RSS | FACEBOOK | NLA
ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՈՐՈՆՈՒՄ | ԱՐԽԻՎ | ԹԵՄԱ | ՀԵՂԻՆԱԿՆԵՐ

WWW.AZGONLINE.AM
2021-01-20 22:36:43Ինչպես անցավ Ջոզեֆ Բայդենի երդմնակալությունը
2021-01-20 22:35:52Գազի պայթյունից զոհեր Մադրիդում
2021-01-20 21:53:02Ադրբեջանն ինձ 50 000 դոլար է առաջարկել Արցախում գործած ռազմական հանցագործությունները չհրապարակելու համար. Թոմաշ Լեխ Բուչիչ
2021-01-19 20:33:12Կարսի զորավարժության նպատակը Երևանի օկուպացիան է, բայց գլխավոր շտաբն ամեն ինչ հասկանում է. Старше Эдды
2021-01-19 16:59:19Ռոսպոտրեբնադզոր. ЭпиВакКорона-ն 100% արդյունավետ է
#034, 2019-09-13 > #035, 2019-09-20 > #036, 2019-09-27 > #037, 2019-10-04 > #038, 2019-10-11

«ԱԶԳ» ՕՐԱԹԵՐԹ #36, 27-09-2019



ՄԻՋԱԶԳԱՅԻՆ

Տեղադրվել է` 2019-09-26 23:47:21 (GMT +04:00)


Ընթերցված է` 1221, Տպվել է` 25, Ուղարկվել է էլ.փոստով` 0

ԻՆՉՈ՞Ւ Է ՊԵՆՏԱԳՈՆԸ ՀԱՎԵԼՅԱԼ ՈՒԺԵՐ ՈՒՂԱՐԿՈՒՄ ՄԵՐՁԱՎՈՐ ԱՐԵՎԵԼՔ

ԱՐԵՎԻԿ ՔԵՇԻՇՅԱՆ

Patriot-ների ձախողումը փոխհատուցելու միջո՞ց

ԱՄՆ նախագահ Դոնալդ Թրամփը հավանություն է տվել հավելյալ զորաբաժին Մերձավոր Արեւելք ուղարկելու նախագծին: Այդ մասին լրագրողներին հայտնել է Պենտագոնի ղեկավար Մարկ Էսպերը ՙ պարզաբաներով, որ դա Սաուդյան Արաբիայի նկատմամբ Իրանի նախահարձակ քաղաքականության հակազդեցությունն է: Նրա խոսքերով, ամերիկյան լրացուցիչ զորքերի գործունեությունը կրելու է պաշտպանողական բնույթ եւ կենտրոնացած է գլխավորապես հակահրթիռային եւ հակաօդային պաշտպանության վրա: Էսպերն ասել է, որ ավելի վաղ Էր-Ռիադը խնդրել էր նման աջակցություն:

Ռազմական գերատեսչության ղեկավարը նաեւ նշել է, որ ԱՄՆ-ը կփորձի ոչ միայն հավելյալ զորք ուղարկել, այլեւ արագացնել ռազմական տեխնիկայի առաքումը Սաուդյան Արաբիա եւ ԱՄԷ, որպեսզի ընդլայնի նրանց ինքնապաշտպանության հնարավորությունները: «Նախագահը չի ձգտում Իրանի դեմ պատերազմի, բայց անհրաժեշտության դեպքում պատրաստի ունի ռազմական տարբերակներ»:

Իր հերթին, Շտաբների պետերի միացյալ կոմիտեի պետ գեներալ Ջոզեֆ Դանֆորդն ասել է, որ ուղարկվող հավելյալ զորաբաժնի թվակազմը կլինի սահմանափակ եւ չի հասնի հազարների:

Էր-Ռիադը երկար տարիներ Մերձավոր Արեւելքում ԱՄՆ-ի գլխավոր դաշնակիցներից մեկն է: Երկիրը ամերիկյան բանակի հենակետերից էր հակաիրաքյան պատերազմի ժամանակ. թագավորության տարածքից Պենտագոնն իրականացնում էր հետախուզություն եւ մարտական թռիչքներ դեպի Իրաք:

Իրաքում Սադդամ Հուսեյնի տապալումից հետո ամերիկացիները հայտարարեցին, որ դուրս են բերում զորքը Սաուդյան Արաբիայից, որտեղ մնացին միայն զինվորական հրահանգիչներ: Սակայն վերջերս Սպիտակ տունը ավելի ու ավելի հաճախ է դիմում Մերձավոր Արեւելքում իր զորաբաժինը մեծացնելու գաղափարին: Դրա առիթը ԱՄՆ-ի եւ նրա տարածաշրջանային դաշնակիցների կողմից Թեհրանին հասցեագրվող մեղադրանքներն են:

Ինչպես նշում են փորձագետները, Սաուդյան Արաբիան ԱՄՆ-ի համար մեծ հետաքրքրություն է ներկայացնում նաեւ որպես ամերիկյան զենքի գլխավոր գնորդներից մեկը: Էր-Ռիադը պաշտպանության վրա ծախսում է երկրի ՀՆԱ մոտավորապես 10 տոկոսը, իսկ պաշտպանական համաձայնագրերի նշականակալի մասը կնքվում է հենց Միացյալ Նահանգների հետ: Հարկ է նշել, որ Սաուդյան Արաբիայի հետ ամերիկյան կորպորացիաների համագործակցությունը որոշ դժգոհություն է առաջացնում հենց ԱՄՆ-ում. Կոնգրեսի ստորին պալատը անցած ամռանը նույնիսկ ընդունեց բանաձեւ, որն արգելում է շարունակել զենքի մատակարարումները սաուդցիներին: Խոսքը պաշտպանական պատվերների վիթխարի ծավալների մասին է, քանի որ նախագահ Թրամփը 2017 թվականին կարողացավ համաձայնության հասնել Սաուդյան Արաբիային ընդհանուր առմամբ 110 մլրդ դոլար զենքի մատակարարման շուրջ:

Սակայն Էր-Ռիադը քննության է առնում զենքի ներմուծման նաեւ այլընտրական տարբերակներ: Այսպես, երկու տարի առաջ հայտնի դարձավ, որ սաուդցիները Ռուսաստանի հետ համաձայնության են եկել հ-400 զենիթահրթիռային համակարգերի երեք համալիրների մատակարարման շուրջ: Սաուդյան նավթային օբյեկտները հարձակումից չպաշտպանած ամերիկյան հակաօդային համակարգի խոշոր ձախողման պայմաններում Մոսկվայի հետ երկխոսությունը կարող է աշխուժանալ, կարծում են վերլուծաբանները: Էր-Ռիադի հետ ռազմական համաձայնագրերը պահպանելու ձգտմամբ է մասամբ բացատրվում այն արագությունը, որով Սպիտակ տունը համաձայնեց լրացուցիչ զորաբաժին ուղարկել թագավորություն, նշում են փորձագետները:

Russia Today-ին տված մեկնաբանության մեջ արեւելագետ Կարինե Գեւորգյանը նշել է, որ «ԱՄՆ-ը ամեն ինչ անում է ուրիշ երկրների անվտանգության հաշվին փող աշխատելու համար: Դա Թրամփի ակնհայտ ուղեգիծն է: Նա ավելի վաղ բացեիբաց հայտարարել էր, որ մտադիր է գործընկերներից հատուցում ստանալ նրանց պաշտպանությանն օժանդակելու դիմաց: Տվյալ խաղի մեջ նախագահը անընդհատ բարձրացնում է խաղադրույքները»:

Սակայն Մոսկվայի Պետհամալսարանի պրոֆեսոր, Մերձավոր Արեւելքի փորձագետ Ալեքսանդր Վավիլովի կարծիքով, զինամատակարարման պայմանագրերը պահպանելու ձգտումը Վաշինգտոնի գործողությունների բնավ էլ միակ շարժառիթը չէ: «Միացյալ Նահանգներին ձեռնտու է սրել լարվածությունը Պարսից ծոցի տարածաշրջանում: Հենց այդ պատճառով Սպիտակ տունը ուշադրությունը բեւեռում է հակաիրանական արշավի վրա», պարզաբանել է Վավիլովը:

Իսկ ընդհանուր առմամբ Սաուդյան Արաբիայում հավելյալ զորքի տեղաբաշումը տարածաշրջանում ԱՄՆ-ի քաոսային քայլերի շարունակությունն է, կարծում է պրոֆեսորը: Ներկայումս ԱՄՆ-ը վերադառնում է տարածաշրջան, բայց նման փոքր զորաբաժնով Միացյալ Նահանգները ի վիճակի չեն լինի էապես ազդել ուժերի հարաբերակցության վրա: Այնպես որ, սա ընդամենը խորհրդանշական քայլ է, որը կոչված է ցուցադրելու Սաուդյան Արաբիան պաշտպանելու ԱՄՆ-ի պատրաստակամությունը այն բանից հետո, երբ ամերիկյան Patriot համալիրները չկարողացան պաշտպանել սաուդցիների նավթակայանքները անօդաչու թռչող սարքերի գրոհներից, ընդգծել է փորձագետը:

Համանման տեսակետ է արտահայտում նաեւ Կարինե Գեւորգյանը , որը գտնում է, որ ԱՄՆ վարչակազմը Սաուդյան Արաբիայում եւ ԱՄԷ-ում հավելյալ ուժեր տեղաբաշխելու որոշումը կայացրել է սեփական հեղինակությունը չկորցնելու համար: «Իրանին հասցեագրված մեղադրանքները ենթադրում են ռազմական գործողությունների ձեռնարկում, բայց Միացյալ Նահանգները չեն ուզում պատերազմել: Այդ պատճառով իր մեղադրանքներն արդարացնելու համար ԱՄՆ-ը հավելյալ ուժեր է ուղարկում Սաուդյան Արաբիա», ամփոփում է Գեւորգյանը:

 
 

«ԱԶԳ» ՕՐԱԹԵՐԹ #36, 27-09-2019

Հայկական էկեկտրոնային գրքերի և աուդիոգրքերի ամենամեծ թվային գրադարան

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ԱԶԴԱԳԻՐ