RSS | FACEBOOK | NLA
ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՈՐՈՆՈՒՄ | ԱՐԽԻՎ | ԹԵՄԱ | ՀԵՂԻՆԱԿՆԵՐ

#206, 2013-11-27 > #207, 2013-11-28 > #208, 2013-11-29 > #209, 2013-11-30 > #210, 2013-12-03

«ԱԶԳ» ՕՐԱԹԵՐԹ #208, 29-11-2013



Միջազգային

Տեղադրվել է` 2013-11-28 23:27:34 (GMT +04:00)


Ընթերցված է` 971, Տպվել է` 15, Ուղարկվել է էլ.փոստով` 11

ԻՆՉ ԿՍՏԱՆԱ ՈՒԿՐԱԻՆԱՆ ԵՄ-ԻՑ ՀՐԱԺԱՐՎԵԼՈՒ ԴԵՊՔՈՒՄ

Պ. Ք.

Տիմոշենկոյի ազատման պայմանը

Եվրոմիության հետ Ասոցիացման համաձայնագիր չստորագրելու դեպքում Ուկրաինան Ռուսաստանից կստանա էական տնտեսական օգուտներ, որոնք անմատչելի էին մինչեւ օրս: Այդ մասին հաղորդում է ռուսական «Տրուդ» թերթը:

Հրապարակման մեջ բերվում է այն արտոնությունների ցանկը, որոնք Ուկրաինան կստանա Ռուսաստանից: Գլխավոր արտոնությունները սրանք են. գազի գինը 450 դոլարից կիջեցվի 270-ի, Կիեւը կստանա 15 մլրդ դոլար արտոնյալ վարկ, որի հատկացումը մերժել էր ԱՄՀ-ն:

Թերթի պնդման համաձայնՙ ՌԴ նախագահի խորհրդական Սերգեյ Գլազեւը հայտարարել է ատոմային էներգետիկայի, ավիաշինության եւ հրթիռաշինության ոլորտներում Ուկրաինայի հետ համագործակցության ընդլայնման հնարավորության մասին: Մոսկվան նաեւ պատրաստ է համատեղ արտադրել «Ան-124», «Ան-140» եւ «Ան-148» օդանավեր եւ տրամադրել միջուկային փակ շրջափուլի ստեղծման տեխնոլոգիա:

Նախագահ Վիկտոր Յանուկովիչը ուկրաինական հեռուստաալիքներին տված հարցազրույցում հայտարարել է, թե Եվրոմիության հետ Ասոցիացման համաձայնագրի ստորագրումը «թակարդ» կդառնար Ուկրաինայի համար: Միեւնույն ժամանակ նախագահն ակնարկել է, որ Վիլնյուսի գագաթաժողովում Ասոցիացման համաձայնագրի ստորագրումը հնարավոր է, եթե Ուկրաինան ստանա համարժեք ֆինանսական օգնություն: Խոսքը «կայունացման հիմնադրամ» ստեղծելու մասին է, որն Ուկրաինային թույլ կտար հաղթահարել «ճգնաժամային պահերը»:

Ֆինանսավորման գումարի առնչությամբ Յանուկովիչը հայտարարել է հետեւյալը. «Կան տարբեր գնահատականներ, տարբեր փողեր: Ամեն տարի անհրաժեշտ է առնվազն 20 միլիարդ: Իսկ ընդհանուր առմամբ մինչեւ 2017 թվականը կպահանջվի մոտ 160 միլիարդ»:

Ինչ վերաբերում է բանտարկված նախկին վարչապետ Յուլյա Տիմոշենկոյի ազատման հնարավորությանը, Յանուկովիչն ասել է, որ ինքը պատրաստ է ազատ արձակել Տիմոշենկոյին, եթե նա «փոխհատուցի երկրի բյուջեին պատճառած վնասը»: Ընդսմին նախագահն ընդգծել է, որ տվյալ իրավիճակը կարող է հարթել միայն դատարանը: Այդ մասին հաղորդում է Ռուսաստանի իրավական եւ դատական տեղեկատվության գործակալությունը:

«Եթե Տիմոշենկոն հանցանք չի գործել, դատարանը պատասխան կտա: Իսկ եթե գործել է, թող վճարի եւ հետո խնդրի կամ պահանջի ազատություն: Ի դեպ, Ուկրաինայի օրենքներն այժմ դա թույլ են տալիս», հայտարարել է Յանուկովիչը:

Տիմոշենկոն 2011-ի վերջերից 7-ամյա բանտարկության է դատապարտված Ռուսաստանի հետ 2009-ին գազային համաձայնագրի ստորագրման ժամանակ լիազորությունների վերազանցման համար: Յանուկովիչը պնդում է, թե այդ համաձայնագրով Ուկրաինային պատճառված վնասը կազմում է 20 մլրդ դոլար:

 
 

«ԱԶԳ» ՕՐԱԹԵՐԹ #208, 29-11-2013

Հայկական էկեկտրոնային գրքերի և աուդիոգրքերի ամենամեծ թվային գրադարան

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ԱԶԴԱԳԻՐ

ՄԵԿ ՏԱՐԻ ԱՌԱՋ