RSS | FACEBOOK | NLA
ԼՐԱՀՈՍ | ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՈՐՈՆՈՒՄ | ԱՐԽԻՎ | ԹԵՄԱ | ՀԵՂԻՆԱԿՆԵՐ


«ԱԶԳ» ՇԱԲԱԹԱԹԵՐԹԻ ԸՆԹԵՐՑՈՂՆԵՐԻՆ: Մայիսի 28-ի տոնի առիթով արձակուրդի մեջ գտնվելու պատճառով «Տիգրան Մեծ» տպագրատունը հինգշաբթի օրը չաշխատեց։ Հետեւաբար թերթի հերթական համարը բացառաբար լույս կտեսնի շաբաթ առավոտյան։ Ընթերցողներին սպասում է բովանդակալից համար, որտեղ հաճելի ընթերցանության համար իրենց նյութերը կառաջարկեն Երվանդ Ազատյանը, Անահիտ Հովսեփյանը, Նաիր Յանը, Արեւիկ Քեշիշյանը, Հակոբ Ծուլիկյանը, Արծվի Բախչինյանը, Սուրեն Սարգսյանը, Արմեն Մանվելյանը, Մանուկ Արամյանը, Ռաֆիկ Հովհաննիսյանը, Հակոբ Միքայելյանը, Գեւորգ Գյուլումյանը, Հակոբ Ավետիքյանը եւ ուրիշներ՝ գլխավորությամբ Սուքիաս Թորոսյան-Toto-ի։

ԼՐԱՀՈՍ    |    «ԱԶԳ»-Ի ՎԵՐՋԻՆ ՀԱՄԱՐԸ
#008, 2019-03-01 > #009, 2019-03-08 > #010, 2019-03-15 > #011, 2019-03-22 > #012, 2019-03-29

«ԱԶԳ» ՕՐԱԹԵՐԹ #10, 15-03-2019



Տեղադրվել է` 2019-03-15 00:15:22 (GMT +04:00)


Ընթերցված է` 709, Տպվել է` 50, Ուղարկվել է էլ.փոստով` 0

ՈՐ ԼԻՆԵՆՔ ԵՎ... ՈՒՆԵՆԱ՛ՆՔ

ՌԱՖԻԿ ՀՈՎՀԱՆՆԻՍՅԱՆ, Հայաստանի վաստակավոր լրագրող

Անցյալ շաբաթ ԵԱՀԿ Մինսկի խումբը հանդես եկավ Արցախյան հակամարտության խաղաղ կարգավորման մասին նոր հայտարարությամբ: Դրանում, ըստ իս, հայկական կողմի շահերի բացարձակ ոտնահարում կար: Նախ, այս հայտարարությամբ ԵԱՀԿ Մինսկի խումբը 1-ին անգամ Արցախյան հակամարտությունը բացեիբաց դիտարկում էր իբրեւ... տարածքային վեճ Հայաստանի ու Ադրբեջանի միջեւ, ոչ թե որպես Ադրբեջանի բռնատիրությունից ազատագրվելու արցախահայության ազգային-ազատագրական պայքարի արտահայտություն: (Նման մոտեցում ի սկզբանե չի եղել: Ծ.Խ.): Մերժվում էր բանակցային գործընթացի մասնակիցների թիվը փոխելու, դրանում պաշտոնական Ստեփանակերտին ներգրավելու մասին վարչապետ Նիկոլ Փաշինյանի առաջարկը, որ նա անում էր թավշյա հեղափոխությունից հետո: Հայաստանին առաջարկվում էր... վերադարձնե՛լ այսպես կոչված 7 գրավյալ շրջանները: Պարզ ասած, նախկինում հակամարտության խաղաղ կարգավորման համար բոլոր սկզբունքների համաժամանակյա կիրառումը պարտադիր պայման համարող ԵԱՀԿ Մինսկի խմբի եռանախագահները այս անգամ պետությունների տարածքային ամբողջականության պահպանման սկզբունքին... նախապատվություն էին տվել: Փոխարենը մշուշոտ մի ակնարկ կար, թե դրա դիմաց Արցախին կշնորհվի ինչ-որ միջանկյալ կարգավիճակ: Ո՞վ պիտի «շնորհի»ՙ Աստվա՛ծ գիտե: Դրանից հետո բոլոր փախստականները իրավունք կստանան վերադառնալու «իրենց բնակավայրերը»: Սա նշանակում էր միայն ազերի բնակիչների վերադարձ... Արցախ: Հայ փախստականների վերադարձի մասին, նույնիսկ Արցախի երբեմնի հայաբնակ վայրեր, որոնք այժմ գտնվում են Ադրբեջանի վերահսկողության տակ,...խոսք չկար: Ենթադրվում էր հակամարտության գոտի մտցնել խաղաղարար ուժեր, որոնք պիտի «կանխեն նոր բռնությունը հայկական եւ ադրբեջանական բնակչության միջեւ»: Իսկ ժամանակ անց միջազգային վերահսկողության ներքո պիտի անցկացվի արցախահայության ինքնորոշման նոր հանրաքվե:

Սա մեզ համար միանգամայն անընդունելի ծրագիր էր: Խոսք չկար հակամարտության գոտում վերահսկողության տեխնիկական միջոցներ տեղադրելու մասին, մինչդեռ բանակցային գործընթացի նախորդ փուլերում այդպիսի համաձայնություն արդեն ձեռք էր բերվել, թեեւ Ադրբեջանը դա երբեք չի պահպանել: Չկար նաեւ այն հարցի պատասխանը, թե ո՞վ է երաշխավորելու Արցախի եւ Հայաստանի Հանրապետությունների անվտանգությունը, եթե Ադրբեջանը շարունակի արգեսիան հայկական երկու պետությունների նկատմամբ: Չէ՞ որ ըստ Իլահամ Հեյդար-օղլու բարբաջանքներիՙ «ադրբեջանական հող» են թե՛ Արցախի, թե՛ Հայաստանի Հանրապետության տարածքները, որոնք իրենք «վաղ թե ուշ կազատագրեն անիծյալ հայերից»:

ԵԱՀԿ Մինսկի Խմբի եռանախագահների այս հայտարարությունը գոհունակությամբ ընդունվեց Բաքվում, եւ հիասթափությամբՙ Հայաստանում: Մենք հասկացանք, որ ԵԱՀԿ Մինսկի խմբի եռանախագահներին ամենեւին չի հուզում Արցախի ու Հայաստանի քաղաքացիների անվտանգությունը: Նրանց չի հուզում նաեւ այն հանգամանքը, որ Հայաստանում հաղթանակած ժողովրդավարություն է, իսկ Ադրբեջանումՙ ամբողջատիրական-արեւելաասիական բռնատիրություն: Ուստի բավական է անիմաստ հրճվենք «թավշյա հեղափոխության» շնորհիվ իբրեւ թե մեր երկրի ձեռք բերած «միջազգային բարձր հեղինակությամբ»: Դա մեզ էական ոչինչ չի՛ տվել եւ... չի՛ տալու: Եթե թուրքը հարձակվեցՙ առանց խտրականության բոլորի՛ս են հոշոտելու, չեն նայելու, թե մեզնից ո՞վ է դաշնակ, ո՞վՙ ռամկավար, հնչակ կամ անկուսակցական, ո՞վ է քայլում եւ ո՞վՙ նստում... Հա՞յ եսՙ թուրքի թշնամին ես: Սա՛ է թուրք-ազերիների վերաբերմունքը մեր հանդեպ: Իսկ մենք մեկս մյուսի դեմ ոխով լցվածՙ չենք հասկանում, որ... եղբայրներ ենք: Ուստի պարտավոր ենք միմյանց թեւ ու թիկունք դառնալ: Մինչդեռ երեկ կառավարող ՀՀՇ-ն դաշնակցականներին էր թշնամի հռչակել, հետո ի՛նքը հայտնվեց նույն վիճակում: Այժմ նիկոլականներն են պատրաստ հոշոտելու դեռ երեկ իշխանության կրող ՀՀԿ-ին, իսկ այսօր իրենց բոլոր ակնհայտ ձախողումների մեղքը «արդարացնում» են... նախորդների սխալներով: Վաղը, միանգամայն հնարավոր է, թշնամի հայտարարվեն... նիկոլականներն իրե՛նք: Եթե վերջ չտանք հատվածական անհեթեթ պայքարներին, երկրի ներսում թշնամիներ որոնելու մոլագարությանը, ապա ոչ-հեռու ապագայում, Աստված չանի, ո՛չ ինքներս կլինենք, ո՛չ պետություն կունենանք:

 
 

«ԱԶԳ» ՕՐԱԹԵՐԹ #10, 15-03-2019

Հայկական էկեկտրոնային գրքերի և աուդիոգրքերի ամենամեծ թվային գրադարան

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ԱԶԴԱԳԻՐ