, Տպվել է` 22, Ուղարկվել է էլ.փոստով` 12

ԵՎՐՈՄԻՈՒԹՅՈՒՆԸ ԿՐՃԱՏՈՒՄ Է ՊԼԱՍՏԻԿԵ ՏՈՊՐԱԿՆԵՐԻ ԱՐՏԱԴՐՈՒԹՅՈՒՆԸ

Պ. Ք.

Դրանք պատուհաս են շրջակա միջավայրի համար

Գերմանական DUH բնապահպանական կազմակերպությունը հաշվարկել է, որ աշխարհում ամեն տարի օգտագործվում է 1 տրիլիոն պլաստիկե տոպրակ, եւ դրանց միայն 1/10 մասն է ենթարկվում երկրորդային վերամշակման: Միայն 2010 թ. արտադրվել է 750 հազար տոննա մեկանգամյա պլաստիկե տոպրակ: Ամենաահավորն այն է, որ պլաստիկի քայքայումը տեւում է մի քանի հարյուր տարի: Համեմատության համար նշենք, որ ավտոբուսի թղթե տոմսը քայքայվում է մի քանի շաբաթվա ընթացքում: Նույնիսկ պահածոյի թիթեղյա տուփը, Միջազգային ծովային կազմակերպության տվյալներով, լիովին քայքայվում է մոտ 100 տարում:

Պատահական չէ, որ Եվրոհանձնաժողովը պահանջում է սահմանափակել պլաստիկե տոպրակների արտադրությունը: ԵՄ շրջակա միջավայրի հարցերի գծով հանձնակատար Յանեզ Պոտոչնիկը պահանջում է ապագայում առհասարակ արգելել դրանք: «Պլաստիկե տոպրակները խորհրդանիշն են մեր հասարակության, որը սովոր է ամեն ինչ դեն նետել: Մենք դրանք օգտագործում ենք կարճ ժամանակով, իսկ հետո դրանք հարյուրամյակներով աղտոտում են շրջակա միջավայրը», ասում է նա:

Որքան ավելի հարուստ է երկիրը, այնքան ավելի շատ արտադրանք է տալիս եւ ըստ այդմ աղբ է ստեղծում: Դա տեսանելի է նոր զարգացող ասիական երկրների օրինակով: Այսպես, Ինդոնեզիայում կամ Ֆիլիպիններում բավականաչափ փող կա ապրանքների արտադրության համար, բայց չկան թափոնների օգտահանման համար պատասխանատու կառույցներ: Պլաստիկային աղբի էներգետիկ օգտագործումը, մասնավորապեսՙ այրման միջոցով, նրանց համար չափազանց թանկ է, ասում է վերօգտագործման հարցերի փորձագետ Էլլեն Գունզիլիուսը:

Նոր զարգացող երկրներում ամենից շատ աղբ ստեղծում են քաղաքների բնակիչները: «Nature» հանդեսում կանադացի գիտնական Դանիել Հորնվեգի հրապարակած հետազոտության տվյալների համաձայն, քաղաքացին միջին հաշվով կրկնակի շատ աղբ է թափում, քան գյուղացին: Աշխարհի ամենամեծ «աղբանոցի» կոչման համար կարող են պայքարել Մեխիկոյի եւ Շանհայի աղբադաշտերը: Դրանցում օրական թափվում է շուրջ 10 հազար տոննա աղբ:

Ռուանդայի մայրաքաղաք Կիգալին տարիների շարունակ բառացիորեն խեղդվում էր պլաստիկի մեջ: Ամենուրեք տոպրակներ էին: Այսօր Կիգալին Աֆրիկայի ամենամաքուր քաղաքների ցանկում է: Հինգ տարի առաջ ՄԱԿ-ը քաղաքի վարչակազմին պատվոգիր հանձնեց պլաստիկի նկատմամբ «զրոյական հանդուժողականության» քաղաքականության հաջողությունների համար:

Ներկայումս Ռուանդա այցելող բոլոր անձինք ենթարկվում են մանրակրկիտ ստուգման: «Դոյչե վելլե» ռադիոկայանը նշում է, որ պլաստիկե բոլոր տոպրակները առգրավվում են եւ անմիջապես ոչնչացվում: Էլլեն Գունզիլիուսի խոսքերովՙ պայքարի առավել արդյունավետ միջոց են միանգամյա պլաստիկե տոպրակների վրա սահմանված հարկերը, որոնք գործում են, օրինակ, Ֆինլանդիայում, Դանիայում եւ Իռլանդիայում:

 
 

«ԱԶԳ» ՕՐԱԹԵՐԹ #204, 23-11-2013

Հայկական էկեկտրոնային գրքերի և աուդիոգրքերի ամենամեծ թվային գրադարան

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ԱԶԴԱԳԻՐ

ՄԵԿ ՏԱՐԻ ԱՌԱՋ