ՈՒՂԱՐԿԵԼ ՀԵՂԻՆԱԿԻՆ

Եթե կա անհրաժեշտություն ստանալ պատասխան խմբագրությունից, ապա խնդրում ենք հաղորդագրության մեջ նշել նաև Ձեր էլ.հասցեն։

ՀԱՂՈՐԴԱԳՐՈՒԹՅՈՒՆ:
ՈՒՂԱՐԿԵԼ:

«ԱԶԳ» ՕՐԱԹԵՐԹ #161, 2013-09-25

ԻՐԱՆԸ ՍՏԱՑԱՎ ԲՈՒՇԵՀՐԻ ԱԷԿԻ ԱՌԱՋԻՆ ԷՆԵՐԳԱԲԼՈԿԸ

Ռուսները շահագործման համար Իրանին են հանձնել Բուշեհրի ատոմակայանի առաջին էներգաբլոկը, հաղորդում է ՌԻԱ գործակալությունը:

«Ռոսատոմ» պետկորպորացիայում գործակալությանը հայտնել են, որ ստորագրված երկկողմ արձանագրության համաձայն, կայանը երկու տարի երաշխիքային ժամկետի մեջ է. մի խումբ ռուսաստանցի մասնագետներ այնտեղ կմնան տեղական անձնակազմին խորհուրդներ տալու նպատակով:

Իրանում աէկի շահագործմանը սպասել էին 37 տարի: Դեռ 1975-ին աէկի շինարարությունը սկսել էին գերմանացիները, բայց 1979 թ. Իսլամական հեղափոխությունից հետո Գերմանիան միացել էր ԱՄՆ-ի հակաիրանական պատժամիջոցներին: Նախագիծը սառեցվել էր: Իրանի բնակչությունն աճում էր, նավթի ու գազի հանքավայրերը պահանջում էին ավելի ու ավելի շատ էլեկտրականություն: Ի վերջո Ռուսաստանն ու Իրանը ստորագրել էին համաձայնագիր խաղաղ ատոմի ոլորտում համագործակցելու վերաբերյալ:

Ներկայումս աէկի շենքում գործում է BBնՀ-1000 տիպի ռեակտոր: Իրանական անձնակազմը պրակտիկա է անցել Նովովորոնեժում եւ Բալակովոյում: Բուշեհրի առաջին էներգաբլոկը Իրանի էներգացանցին կարող է տալ տարեկան 7 մլրդ կվտ/ժամ էլեկտրաէներգիա:

Էներգաբլոկը վերջնականապես իրանական կողմին կփոխանցվի երկու տարվա երաշխիքային փորձարկումներից կամ 7 հազար ժամվա աշխատանքից հետո:

Ի դեպ, ռուսաստանցի մասնագետները գուցե վերջնականապես չհեռանան Բուշեհրից, քանի որ արդեն պայմանավորվածություն է ձեռք բերվել աէկի 2-րդ էներգաբլոկի կառուցման վերաբերյալ: «Կոմերսանտ» թերթը սեպտեմբերի 11-ին գրեց, որ ՌԴ նախագահ Վլադիմիր Պուտինը կարգադրել է սկսել Բուշեհրի 2-րդ էներգաբլոկի շինարարությունը:

Պ. Ք.


https://www.azg.am/AM/2013092504

© AZG Daily, 2008