RSS | WAP | FACEBOOK | PDF | PDF-Culture
ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՄԵՐ ՄԱՍԻՆ | ՈՐՈՆՈՒՄ | ԱՐԽԻՎ | ԹԵՄԱ | ՀԵՂԻՆԱԿՆԵՐ
ԲԱԺԱՆՈՐԴԱԳՐՎԵՔ «ԱԶԳ»ԻՆ
ԼՈՒՅՍ Է ՏԵՍԵԼ "ԱԶԳ-ՄՇԱԿՈՒՅԹ" ՀԱՎԵԼՎԱԾԻ ՀԵՐԹԱԿԱՆ ՀԱՄԱՐԸ
#045, 2015-12-04 > #046, 2015-12-11 > #047, 2015-12-18 > #048, 2015-12-25

«ԱԶԳ» ՕՐԱԹԵՐԹ #47, 18-12-2015



ՏԱՐԱԲՆՈՒՅԹ

Տեղադրվել է` 2015-12-17 23:26:36 (GMT +04:00)


Ընթերցված է` 1076, Տպվել է` 4, Ուղարկվել է էլ.փոստով` 1

ԿԱՐԵՎՈՐԸ ՍԿԶԲՈՒՆՔԱՅՆՈՒԹՅՈՒՆԸ ՊԱՀՊԱՆԵԼՆ Է

ՄԱՐԻԱՄ

Լույս է տեսել «+Կինո» ամսագրի նոր համարը: Մեր թղթակցի այն հարցին, թե որն է ամսագրի այս համարի առանձնահատկությունը` գլխավոր խմբագիր Ռոբերտ Մաթոսյանն ասաց.

- Հայաստանի կինեմատոգրաֆիստների միության «+Կինո» ամսագիրը արդեն 7-րդ տարին է ընդամենը մեկ խնդիր է իրականացնում. մշակութային կամուրջ դառնալ հին ու նոր սերունդների միջեւ: Ասելիքիս հավաստումը կարելի է համարել Սոս Սարգսյանի «Հրաշալի իմ երիտասարդ կամ ինչու եմ խուսափում նայել քո աչքերին» նամակը, որով բացվում է «+Կինոյի» այս համարը: Այս նամակը չապլինյան հզորության մի ճշմարիտ ձոն է, կոչնակ` ուղղված արտիստից բեմական իր կրտսեր «զավակներին»: Բեմ բարձրացող ամեն մի դերասանի համար տպագրված այս նամակը աղոթքի պես մի բան է...

Հաջորդը «Նրա հաջողությունների գաղտնիքը նաեւ ընտանիքն է» հարցազրույցը անդրադառնում է Հայաստանի ժողովրդական արտիստ Աշոտ Ղազարյանի ստեղծագործական ուղուն:

«Գրիմը կերպարի ստեղծման սկզբնաղբյուրն է» հոդվածը ներկայացնում է «Հայֆիլմ» կինոստուդիայի դիմահարդարների ավանդույթները եւ նրանց այժմյան գործունեությունը: Հանդեսը տեղեկացնում է, որ Վարշավայում կայացած պատմական եւ ռազմական ֆիլմերի միջազգային կինոփառատոնում հայր եւ որդի Վրեժ եւ Տարոն Պետրոսյանների «Ուրիշ հայրենիք, Մարիա Յակոբսենի օրագրությունը» ֆիլմն արժանացել է «Իկոնա» մրցանակին:

«Եթե հավակնորդների հաջորդ մրցաշարը Երեւանում կայանա, ես խոստանում եմ հաղթել» վերնագիրն է կրում ամսագրի գլխավոր խմբագրի երկխոսությունը մեր ժամանակների մեծագույն շախմատիստ Լեւոն Արոնյանի հետ: Ամսագիրն անդրադարձել է Չինաստանի Շանհայ քաղաքում ստեղծագործող Ռուբեն Գինեյի (Գասպարյան) «Անդին, հայոց ճանապարհորդություն տարեգրություն» ֆիլմին:

«Նկարն ինձ համար հույզ եւ տրամադրություն է». այսպես է բնութագրում ստեղծագործական իր ներաշխարհը նկարիչ Շմավոն Շմավոնյանը, ով բազմաթիվ նվիրատվություններ է արել ե՛ւ Հայաստանում, ե՛ւ ԱՄՆ-ում:

«Ռեպորտաժ նկարահանման հրապարակից» խորագրի ներքո «+Կինո»-ին տված հարցազրույցում կինոռեժիսոր Էդգար Բաղդասարյանը հայտնում է, որ շուտով հանդիսատեսի դատին կհանձնվի 16 սերիանոց իր նոր` «Հատուկ բաժին» դետեկտիվ ֆիլմը:

«Երբ կա ցանկություն, միջոցները գտնվում են» հոդվածում ներկայացվում է «Եվրոպական հեռանկարներ» երաժշտական փառատոնի հայաստանյան գործունեությունը եւ այն շնորհակալ գործը, որ կատարում է նրա ղեկավար Ստեփան Ռոստոմյանը:

«Ազգային ոգին կենսաբանորեն փոխանցվում է նախնիներից» հոդվածում արվեստագիտության թեկնածու Ծովինար Մովսիսյանը հանգամանալից վերլուծում է կոմպոզիտոր Ավետ Տերտերյանի գործունեությունը:

«Նրանք քսանն էին, 20 հնչակյան հավերժի ճամփորդները» ընդարձակ հոդվածում անդրադարձ է կատարվում ազգային ազատագրական պայքարին ծառայած եւ իրենց հավատամքին կյանքը նվիրաբերած 20 հայորդիներին:

«Լուսանկարչական վերնիսաժ» մշտական բաժնում այս անգամ ներկայացվել են ՀՀ վաստակավոր ժուռնալիստ Մարտին Շահբազյանի լուսանկարները:

Հանդեսում արդի պրոդյուսերական դպրոցի խնդիրների ու պրոբլեմների մասին է պատմում «Մոսկվա» կինոթատրոնի տնօրեն Մարտին Ադոյանը:

«Ճամբարը մեր տունն է, մենք նրա տերը» վերնագրով հարցազրույցը ներկայացնում է Լոռվա գեղատեսիլ վայրում գտնվող «Գուգարք» ճամբարը, որտեղ այս տարի հանգստացել են նաեւ 80 սիրիահայ երեխաներ: Այդ մասին է խոսում ճամբարի երկարամյա ղեկավար Սեյֆուլինա Դանիելյանը:

«Էրազմ Մելիք-Քարամյան» հոդվածը բնութագրական մի ակնարկ է` նվիրված ԽՍՀՄ ժողովրդական արտիստին, լեգենդար Կամոյին նվիրված ֆիլմերի ռեժիսորներից մեկին:

Տաղանդաշատ նկարիչ Գեորգի Յակուլովին է նվիրված Հայաստանի ազգային պատկերասրահի գեղանկարչության բաժնի վարիչ Իրինա Բագդամյանի վերլուծական հոդվածը, իսկ կինոգետ Սիրանույշ Գալստյանը պատմում է Իտալիայի Բոլոնիա քաղաքում անցկացված կինոփառատոնի մասին, որտեղ Մեծ եղեռնի 100 ամյակի կապակցությամբ հատուկ մի բաժին է նվիրվել հայկական կինոյին:

Վերջում կցանկանայի ավելացնել, որ այսօր լրանում է «+Կինո» ամսագրի խմբագրական խորհրդի նախագահ, ՀՀ ժողովրդական արտիստ, կինոռեժիսոր, Հայաստանի կինեմատոգրաֆիստների միության նախագահ Ռուբեն Գեւորգյանցի ծննդյան 70 ամյակը, որի առիթով «+Կինո»-ի ընթերցողների անունից ջերմորեն շնորհավորում եմ:

 
 

«ԱԶԳ» ՕՐԱԹԵՐԹ #47, 18-12-2015

AZG Daily #46, 07-12-2018

Հայկական էկեկտրոնային գրքերի և աուդիոգրքերի ամենամեծ թվային գրադարան

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ՀԱՅՈՑ ՑԵՂԱՍՊԱՆՈՒԹՅԱՆ 100-րդ ՏԱՐԵԼԻՑ

«ԱԶԳ» ՕՐԱԹԵՐԹԻ ՆՈՐ ՀԵՌԱԽՈՍԱՀԱՄԱՐՆԵՐՆ ԵՆ

ԱԶԴԱԳԻՐ