RSS | FACEBOOK | NLA
ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՈՐՈՆՈՒՄ | ԱՐԽԻՎ | ԹԵՄԱ | ՀԵՂԻՆԱԿՆԵՐ

#016, 2021-04-30 > #017, 2021-05-07 > #018, 2021-05-14 > #019, 2021-05-21 > #020, 2021-05-28

«ԱԶԳ» ՕՐԱԹԵՐԹ #18, 14-05-2021



Տեղադրվել է` 2021-05-13 23:03:53 (GMT +04:00)


Ընթերցված է` 1599, Տպվել է` 9, Ուղարկվել է էլ.փոստով` 0

ԱԼԵՆԻ ՄՈԼՈՐԱԿԸ ՄԵՐ ՄՈԼՈՐԱԿՈՒՄ

ՀԱՍՄԻԿ ՄԽԻԹԱՐՅԱՆ, Ուսանող

«Հուսով եմ մի օր բոլորը կհասնեն մտքի այն հասունությանը, որ գիրք նվեր ստանալուց մեզ պես ուրախանան»:

Ալեն Մարգարյան

Մայիսի 8-ին Կոմիտասի թանգարան-ինստիտուտում տեղի ունեցավ Արցախյան 44-օրյա պատերազմի ընթացքում զոհված զինծառայող Ալեն Մարգարյանի մասին պատմող գրքի շնորհանդես-համերգը: Գիրքը հրատարակել է «Զանգակ» հրատարակչությունը եւ մակագրված է Ալենի ձեռագրով:

Գիրքը տպագրվել է Ալենի ընկերների ու ծնողների նախաձեռնությամբ, այնտեղ հավաքված են նրա ընկերների, բարեկամների եւ ուսանողների հուշերը, որոնց միջոցով ներկայացվում են նրա գաղափարները, ձգտումներն ու երազանքները:

«Ամբողջ աշխատանքի ընթացքումՙ գիրքը գրելիս, ձեւավորելիս, խմբագրելիս փորձել ենք առաջնորդվել Ալենի ճաշակով, եւ հույս ունեմ, որ ինքը նույնպես գիրքը կհավաներ, այնպես, ինչպես ես եմ հավանում»,- ասաց Ալենի մտերիմ ընկեր Շողակաթը , ապա ավելացրեց, որ Ալենի անունը վաղուց արդեն գրքի հոմանիշ էր դարձել, ուստի նրան նվիրված գիրք հրատարակելուց ավելի լավ մտահաղացում չէր կարող լինել:

Գրքում չկա չափազանցություն, ավելորդ հուզականություն, դրամտիկ խոսքեր: Այստեղ տեղ են գտել Ալենի մասին պատմող ջերմ, լուսավոր եւ անկեղծ հուշերը: Շողակաթը հույս հայտնեց, որ ընթերցողին կփոխանցվի այն սերը, որ բոլորը տածում են Ալենի նկատմամբ:

Նազելի Տերտերյանը ՙ Ալենի մայրը, լրագրողների հետ զրույցում ասաց, որ իր տղան մանկավարժի, կրթողի, մեծ ինտելեկտուալի բնատուր հատկանիշներ ուներ:

«Ավելի լավ միջոց, քան գիրքն է, որ կարող էին տարածել Ալենի գաղափարները, հնարավոր չէր: Ալենին միշտ ասոցացնում ենք գրքի ու գրականության հետ, գիրքը նրա կյանքի անբաժանելի մասն էր: Գրքում Ալենի մասին պատմող տողերից եւ ոչ մեկը հատուկ չի խմբագրվել, ուղղակի անկեղծ գրվել է այն, ինչ մտածել կամ հիշել են նրա մասին»,- նշեց տիկին Նազելին եւ հավելեց, որ հիմնվելու է հիմնադրամ, որի միջոցով օգնություն է տրամադրվելու հատկապես այն տղաներին, որոնք կցանկանան իրենց ուսումը շարունակել արտերկրում: Մայրը նաեւ շեշտեց, որ ցանկանում է որդու անվան դպրոց հիմնադրել:

Տիկին Նազելին պատմեց, որ Ալենի ուսումնասիրած գրականությունը բազմաժանր էր, սակայն հատկապես առանձնացրել ու բարձրագույն գրականություն է համարել մանկականը: Ալենը փոքր տարիքից ստեղծագործել է, հեքիաթներ գրել, որոնք տպվել են մի շարք ամսագրերում ու թերթերում:

Ալենի մասին խոսելիս տիկին Նազելին ասաց. «Բոլորդ գիտեք նրա ձեռքբերումները, որ հանգիտ կարող էր բարեկեցիկ կենցաղը վայելել, ուսանել աշխարհի լավագույն համալսարաններից մեկում եւ դա անել ճակատը պարզ, ազնիվ, որովհետեւ պետությունը նրան շնորհել էր այդ բացառիկ իրավունքը, բայց Ալենը Ալեն չէր լինի, եթե նմանվեր բոլորին, ԵՐՋԱՆԻԿ ԵՄ, ՈՐ ԱԼԵՆԻ ՄԱՅՐՆ ԵՄ, ՈՐ ԱԼԵՆ ԵՄ ՏՎԵԼ ԱՅՍ ԱՇԽԱՐՀԻՆ: Այսօր ինձ բռնում եմ այն մտքի վրա, որ մայրական սիրո, կորստի ցավի վրա փորձում եմ ճնշել այն գերագույն հպարտությամբ, որը կոչվում է ՀԵՐՈՍԻ ՄԱՅՐ»:

Ալենի ընկերներից Լուսինեն ասում է. «Մենք ուզում ենք, որ աշխարհը փոխելու Ալենի դժվար ու անբացատրելի թվացող գաղափարը իր հետ կյանքի կոչենք: Այո՛, իր հետ, որովհետեւ Ալենը կաՙ մեր մեջ է»:

«Զանգակ» հրատարակչության հասարակայնության հետ կապերի մասնագետ Գայանե Ավդալյանը նշեց, որ գիրքը տպագրվել է 1500 օրինակով, սակայն հետագայում կլինի նաեւ երկրորդ հրատարակություն:

«Գրքի հասույթը որպես կրթաթոշակ փոխանցվելու է իր երկու ընկերներին, որոնք պատրաստվում են իրենց կրթությունը շարունակել արտասահմանում: Ծրագիրը շարունակական է լինելու, ամեն ինչ չի սահմանափակվելու միայն գրքով, հետագայում կլինեն նաեւ այլ մտահաղացումներ»,- նշեց Ավդալյանը:

Շնորհանդեսն ուղեկցվեց համերգային ծրագրովՙ «Կադանս» անսամբլի, inRock Quintet-ի եւ անհատ կատարողների մասնակցությամբ:

Հերոսները մահանում են այն ժամանակ, երբ սերունդները չեն հիշում նրանց: Այս պատերազմը խլեց հազարավոր հայորդիների լուսավոր կյանքեր, Ալենը նրանցից մեկն էր:

Նրանք ծնվեցին ու աշխարհ եկան, որ մեզ ստիպեն մտածելՙ «Արդյոք ես արժանի՞ եմ իրենց ապրած կյանքին»:

 
 

«ԱԶԳ» ՕՐԱԹԵՐԹ #18, 14-05-2021

Հայկական էկեկտրոնային գրքերի և աուդիոգրքերի ամենամեծ թվային գրադարան

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ԱԶԴԱԳԻՐ