RSS | FACEBOOK | NLA
ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՈՐՈՆՈՒՄ | ԱՐԽԻՎ | ԹԵՄԱ | ՀԵՂԻՆԱԿՆԵՐ

WWW.AZGONLINE.AM
#005, 2016-02-12 > #006, 2016-02-19 > #007, 2016-02-26 > #008, 2016-03-04 > #009, 2016-03-11

«ԱԶԳ» ՕՐԱԹԵՐԹ #7, 26-02-2016



Տեղադրվել է` 2016-02-27 19:00:45 (GMT +04:00)


Ընթերցված է` 1277, Տպվել է` 9, Ուղարկվել է էլ.փոստով` 4

ԷՐԴՈՂԱՆԸ ՌԱԶՄԱՎԱՐԱԿԱՆ ՄՂՁԱՎԱՆՋԻ ՊԱՏՃԱՌ

Պ. Ք.

Նախագահ Ռեջեփ Թայիփ Էրդողանի նկրտումները հանգեցրել են Ռուսաստանի հետ Թուրքիայի հարաբերությունների սրմանը, ահաբեկությունների ալիքի, քրդերի ու նրանց կողմնակիցների հետ բախումների, գտնում են ամերիկյան ԶԼՄ-ները: Էրդողանի եւ իր վարչակազմի քաղաքականությունը Թուրքիայի համար կարող է դառնալ ռազմավարական մղձավանջ, կարծում է «Վաշինգտոն փոստ» թերթի մեկնաբանը: Ռուսական «Սու-24»-ի ոչնչացումից հետո Ռուսաստանի հետ հարաբերությունների միտումնավոր սրումը, Սիրիայում հակամարտության ծավալումը, քուրդ փոքրամասնության հետ բանակցությունների ձախողումը իրենց հերթին հանգեցրին ԱՄՆ-ի հետ տարաձայնությունների: Այս ամենը կարող է հանգեցնել ներթուրքական երկարատեւ ճգնաժամի, նշում են թերթի հարցմանը ենթարկված վերլուծաբանները: «Թուրքիան բազմակողմանի աղետի շեմին է: Այդ երկիրն անցյալում ուներ խնդիրներ, բայց այժմ երեւույթների ընդգրկումը գերազանցում է երեւակայելի բոլոր սահմանները», թերթին պատմել է Անկարայի համալսարանի պրոֆեսոր Գոխան Բաչիկը:

Թուրքական «Հաբերթուրք» թերթը գրում է, որ երկիրը միջազգային մեկուսացման շեմին է իր ղեկավարության գործողությունների պատճառով: Էրդողանի վարչակազմը բոլորի հետ հարաբերությունները փչացրել է այն աստիճան, որ չի կարողանում ներդաշնակ գործողությունների մասին պայմանավորվել նույնիսկ մերձավորագույն դաշնակիցների հետ:

«Վաշինգտոն փոստը» նման անհետեւողական քայլերի օրինակ է համարում ԱՄՆ-ի կողմից սիրիացի քրդերի պաշտպանության առնչությամբ Էրդողանի արած կտրուկ հայտարարությունները: Նա ամերիկացիներին կոչ արեց ընտրություն կատարել Թուրքիայի եւ սիրիացի քրդերի Դեմոկրատական միության կուսակցության միջեւ, որին ԱՄՆ-ը դաշնակից է համարում «Իսլամական պետության» դեմ մղվող պայքարում: «Սու-24»-ի միջադեպի հարցում թուրքական կողմին պաշտպանող ԱՄՆ-ը Անկարայից պահանջել է դադարեցնել քրդերի դիրքերի գնդակոծումները: Սիրիայի հակամարտությանը Անկարայի ակտիվ միջամտությունը ոչ միայն վատացրեց հարաբերությունները նրա մերձավոր դաշնակիցների հետ, այլեւ ահագնացրեց ահաբեկությունների ալիքը բուն Թուրքիայում: Այսպես, փետրվարի 17-ին Անկարայում պայթյունից զոհվեց 28 մարդ (մեծ մասը զինվորականներ), վիրավորվեց առնվազն 60 մարդ: Երկրում աճում է ներքին դժգոհությունը, ինչպես նաեւ անկում է ապրում եկամուտի կարեւոր աղբյուր հանդիսացող զբոսաշրջությունը:

Տվյալ երեւույթների գլխավոր պատճառն այն է, որ Էրդողանը սխալ է գնահատում Թուրքիայի տեղը համաշխարհային ասպարեզում, գրում է «Վաշինգտոն փոստը»: «Էրդողանը սխալ արտաքին քաղաքականություն է վարում չափազանցված ինքնագնահատման պատճառով: 2010 թվականին նա անչափ վստահ էր, թե Թուրքիան ողջ աշխարհի սիրելին է, եւ դա խփեց նրա գլխին», եզրակացնում է Թուրքիայի փորձագետ, Վուդրո Վիլսոնի անվան կենտրոնի մերձավորարեւելյան ծրագրի տնօրեն Հենրի Բարկին:

 
 

«ԱԶԳ» ՕՐԱԹԵՐԹ #7, 26-02-2016

Հայկական էկեկտրոնային գրքերի և աուդիոգրքերի ամենամեծ թվային գրադարան

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ԱԶԴԱԳԻՐ