RSS | WAP | FACEBOOK | PDF | PDF-Culture
ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՄԵՐ ՄԱՍԻՆ | ՈՐՈՆՈՒՄ | ԱՐԽԻՎ | ԹԵՄԱ | ՀԵՂԻՆԱԿՆԵՐ
ԲԱԺԱՆՈՐԴԱԳՐՎԵՔ «ԱԶԳ»ԻՆ
ԼՈՒՅՍ Է ՏԵՍԵԼ "ԱԶԳ-ՄՇԱԿՈՒՅԹ" ՀԱՎԵԼՎԱԾԻ ՀԵՐԹԱԿԱՆ ՀԱՄԱՐԸ
#024, 2018-06-22 > #025, 2018-06-29 > #026, 2018-07-06 > #027, 2018-07-14 > #028, 2018-07-20

«ԱԶԳ» ՕՐԱԹԵՐԹ #26, 06-07-2018



Տեղադրվել է` 2018-07-06 11:21:14 (GMT +04:00)


Ընթերցված է` 4318, Տպվել է` 634, Ուղարկվել է էլ.փոստով` 0

Ո՞ՒՄ ԳԱԶԱՆՆԵՐԸ ԿՀԱՂԹԵՆ

ՀՈՎԻԿ ԱՖՅԱՆ

Եթե Հանրապետության ոստիկանապետը չի հավատում, որ մարդն իսկապես սայթաքել է ջրի վրա, ընկել ու արյունլվա եղել, ոչ թե Գագիկ Ծառուկյանն ու նրա թիկնապահ Էդոն են ծեծել, ապա թույլ տվեք, որ ես էլ չհավատամ սայթաքելու վարկածին: Չէ, տեսականորեն սայթաքել հնարավոր է, մանավանդ երբ տեսնում ես Գագիկ Ծառուկյանին ու նրա թիկնապահ Էդոյին դիմացդ կանգնած ու զգում ես, թե ինչպես են քեզ նայում Էդոն ու Ծառուկյանի` երախը բաց առյուծը. նույնիսկ եթե գետնին այդ պահին ջուր չլինի, հաստատ կսայթաքես, բայց մարդն սկզբում պնդում էր, որ իրեն թիկնապահ Էդոն ծեծել է, ընդ որում առաջինն իրեն հարվածել է Ծառուկյանը: Հետո, արդեն հիվանդանոցում մարդն ասում է, որ իրականում իրեն Էդոն չի ծեծել, ուղղակի մեկ-մեկ նայել է, Ծառուկյանն էլ չի հարվածել, ավելինՙ իրենք լավ բարեկամներ են ու շուտով, որ հիվանդանոցից դուրս գա, գնալու է հանդիպի հետը, լավ ուտեն-խմեն, սայթաքեն, ներողություն, քեֆ անեն: Ու որպեսզի այս մարդու խոսքերն ավելի արժանահավատ լինեն, նրա կինը եւս հայտարարել է, որ ի՞նչ եք ասում, ինչպե՞ս թե պարոն Գագիկ Ծառուկյան ջանն ու պարոն Էդո թիկնապահ ջանը ծեծել են ամուսնուս, իհարկե չեն ծեծել, ուղղակի ոտքը սայթաքել է, ընկել է:

Բայց շատ չխորանանք այս մարդու սայթաքումների մեջ. այս պատմությունն ինձ ուշագրավ թվաց բոլորովին այլ տեսանկյունից: Բանն այն է, որ Գագիկ Ծառուկյանը Սերժ Սարգսյանի հրաժարականից մեկ ու կես ժամ առաջ միացավ Նիկոլ Փաշինյանին: Ավելինՙ նրանք Հանրապետության հրապարակում համատեղ ֆոտոշարք ունեն, որտեղ երեւում է, թե որքան է Ծառուկյանը երջանիկ ու հպարտ, Փաշինյանն էլ հետաքրքիր, ժպտերես: Հիմա Փաշինյանի կաբինետում Ծառուկյանի մարդիկ կան, օրինակՙ փոխվարչապետ Մհեր Գրիգորյանը, կամ Հրաչյա Ռոստոմյանը, հիմա իրավապահ կառույցները, «ապօրինի հարստացածների բացահայտում» սրբասուրբ ու հայրենասիրական ծրագրի շրջանակներում ամեն օր մեկին բերման են ենթարկում, առնվազն մեկին, ով հանդգնել է հարստանալ` չքավորության տարիներին ու այս մարդկանց մեջ Գագիկ Ծառուկյանը ոչ մի կերպ չի մտնում, չնայած ինքը եւս շատ հարուստ է, չնայած ինքը եւս համ գործարար է, համ ԱԺ պատգամավոր, չնայած իր մասին եւս ասում են, որ մարդկանց է ծեծել, չնայած ինքը եւս անհատական գազանանոց ունի եւ թիկնապահ Էդո, որն, ի դեպ, ոչ թե մենակ է պաշտպանում Նորին գերազանցության անվտանգությունը, այլեւ Ծառուկյանի թիկնազորի պետն է, դե այսինքն Ծառուկյանը թիկնազոր էլ ունի, Էդոն էլ դրա պետն է: Ու այս ամենըՙ նոր Հայաստանում:

Հիմա, երբ այս մարդը հայտնվեց ու ասաց, որ իրեն նախ հարվածել է Ծառուկյանը, ապա շարունակել է Էդոն, եւ երբ վերջինս ձերբակալվեց, ես իսկապես մտածեցի, որ Նոր Հայաստանը գալիս է, քանի որ ոչ թե ապօրինի հարստացածներին ու ծեծողներին են բռնում, այլ դրանց բռնելուց նշանակություն չեն տալիս բռնողների ու բռնվողների մերձավորության մակարդակին: Բայց երբ տուժողն ասաց, որ ինքն իրականում սայթաքել է, ես հասկացա, որ Նոր Հայաստանը դեռ չի գալիս, այստեղ դեռ մերձավորները միշտ անմեղ են, հակառակորդներըՙ միշտ մեղավոր: Չնայած, երբ ոստիկանապետ Օսիպյանն ասաց, որ ինքը չի հավատում, թե ինչպե՞ս կարելի է սայթաքել ու նման վնասվածքներ ստանալ, ես հասկացա, որ Նոր Հայաստանի հույսը դեռ կա:

Միայն մի բան չեմ հասկանում. եթե Գագիկ Ծառուկյանի ու Մանվել Գրիգորյանի անհատական գազանանոցներում պահվող կենդանիններին կռվացնենք, ո՞ւմ գազանները կհաղթեն...

 
 

«ԱԶԳ» ՕՐԱԹԵՐԹ #26, 06-07-2018

AZG Daily #35, 21-09-2018

Հայկական էկեկտրոնային գրքերի և աուդիոգրքերի ամենամեծ թվային գրադարան

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ՀԱՅՈՑ ՑԵՂԱՍՊԱՆՈՒԹՅԱՆ 100-րդ ՏԱՐԵԼԻՑ

Armenian Genocide

«ԱԶԳ» ՕՐԱԹԵՐԹԻ ՆՈՐ ՀԵՌԱԽՈՍԱՀԱՄԱՐՆԵՐՆ ԵՆ

ԱԶԴԱԳԻՐ