RSS | FACEBOOK | NLA
ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՈՐՈՆՈՒՄ | ԱՐԽԻՎ | ԹԵՄԱ | ՀԵՂԻՆԱԿՆԵՐ
#209, 2013-11-30 > #210, 2013-12-03 > #211, 2013-12-04 > #212, 2013-12-05 > #213, 2013-12-06

«ԱԶԳ» ՕՐԱԹԵՐԹ #211, 04-12-2013



ՍԻՐԻԱ

Տեղադրվել է` 2013-12-03 23:24:06 (GMT +04:00)


Ընթերցված է` 964, Տպվել է` 22, Ուղարկվել է էլ.փոստով` 13

ԱՍԱԴԸ ԿՄԵՂԱԴՐՎԻ ՊԱՏԵՐԱԶՄԱԿԱՆ ՀԱՆՑԱԳՈՐԾՈՒԹՅՈՒՆՆԵՐԻ ՄԵՋ

Ապստամբներն առեւանգել են միանձնուհիների

ՄԱԿ-ի Մարդու իրավունքների հանձնաժողովի նախագահ Նավի Պիլլայը հայտարարել է, որ իր գերատեսչությունը ստացել է ապացույցներ, որ Սիրիայի բարձրագույն ղեկավարությունը (ներառյալ նախագահ Բաշար Ասադը) մեղսակից է պատերազմական հանցագործությունների եւ մարդկայնության դեմ ուղղված հանցագործությունների: Այդ մասին հաղորդում է Ֆրանսպրես գործակալությունը:

Թե կոնկրետ որ հանցագործությունների մասին է խոսքը, ՄԱԿ-ի պաշտոնյան չի մանրամասնել: Պիլլայը չի պատմել նաեւ ապացույցների մասին: Նա միայն ասել է, որ փաստաթղթերը իր չհրկիզվող պահարանում են եւ կհրապարակվեն դատարանում:

Ավելի վաղ նախագահ Ասադին եւ նրա շրջապատին արդեն ամբաստանել էին պատերազմական հանցագործությունների մեջ: Այսպես, 2013-ի սեպտեմբերին ԱՄՆ-ը հայտարարել էր, թե հավաքել է Ասադի եւ նրա վարչակարգի հանցավորությունն ապացուցող ավելի քան 200 հազար էջ փաստաթղթեր: Ամերիկացիներն այսօր եւս պնդում են, թե հավաքված փաստերի քանակն ու որակը հնարավորություն կտան Ասադի դատավարությունը դարձնելու պատմության մեջ առավել հիմնավորվածներից ու թափանցիկներից մեկը:

Ինչ վերաբերում է բուն Սիրիայի դեպքերին, դեկտեմբերի լույս 3-ի գիշերը հայտնի դարձավ, որ երկուշաբթի օրը Մաալուլա քաղաքի Սուրբ Ֆեկլա հույն ուղղափառ վանք ներխուժած իսլամիստ գրոհայինները պատանդ են վերցրել 12 միանձնուհիների (որոնցից մեկը վանքի մայրապետն է): Այդ տեղեկությունը BBC-ին տված հարցազրույցում հաստատել է Դամասկոսում Հռոմի պապի նվիրակ Մարիո Զենարին, վկայակոչելով Անտիոքի ուղղափառ եկեղեցու հայտարարությունը:

Տեղական SANA գործակալությունը հաղորդում է, որ «Ալ Ղաիդայի» հետ կապված գրոհայինները խժդժություններ են արել ոչ միայն կանանց մենաստանում, այլեւ մերձակա մի քանի եկեղեցիներում: Վերջին տեղեկությունների համաձայն, գրոհայինները միանձնուհիներին տարել են Դամասկոսից 80 կմ հեռու գտնվող Յաբրուդ քաղաք:

Մաալուլայի բնակիչները պահպանել են նախաարաբական սիրիական մշակույթը: Դա միակ քաղաքն է, ուր մինչեւ օրս խոսում են արամեերենի բարբառներից մեկով:

Պատանդառությունը համընկավ քաղաքի վրա կառավարական զորքերի ձեռնարկած հարձակմանը: Մաալուլան սեպտեմբերից սիրիացի ապստամբների ձեռքին է: Ապստամբների չափավորական, արեւմտամետ մասին միավորող «Սիրիական ազատ բանակը» քաղաքի նկատմամբ կարողացավ վերահսկողություն հաստատել իսլամիստ արմատականների «Ան-Նուսրա ճակատ» խմբավորման օգնությամբ, որը կապված է «Ալ Ղաիդայի» հետ: Քրիստոնյա բնակչության վրա իսլամիստների հարձակումների հետեւանքով քաղաքը լքել է մոտ 3 հազար մարդ: Փախստականների մեծ մասը հաստատվել է Դամասկոսի քրիստոնեական թաղամասում, ոմանք էլ գնացել են Լիբանան կամ պատսպարվել Սիրիայի ուրիշ մասերում գտնվող քրիստոնեական վանքերում: Մաալուլայում մնացել էին Սուրբ Ֆեկլա վանքի ընդամենը 40 միանձնուհիներ, որոնք հոգում էին տեղացի որբերի մասին: Քաղաքում կան նաեւ մահմեդական բնակիչներ:

 
 

«ԱԶԳ» ՕՐԱԹԵՐԹ #211, 04-12-2013

Հայկական էկեկտրոնային գրքերի և աուդիոգրքերի ամենամեծ թվային գրադարան

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ԱԶԴԱԳԻՐ

ՄԵԿ ՏԱՐԻ ԱՌԱՋ