RSS | FACEBOOK | NLA
ԼՐԱՀՈՍ | ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՈՐՈՆՈՒՄ | ԱՐԽԻՎ | ԹԵՄԱ | ՀԵՂԻՆԱԿՆԵՐ


«ԱԶԳ» ՇԱԲԱԹԱԹԵՐԹԻ ԸՆԹԵՐՑՈՂՆԵՐԻՆ. Սիրելի «ԱԶԳ»ականներ, այս օրերի համար ոչ անսպասելի հանգամանքների պատճառով, «ԱԶԳ» շաբաթաթերթի հունիսի 5-ի համարի նյութերը հրապարակվում են վաղը՝ 6 հունիսի առավոտից սովորական՝ azg.am ԼՐԱՀՈՍ հպման տակ, եւ, միաժամանակ, azgonline.am մեր կայքէջերում։ Գումարած թերթում լույս տեսած նյութերի հրապարակվում են նաեւ այլ հոդվածներ ու մեկ հարցազրույց, որոնք տեղի սղության պատճառով դուրս են մնացել թերթի էջերից։ Ապավինում ենք ընթերցողների ներողամտությանը՝ կամքից անկախ պատճառներով պատահած ուշացման համար։ Խմբագրություն

ԼՐԱՀՈՍ    |    «ԱԶԳ»-Ի ՎԵՐՋԻՆ ՀԱՄԱՐԸ
#004, 2020-01-31 > #005, 2020-02-07 > #006, 2020-02-14 > #007, 2020-02-21 > #008, 2020-02-28

ԱԶԳ ՕՐԱԹԵՐԹ - ՄՇԱԿՈՒՅԹ #6, 14-02-2020



ԿԻՍԱՏ ՔԱՅԼ

Տեղադրվել է` 2020-02-13 19:49:36 (GMT +04:00)


Ընթերցված է` 172, Տպվել է` 1, Ուղարկվել է էլ.փոստով` 0

ՕՐԲԵԼՅԱՆԸ ՏՆՕՐԵՆԻ ՊԱՇՏՈՆՈՒՄ ՎԵՐԱԿԱՆԳՆՎԵՑ, ԲԱՅՑ...

Նաիր ՅԱՆ

Կոնստանտին Օրբելյանը Ալ. Սպենդիարյանի անվան օպերայի եւ բալետի ազգային ակադեմիական թատրոնի տնօրենի պաշտոնում վերականգնվել է: Շուտով կլրանա մեկ տարին, ինչ մաեստրոն քաշքշուկների մեջ է: Իրեն հանիրավի աշխատանքից ազատվելու համար նա դատի էր տվել մշակույթի նախկին փոխնախարար Նազենի Ղարիբյանին ու դատը շահել: Բնականաբար, նախարարությունը կամ օպերային թատրոնը պետք է վճարեին դատական ծախսերն ու հարկադիր պարապուրդի գումարը: Սակայն ԿԳՄՍ նախարարությունը բողոքարկել էր դատարանի վճիռը: Դրա պատճառով մաեստրոն սպասեց եւս երկու ամիս, եւ օրերս պարզ դարձավ, որ դատարանը նախարարության բողոքարկման հայտը մերժել է: Այնպես որ, իշխանություններն ուզեն-չուզեն Կոնստանտին Օրբելյանիՙ թատրոնի տնօրենի հաստիքը պետք է վերականգնեն:

Հաստիքը վերականգնվել է, Օրբելյանն էլ պատրաստվում է ստեղծագործական ծրագրերն իրականացնել. Արմեն Տիգրանյանի «Անուշ» օպերան ուզում է վերաբեմադրել նորովի, որպեսզի այն ներկայացվի ԱՄՆ-ում: Մտադիր է Վաչե Շարաֆյանի «Հին աստվածներ» օպերան բեմադրել: Բայց մաեստրոն անորոշության մեջ է: ԿԳՄՍ նախարարությունը ոչ մի դիրքորոշում ցույց չի տալիս, պարզ չէՙ ինչ վերաբերմունք ունի թատրոնի նկատմամբ:

2016 թվականից օպերային թատրոնի որեւէ ներկայացում պետական ֆինանսավորում չի ստացել. վերջինը «Դիմակահանդես» բալետն է եղել, այն էլ Կոնստանտին Օրբելյանի նյութական աջակցությանը դիմելու կարիք, այնուամենայնիվ, եղել է:

Մաեստրոն պատմում է, որ իշխանափոխությունից առաջ Դուբայ ու Քուվեյթՙ հյուրախաղերի մեկնելու ճանապարհածախսը պետք է պետությունը հոգար. պայմանավորվածությունն արդեն ձեռք էր բերվել: Սակայն մշակույթի ոլորտի հեղափոխական պատասխանատուները հրաժարվել են գումար տրամադրել: Օրբելյանը ստիպված է եղել ճանապարհածախսը սեփական գրապանից տալ: «Դուք կին եք, ցանկացած ժամանակ կարող եք Ձեր ազգանունը փոխել, իսկ ես ազգանունս փոխել չեմ կարող, ես Օրբելյան եղել եմ, Օրբելյան էլ կմնամ. իմ ստորագրությունն անփոփոխ է: Քուվեյթ ու Դուբայ հյուրախաղերի մեկնելու պայմանագրի տակ արդեն ստորագրել եմՙ Օրբելյան»,- ֆինանսավորման պայմանավորվածությունը չեղարկած Նազենի Ղարիբյանին ասել է Կոնստանտին Օրբելյանը:

Մշակույթի փոխնախարարի պատճառով Կոնստանտին Օրբելյանի հետ կնքված մի շարք պայմանագրեր հետաձգվել կամ չեղարկվել են, որովհետեւ մաեստրոն ազատվել էր տնօրենի պաշտոնից: Հովանավորներն էլ են հետ քաշվել: Թատրոնը նոր ներկայացումներ, իհարկե, բեմադրել է, բայց բոլորը տնօրենի պաշտոնից ազատված, թատրոնի գեղարվեստական ղեկավար Կոնստանտին Օրբելյանի ֆինանսավորմամբ: Այդկերպ են բեմ հանվել «Մանոնը», «Չիպոլինոն», «Բյուրեղապակյա դղյակը»: Որեւէ ներկայացման կամ պրեմիերայի իշխանության ներկայացուցիչներից ոչ ոք չի եկել:

Հունվարին Յոլյանի անվան արյունաբանական կետրնում բուժվող երեխաների համար բալետային խումբը «Չիպոլինոյից» մի հատված ներկայացրեց : Նախաձեռնությունը վարչապետի տիկին Աննա Հակոբյանինն էր: Վաստակավոր արտիստ Ռուբեն Մուրադյանը տիկնոջը հրավիրեց հունվարի 30-ի «Դիմակահանդես» ներկայացմանը: Բայց այդ օրն էլ Աննա Հակոբյանը օպերային թատրոն չի գնացել:

Թատրոնի տանիքը նորոգման կարիք ունի: Թամանյանական գլուխգործոցի տանիքը քայքայված է, կաթում է, օդափոխության համակարգ չկա, ամռանը փորձ անել կամ ուղղակի ներկայացում դիտել հնարավոր չէ. հեղձուկ է: Պետությունը գումար չի տրամադրում ոչ միայն ներկայացումների, այլեւ թատրոնի կարիքների համար:

Անզեն աչքով էլ նկատելի է, որ իշխանություններն անթաքույց քամահրանք ունեն օպերային թատրոնի նկատմամբՙ ի դեմս Կոնստանտին Օրբելյանի: Վարչապետը ժամանակ առ ժամանակ կոչ է անում զբոսաշրջությունը զարգացնել, Երեւանն օտարների համար գրավիչ դարձնել: Ամռանը զբոսաշրջիկներ են գալիս Երեւան, բայց այդ ամիսներին օպերային թատրոնում ներկայացում նայել ուղղակի հնարավոր չէ, որովհետեւ դահլիճում տոթ է: Զբոսաշրջիկին գրավելու համար պետք է դասական հարուստ խաղացանկ ունենալՙ բալետներ ու օպերաներ: Եթե 2016 թվականից ի վեր պետությունը ոչ մի ներկայացում չի ֆինանսավորել, ուրեմն մինչեւ վերջ հույսներս պետք է Կոնստանտին Օրբելյանի գրպանի վրա՞ դնենք:

Ի դեպ, չնայած որ նրաՙ թատրոնի տնօրենի հաստիքը վերականգնվել է, բայցեւայնպես մաեստրոն ռիսկի գոտում է գտնվում: Օգոստոսի 3-ին նրա աշխատանքային պայմանագիրը լրանում է: Օրբելյանը միամիտ չէ, ու շատ լավ կանխատեսում է, որ թեեւ դատարանով վերականգնվեցին իր իրավունքները, բայց մեծ է հավանականությունը, որ աշխատանքային պայմանագիրն իր հետ միգուցեեւ չերկարացվի: Եթե չկան երաշխիքներ, ուրեմն նոր ներկայացումներ, երկարաժամկետ ծրագրեր, համագործակցություններ ակնկալելն էլ դժվար է: Ի վերջո, օգոստոսի 3-ը յոթ սարերի հետեւում չէ:

 
 

ԱԶԳ ՕՐԱԹԵՐԹ - ՄՇԱԿՈՒՅԹ #6, 14-02-2020

Հայկական էկեկտրոնային գրքերի և աուդիոգրքերի ամենամեծ թվային գրադարան

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ԱԶԴԱԳԻՐ