RSS | FACEBOOK | NLA
ԼՐԱՀՈՍ | ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՈՐՈՆՈՒՄ | ԱՐԽԻՎ | ԹԵՄԱ | ՀԵՂԻՆԱԿՆԵՐ


«ԱԶԳ» ՇԱԲԱԹԱԹԵՐԹԻ ԸՆԹԵՐՑՈՂՆԵՐԻՆ. Սիրելի «ԱԶԳ»ականներ, այս օրերի համար ոչ անսպասելի հանգամանքների պատճառով, «ԱԶԳ» շաբաթաթերթի հունիսի 5-ի համարի նյութերը հրապարակվում են վաղը՝ 6 հունիսի առավոտից սովորական՝ azg.am ԼՐԱՀՈՍ հպման տակ, եւ, միաժամանակ, azgonline.am մեր կայքէջերում։ Գումարած թերթում լույս տեսած նյութերի հրապարակվում են նաեւ այլ հոդվածներ ու մեկ հարցազրույց, որոնք տեղի սղության պատճառով դուրս են մնացել թերթի էջերից։ Ապավինում ենք ընթերցողների ներողամտությանը՝ կամքից անկախ պատճառներով պատահած ուշացման համար։ Խմբագրություն

ԼՐԱՀՈՍ    |    «ԱԶԳ»-Ի ՎԵՐՋԻՆ ՀԱՄԱՐԸ
#045, 2015-12-04 > #046, 2015-12-11 > #047, 2015-12-18 > #048, 2015-12-25

«ԱԶԳ» ՕՐԱԹԵՐԹ #47, 18-12-2015



Տեղադրվել է` 2015-12-17 23:26:36 (GMT +04:00)


Ընթերցված է` 1218, Տպվել է` 7, Ուղարկվել է էլ.փոստով` 1

ԱՄՆ-Ը ԳՈՐԾՈՂՈՒԹՅԱՆ ԱԶԱՏՈՒԹՅՈՒՆ Է ՏԱԼԻՍ ԷՐԴՈՂԱՆԻՆ

Պ. Ք.

Իրաքի իշխանությունները օրերս ՄԱԿ-ի Անվտանգության խորհրդից պահանջեցին, որ թուրքական զորքը անհապաղ եւ անվերապահորեն դուրս բերվի երկրի հյուսիսից: «Դա համարվում է ՄԱԿ-ի կանոնադրության սկզբունքների կոպիտ խախտում եւ Իրաքի ինքնիշխանության ու տարածքային ամբողջականության ոտնահարում», նշեց Իրաքի դեսպան Մուհամմեդ Ալի ալ-Խաքինՙ ԱՄՆ-ի դեսպան եւ դեկտեմբերին ՄԱԿ-ի ԱԽ նախագահ Սամանթա Փաուերին գրած նամակում:

Նախօրեին Թուրքիայի նախագահ Ռեջեփ Թայիփ Էրդողանը հայտարարել էր, որ Իրաքն ունի ՄԱԿ-ի ԱԽ-ին դիմելու իրավունք, բայց դա «չի լինի ազնիվ քայլ»: Որքան էլ տարօրինակ թվա, նույնպիսի դիրք բռնեց նաեւ միջազգային իրավունքի ջերմեռանդ պաշտպան ԱՄՆ-ը: Այն հարցին, թե ԱՄՆ-ը ինչու չի ազդում ՆԱՏՕ-ի եւ հակաահաբեկչական կոալիցիայի գծով իր գործընկերոջ վրա, պետդեպարտամենտի ներկայացուցիչ Ջոն Կիրբին պատասխանեց, որ կողմերը պետք է ինքնուրույն հաղթահարեն ծագած խնդիրը: Երբ RT հեռուստաալիքի թղթակիցը ակնարկեց միջազգային իրավունքը եւ Բաղդադի նկատմամբ ԱՄՆ-ի պարտավորությունները, Կիրբին դա անվանեց հիմար հարցադրում:

Տվյալ հարցում ռուսական կողմն ունի տրամագծորեն հակառակ դիրքորոշում: Դաշնության խոհրդի պաշտպանութան եւ անվտանգության հանձնախմբի առաջին փոխնախագահ Ֆրանց Կլինցեւիչը հայտարարեց, որ ԱԽ-ն պարտավոր է Թուրքիայից պաշտոնապես պահանջել Իրաքից զորքի դուրսբերում: «Եթե Էրդողանին հիմա չկանգնեցնենք, ապա վաղը մեզ կսպասեն նոր սադրանքներ», ասաց նաՙ ավելացնելով, որ «Էրդողանին թվում է, թե ինքը ամեն ինչ կմարսի»:

Բացառված չէ, որ հենց այդպես էլ լինի: Անկարայի գլխավոր դաշնակից ԱՄՆ-ը Թուրքիայի ղեկավարությանը նույնիսկ չդատապարտեց ռուսական «Սու-24»-ի ոչնչացումից հետո: Իսկ երբ դեկտեմբերի 4-ին թուրքերի տանկային գումարտակը մոտեցավ Մոսուլին եւ քաղաքի մոտակայքում հիմնավորվեց իբր քուրդ աշխարհազորայինների պատրաստմանն օժանդակելու համար, Վաշինգտոնը բնավ չարձագանքեց, երբ Իրաքի վարչապետը ՆԱՏՕ-ին խնդրեց ազդել Անկարայի վրա:

Մինչդեռ վերջին երկու տարում Ուկրաինայի դեպքերի կապակցությամբ ԱՄՆ-ը բազմաթիվ հայտարարություններ է արել երկրների ինքնիշխանության խախտումների անթույլատրելիության վերաբերյալ: Բայց ԱՄՆ-ի դաշնակիցներին դա կարծես թե չի վերաբերում: Իսկ գուցե տվյալ դեպքում իրավիճակը դո՞ւրս է եկել վերահսկողությունից:

ՌԴ Նորագույն պետությունների միջազգային ինստիտուտի «Մերձավոր Արեւելք-Կովկաս» հետազոտական կենտրոնի տնօրեն Ստանիսլավ Տարասովը նշում է, որ տարածաշրջանում Սիրիայից հետո Իրաքը դարձել է շահերի բախման նոր կետ: Ռուսական ռմբակոծիչ խփելովՙ Անկարան փորձեց Ռուսաստան-ՆԱՏՕ առճակատում հրահրել: Երբ այդ սադրանքը ձախողվեց, թուրքերը քայլ ձեռնարկեցին Իրաքի դեմ:

Դեռ անցյալ դարավերջին Անկարա-Բաղդադ համաձայնություն էր կայացվել Իրաքի տարածքում PKK-ի դեմ թուրքական օդուժի կամ հատուկ ջոկատների հարվածների հնարավորության վերաբերյալ: Սակայն վերջերս Բաղդադը այլեւս աչք չի փակում քուրդ անջատականների հետ Անկարայի կապերի եւ էներգակիրների տեղափոխման վրա: Թուրքական զորքը Մոսուլի շրջան է մտել առանց Բաղդադին տեղեկացնելու, դրանով իսկ հարուցելով վերջինիս վրդովմունքը եւ դիրքորոշման փոփոխությունը: Տարասովի կարծիքով, այդ փոփոխության պատճառն այն է, որ Բաղդադը զգաց Թեհրանի եւ Մոսկվայի աջակցությունը: Ներկայումս Իրաք-Իրան համագործակցությունը խորանում է, եւ Իրաքը սկսում է իրեն պահել ինչպես վայել է միջազգային իրավունքի սուբյեկտին: Երկու կոալիցիաների շահերը բախվում են Իրաքի հյուսիսում:

Ղրիմի առնչությամբ Ռուսաստանին դատապարտող ԱՄՆ-ը Իրաքի ինքնիշխանության խախտման դեպքում լռում է: Պատճառը դաշնակից Թուրքիային չնեղացնելու ձգտումն է: Այդուհանդերձ ԱՄՆ-ը փորձում է ինչ-որ ձեւով զսպել թուրքերին: Խոսքը թուրք-սիրիական սահմանի 98 կլիոմետրանոց հատվածը փակելու մասին է: Դրա համար անհրաժեշտ է մոտ 30 հազար զինվոր: Թուրքերը նման ազատ ուժեր չունեն, եւ Արեւմուտքը պատրաստ է տրամադրել դրանք: Դա կլինի Անկարայի սիրիական նկրտումների հերթական ձախողումը:

ԱՄՆ-ը ունի իր արկածախնդիր դաշնակից Էրդողանի վրա ազդելու տնտեսական եւ ռազմական լծակներ, սակայն դրանք գործի չի դնում, թերեւս սպասելով այն պահին, երբ Թուրքիան կհասնի անդառնալիության կետին: Պատահական չէ, որ ներկայումս մեծ ուշադրություն է դարձվում քրդերին: Սիրիա-Իրաք-Թուրքիա եռանկյունում կարող է ստեղծվել քրդական պետություն, որի նախօրինակը առկա է Իրաքի հյուսիսում: Այդ դեպքում Թուրքիան կկորցնի իր արեւելյան վիլայեթներից մի քանիսը: Բացի դրանից, Թուրքիան հեղաշրջումների երկիր է: Սակայն թուրք ղեկավարների քարոզչությունը եւ գրեթե ամենօրյա ամպագոռգոռ ելույթները բթացնում են մարդկանց զգոնությունը: Այս տարի ընդդիմությանը ճնշելով եւ ժողովրդին ահաբեկելով (ինչպես նաեւ սաուդցիներից 10 մլն դոլար ստանալով)ՙ Էրդողանի կուսակցությունը մի կերպ հաղթահարեց 50 տոկոսի սահմանագիծը: Բայց հասարակությունը պառակտված է, եւ ոչ բոլոր իշխանական խմբավորումներն են պաշտպանում Էրդողանի քաղաքականությունը:

Թուրքիայում չի բացառվում ոչ մի սցենար. պետական հեղաշրջում, քաղաքացիական պատերազմ, երկրի մասնատում:

 
 

«ԱԶԳ» ՕՐԱԹԵՐԹ #47, 18-12-2015

Հայկական էկեկտրոնային գրքերի և աուդիոգրքերի ամենամեծ թվային գրադարան

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ԱԶԴԱԳԻՐ